ოქრო 12 წლის შემდეგ, თანაც 2! ჩინებული სტარტი ყაზახეთში! 

12-წლიანი პაუზის შემდეგ საქართველოს ისევ ჰყავს მსოფლიოს ჩემპიონი ბერძნულ-რომაულ ჭიდაობაში. თანაც, 2007 წელს ბაქოში გამართული მსოფლიოს პირველობის მსგავსად, ჩვენმა ნაკრებმა ამჯერადაც ერთბაშად ორი ოქრო მოიპოვა:

პლანეტის ჩემპიონები ხობელი ნუგზარ წურწუმია (55) და ხულოელი ლაშა გობაძე (82) გახდნენ. ამასთან, საქართველოს ნაკრებმა ტოკიოს 2020 წლის ოლიმპიადის ერთი ლიცენზიაც გაინაღდა: დღეს საღამოს ბრინჯაოს მედლისთვის იჭიდავებს სამტრედიელი გიორგი მელია (97), საგზურს კი ექვსი საუკეთესო მოჭიდავე იღებს.

ამდენად, ახლა მას საზრუნავად ბრინჯაოს მედალი რჩება. აქვე გეტყვით, რომ 55 და 82 კილოგრამები არ შედის ოლიმპიადის პროგრამაში. ამიტომ ამ წონებში ლიცენზიები არ თამაშდებოდა, თორემ იცოცხლეთ, ბევრად მეტი საგზური გვექნებოდა. 

ყაზახეთის სახელშეცვლილ დედაქალაქ ნურ სულტანში მიმდინარე მოჭიდავეთა მსოფლიოს ჩემპიონატში თავდაპირველად ბერძენ-რომაელები ჩაებნენ, ჩვენმა ჩემპიონებმა კი ერთიმეორეზე უკეთესი და ლამაზი ჭიდაობა აჩვენეს. თუმცა მათგან ეს არცაა გასაკვირი, რადგან ორივე გამოირჩევა უაღრესად ტექნიკური და სანახაობრივი ჭიდაობით. 

წურწუმიამ ამჯერადაც მისთვის ჩვეულ, აგრესიულად შემტევ სტილში იჭიდავა მთელი ტურნირი. ასევე ტრადიციულად, მაშინაც კი უტევდა, როცა გვარიანად დაწინაურდებოდა ხოლმე. თან ის ქულათა უმეტესობას დგომიდან აკეთებს ხოლმე. მან ერთიმეორეზე ულამაზესი და ეფექტური გდებებით თავბრუ არა მარტო მეტოქეებს, არამედ დარბაზს თუ ტელეეკრანებთან შეკრებილ მაყურებელსაც კი დაახვია. 

ასეთ აგრესიულად შემტევ სტილს პირველ შეხვედრაში ჩინელი ლიქუო ჩაო ემსხვერპლა, ვისაც 4-ქულიანი გდებაც გაუკეთა და წმინდად, 9:0 მოუგო. ჯერ იყო და, ჩოქბჯენში ჩაყვანილი მეტოქე ხალიჩიდან ასწია და წინ ჩაჩეხა, იქვე კი კომბინაციაში დატრიალებაც მიაყოლა. ბოლოს კიდევ ერთხელ ჩაიყვანა დაბლა და საბოლოო ანგარიშიც დააფიქსირა. 

ნაკლები დღე არც მეოთხედფინალში დაადგა რუს ვიტალი კაბალოევს, ვისაც უკვე მერამდენედ მოუგო, სათვალავიც კი აგვერია: 8:3. მასთან წელში შევიდა და იოლად გადააგდო უკან, მერე წრიდანაც გაიყვანა, რასაც ორქულიანი გდებაც მიაყოლა, ბოლოს კი მოგვერდზეც გაიქნია.

ნახევარფინალში იაპონელი შოთა ოგავაც წმინდა მოგებაზე „დადო“ - 8:0,. ის სამჯერ დაბლა ჩაიყვანა, იქ კი ერთხელ დაატრიალა. ბოლო გდებისას იაპონელი ვა-ბანკზე წავიდა და თავს უკან გდებაც დაუპირა, მაგრამ წურწუმიამ ილეთი დაუხურა და იქით დააგდო ლეიბზე, ფინალში კი ლამის სირბილით გავიდა მასპინძელ ხორლან ზაკანშასთან საბრძოლველად და მასთან წმინდად მოსაგებად ერთი წუთიც არ დასჭირვებია: 9:0. წურწუმიამ თავიდანვე შეუტია და უკვე 25-ე წამზე 4-ქულიანი გდებაც გააკეთა: დგომში „ჯვარზე“ კარგად შეეკრა მეტოქეს და გადააგდო, თუმცა ყაზახებმა ეს ეპიზოდი გააპროტესტეს, ოღონდ მსაჯებმა არ დააკმაყოფილეს და ერთი ქულა წურწუმიას დაუმატეს.

