ოცნებათა სასაფლაო ბრაზილიაში - პასუხები მნიშვნელოვან საკითხებზე

ისტორიის კუთვნილება გახდა მორიგი “კოპა ამერიკა”. წარსულ ჩაჰბარდა ტელეეკრანებთან გატარებული უძილო ღამეები და დადგა შეჯამების დრო.

სამწუხაროდ, აღტაცების საფუძველი ნაკლებად გვაქვს. მეტიც, ფეხბურთის მილიონობით გულშემატკივარს ამ ტურნირმა იმედები გაუცრუა...

საით მიდის ფეხბურთი?

ასე იყო ბოლო მუნდიალზე და ასე მოხდა ახლაც - რასაც ჰქვია “შემტევი ფეხბურთი” და “სანახაობა”, ბრაზილიურ მინდვრებზე პრაქტიკულად არცერთ ნაკრებს არ უჩვენებია ასეთი თამაში. თქვენ წარმოიდგინეთ, მათ შორის, არც გამარჯვებულ ბრაზილიას (თუ არ ჩავთვლით პერუსთან ჯგუფური ეტაპის მატჩს, “სელესაომ” 5:0 რომ მოიგო), რომელსაც უხსოვარი დროიდან სწორედ ასეთი ფეხბურთის ქადაგებისთვის ქომაგობს მილიონობით ადამიანი. 

პერუს ნაკრები ნათელი მაგალითია იმისა, თუ როგორ შეუძლია საშუალო დონის შემადგენლობის გუნდს დიდ ტურნირებზე წარმატებით თამაში იმ შემთხვევაში, თუ სწორად დაგეგმავს სატურნირო სტრატეგიას. პერუმ პრაქტიკულად ყველა შეხვედრაში კონტრშეტევებით მიაღწია წარმატებას.

მთავარი ვარსკვლავი: რიკარდო გარეკა

მთელმა ტურნირმა ისე ჩაიარა, ჩვენ ვერ ვნახეთ ვერცერთი ახალი ვარსკვლავის ამობრწყინება. ალბათ, ბევრი დაგვეთანხმება: “კოპა ამერიკის” მთავარი ვარსკვლავი გახლდათ პერუს ეროვნული ნაკრების არგენტინელი მწვრთნელი რიკარდო გარეკა. 

ჯერ იყო და, გარეკამ მსოფლიოს ჩემპიონატზე ათამაშა პერუს ეროვნული ნაკრები, მერე კი, მისი თავკაცობით, გუნდმა “კოპა ამერიკის” ფინალს, რასაც არავინ ელოდა. მისმა სამწვრთნელო ნიჭმა ურუგვაისა და ჩილეს ეროვნული გუნდებიც კი შეიწირა. შემთხვევითი არ არის, რომ გარეკას არგენტინის ეროვნულ ნაკრებში დანიშვნას უწინასწარმეტყველებენ.

მესის კიდევ ერთი  იმედგაცრუება

რაოდენ პარადოქსულიც უნდა იყოს, ლიონელ მესისთან ერთად არგენტინის ნაკრები ჯერაც უტიტულოდაა. არავინ იცის, როდემდე გაგრძელდება ეს უიღბლობა. ისე ჩანდა, რომ ამ ტურნირზე ბევრი რამ იყო ლეოსა და “ალბისელესტეს” წინააღმდეგ, მათ შორის, ვიდეორეფერიც. 

მესი თანდათან კრეფდა ფორმას, მაგრამ ტურნირი მაინც ვერ მოიგო და ის სკანდალური გაძევებით დაასრულა. მესიმ უარი თქვა ბრინჯაოს მედალზე და აღნიშნა, რომ ბრაზილიის ჩემპიონობა წინასწარ იყო გადაწყვეტილი. მას გაისად ექნება “კოპა ამერიკის” მოგების შანსი, როცა ეს ტურნირი მის სამშობლოში გაიმართება.

როგორც ჩანს, ამიტომაც არ აპირებს ნაკრებიდან წასვლას. ახლა მთავარია, ფიფასა და სამხრეთ ამერიკის კონფედერაციის მიმართ კორუფციასთან დაკავშირებული ბრალდებების გამო მოსალოდნელ დისკვალიფიკაციას ასცდეს...

მსაჯობა, როგორც  მთავარი პრობლემა

თუნდაც მესამე ადგილისთვის მატჩი რომ ავიღოთ, მივხვდებით, რომ მსაჯობა იყო ტურნირის მთავარი პრობლემა. არ ყოფილა პრაქტიკულად არცერთი შეხვედრა, სადაც მსაჯობის თაობაზე აზრთა სხვადასხვაობა და კამათი არ ყოფილიყო. 

ასე განსაჯეთ, საქმეს არც ვიდეორეფერის შემოღებამ უშველა. მსაჯების კვალიფიკაციას კი დადებითად ვერაფრით შევაფასებთ. მათ არაერთი შეცდომა დაუშვეს, მათ შორის ისეთებიც, რომლებმაც პირდაპირი გავლენა იქონიეს შედეგზე.

აქ ფეხბურთის  თამაში შეიძლება?

არ დარჩენილა “კოპა ამერიკაზე” მოთამაშე ფეხბურთელი, რომელსაც არ გაეკრიტიკებინოს ტურნირის მასპინძელი ამა თუ იმ სტადიონის მინდვრის საფარის მდგომარეობის გამო. კარგი, ჩავთვალოთ, რომ ლიონელ მესი, ლუის სუარესი, ედინსონ კავანი და სხვები არ არიან ბრაზილიელები და თავისუფლად შეუძლიათ, გამოთქვან კრიტიკული აზრი...

...მაგრამ რა ვუყოთ იმას, რომ უხარისხო მინდვრებს თვით ტურნირის მასპინძელი ბრაზილიის ნაკრების მწვრთნელ-ფეხბურთელებიც მძაფრად აკრიტიკებდნენ?! ფაქტია, ზოგიერთი მოედანი ისეთ მდგომარეობაში იყო, უფრო ყანას ჰგავდა, ვიდრე ფეხბურთის სათამაშო ასპარეზს...

ყველაზე დიდი ბრალდება...

ყველაზე დიდი ბრალდება “კოპა ამერიკის” ორგანიზატორებმა ლიონელ მესისგან მიიღეს. არგენტინის ნაკრების ლიდერმა განაცხადა, რომ უარს ამბობს ბრინჯაოს მედლის მიღებაზე, რადგან არ სურს, იყოს კორუფციის ნაწილი. მესი მიიჩნევს, რომ ბრაზილიის ნაკრების ჩემპიონობა გადაწყვეტილი ამბავი იყო. 

რეალურად არავინ იცის, რა და როგორ იყო, მაგრამ ფაქტი კი ის არის, რომ ასეთი ბრალდება ძალიან დიდი დარტყმაა ტურნირის ორგანიზატორებისთვის. 

რატომ არ იყო სანახაობა?

ფეხბურთის სამხრეთამერიკელ ვარსკვლავებს, შესაძლოა, ბევრი რამ დაუწუნო, მაგრამ რასაც ვერ დაუწუნებ, ეს არის ტექნიკა. ბრაზილიურ მინდვრებზე კი ტექნიკურ ფეხბურთელებს ძალიან გაუჭირდათ. ბოლო ორ შეხვედრაში მსოფლიოს ყველაზე ტექნიკურმა მოთამაშემ, ლიონელ მესიმ, ასე თუ ისე აჩვენა ის ფეხბურთი, რასაც მისგან ელოდნენ, მანამდე კი... 

...მესი საკუთარ აჩრდილს ჰგავდა. ასე იყვნენ სხვა ვარსკვლავებიც. ამაში კი დამნაშავე სწორედ ის მინდვრებია, რომელზეც ბურთის დამორჩილება ძალიან ჭირდა, პრაქტიკულად, შეუძლებელიც იყო.