მალევე მან მოძრაობაზე დაიჭირა ყაზახი და ლეიბზე უკან გააგდო, ცოტა ხანში კი უპრობლემოდ ჩაიყვანა დაბლა და საბოლოო ანგარიში, 9:0 დააფიქსირა. ზაკანშა სიმწრისგან ტიროდა, იქით კი მისი მწვრთნელის, ჩვენი ჩემპიონის მოგვარე ქართველის - გიორგი წურწუმიას გაოგნებული სახე უნდა გენახათ! 

საკვალიფიკაციო წრეში გობაძეც ისვენებდა, მერე კი ისიც ყოჩაღად დაერია მეტოქეებს: ამერიკელ ჯონ სტეფანოვიჩს 7:0 მოუგო, ჩინელ ჰაიტაო ქიანს სულაც 9:0 აჯობა, ხოლო ნახევარფინალში უზბეკი ნურბეკ ხასიმბეკოვი 3:1 დაამარცხა. ფინალში ნაცნობ მეტოქეს, აზერბაიჯანელთა ევროპის ექსჩემპიონ რაფიკ ჰუსეინოვს შეხვდა, ვისთანაც ადრეც მოუგია, ამჯერად კი 5:3 იმარჯვა.

გობაძემ ფინალი აქტიურად დაიწყო და ჰუსეინოვი პასიურობისთვის ქულით დასაჯეს. გობაძემ ჩოქბჯენი მოითხოვა და მეტოქე მისთვის ჩვეულ ცოტა უცნაურ სტილში გადააგდო: ჩოქბჯენში წინიდან დაუდგა მეტოქეს, ხელები წელს ქვემოთ კარგად შეუკრა და თავს უკან 4-ქულიანზე გადააგდო. ამის შემდეგ მან ტაქტიკა შეცვალა და შეტევიდან ანგარიშის შენარჩუნებაზე გადავიდა. ეს ცოტა სარისკო ნაბიჯი იყო, რადგან პასიურობისთვის ქულითაც დასაჯეს და ჩოქბჯენშიც. იყო საშიშროება, რომ აზერბაიჯანელსაც გადაეგდო 4-ქულიანზე და ფრეზე უკვე ის იგებდა, მაგრამ გობაძემ თავი კარგად დაიცვა და საქართველოს მეორე ოქრო მოუტანა. 

მელია ნახევარფინალში დამარცხდა სომეხთა ოლიმპიურ, მსოფლიოსა და ევროპის ჩემპიონ არტურ ალექსანიანთან, ვინც ბოლო წლებში ერთ-ერთი დაუმარცხებელი ფალავანია. მანამდე მელიამ ბრწყინვალედ იჭიდავა და თავიდან ზედიზედ ორი მეტოქე დააწვინა ბეჭებზე: ჰონდურასელი კევინ მეხია კასტილიოთან 5:0-ზე, ყაზახ იერლან ისკაკოვთან კი 4:0-ზე მიითვალა „ტუშე“. დამამშვიდებლის ფინალში ბრინჯაოს მედლისთვის პაექრობაში მისი მეტოქე დღეს საღამოს გამოვლინდება, როცა ფინალურ ბლოკში სანუგეშო წრის შეხვედრები გაიმართება. მელიასთან შეხვედრის უფლების მოსაპოვებლად ჯერ ბელარუსი ალექსანდრ ჰრაბოვიკი და ფინელი მატი ელიას კოუსმანენი იჭიდავებენ ერთმანეთში, ამათში მოგებული თურქ ჯენკ ილდემს დაეჭიდება, ამ დუეტიდან უძლიერესი კი ირანელ მოჰამედჰადი აბდოლაჰ სარავის გაეჯიბრება. აი, ამ პაექრობის მომგები იჭიდავებს დამამშვიდებლის ფინალში მელიას წინააღმდეგ. 

ამ ორი დღის განმავლობაში ყაზახურ ხალიჩაზე ლევან ქავჟარაძემ (63), შმაგი ბოლქვაძემ (67), იური ლომაძემ (72) და გურამ ხეცურიანმაც (87) იჭიდავეს, თუმცა ისინი ნაადრევად დამარცხდნენ და სანუგეშო წრეშიც ვერ გადავიდნენ. 

დღეს მსოფლიოს ჩემპიონატში სამი დარჩენილი წონითი კატეგორიის ფალავნებიც ჩაებმებიან. ევროპის პრიზიორი დავით ჩხარტიშვილი (60) პირველ პაექრობას საკვალიფიკაციო წრეში ჩრდილოკორეელ სე უნგ რისთან გამართავს. ახალგაზრდებში მსოფლიოს ჩემპიონი გელა ბოლქვაძე (77) 1/16-ფინალში ძლიერ აზერბაიჯანელ ელვინ მურსალიევს დაეჭიდება, ხოლო ევროპული თამაშების ვიცე-ჩემპიონი იაკობ ქაჯაია (130) საკვალიფიკაციოში ნორვეგიელ ოსკარ მარვიკთან იჭიდავებს. 

ყოველდღიური სპორტული გაზეთი "ლელო"
395
მკითხველის კომენტარები / 0 /
მსგავსი ამბები
რუბრიკის სხვა სიახლეები
;