ჩილე მორჩა?

დიდი ალბათობით, ჩილეს ნაკრებმა ამ შემადგენლობით ბოლო დიდი ტურნირი ჩაატარა. ჩილეს შესანიშნავი გუნდი ჰყავდა, რომელმაც ორჯერ მოიგო “კოპა ამერიკა” და შემტევი, ლაღი ფეხბურთით ყველას პატივისცემა დაიმსახურა. შესაძლოა, ალექსის სანჩესი და არტურო ვიდალი ისევ ვიხილოთ ნაკრებში, მაგრამ რამდენიმე მოთამაშისთვის ეს უდავოდ ბოლო ტურნირი იყო...

სად იყო მაყურებელი? 

არავის უარყვია ჭეშმარიტება, რომლის მიხედვითაც ფეხბურთს მაყურებლისთვის თამაშობენ. ამ ტურნირს კი მთელ რიგ შემთხვევებში სწორედ მაყურებელი აკლდა. ამას ერთადერთი ახსნა აქვს - ბილეთები ძვირი ღირდა და ხალხი, უბრალოდ, ვერ ახერხებდა მის შეძენას. ბრაზილიაში ხალხს ძალიან უყვარს ფეხბურთი, მაგრამ იქ შედარებით ცოტაა მდიდარი ხალხი. 

რატომ  ზღვარგადასული უხეშობა?

ზოგადად, სამხრეთამერიკული ფეხბურთისთვის უხეშობა ჩვეულებრივი ამბავია, მაგრამ ამ ტურნირზე მაინც ბევრი ზღვარგადასული უხეშობა ვიხილეთ. თამაში ძალიან ხშირად წყდებოდა და ამან მნიშვნელოვანი გავლენა მოახდინა ტურნირის სანახაობრივ მხარეზე.

სად არიან  ახალგაზრდები?

ძალიან ხშირად “კოპა ამერიკის” დასრულების შემდეგ საშუალება გვქონდა, ახალგაზრდა ტალანტებზე გველაპარაკა. ამჯერად ამას ნამდვილად ვერ გავაკეთებთ. სამწუხაროდ, არ შეგვიძლია, გავიხსენოთ ამ ტურნირზე მოთამაშე რომელიმე ახალგაზრდა ფეხბურთელი, რომელმაც, ასე თუ ისე, გაგვაკვირვა. 

ერთადერთი, კონკრეტულ სტატისტიკურ მაჩვენებელს თუ მოვეჭიდებით, არგენტინის ნაკრებში ჩატარებულ ოფიციალურ მატჩებში პირველი გოლი შეაგდო პაულო დიბალამ. ვნახოთ, ეს იქნებ არგენტინის ნაკრების ახალი ლიდერის დაბადების მანიშნებელიც გახდეს...

ველით ახალ  ბრაზილიას!

ლამის 100-პროცენტიანი ალბათობით შეგვიძლია დავწეროთ, რომ “კოპა ამერიკის” დასრულებულ გათამაშებაში ჩვენ წინაშე ამ სახით ბოლოჯერ წარსდგა ბრაზილიის ეროვნული ნაკრები. ადვილი სავარაუდოა, რომ მომავალ მუნდიალზე “სელესაოს” რამდენიმე ლიდერი აღარ ითამაშებს. ტიტე თანდათან აჩვევს ახალ ფეხბურთელებს ეროვნულ გუნდს.

ყატარში ვერავინ გაისეირნებს

ყატარის ეროვნულ ნაკრებს, რომელიც ტურნირზე სტუმრის სტატუსით იყო მიწვეული, ფურორი ნამდვილად არ მოუხდენია. აზიელი სტუმრები ჯგუფში ჩარჩნენ, მაგრამ მთელ რიგ შემთხვევებში შემტევი და გახსნილი ფეხბურთი უჩვენეს გულშემატკივარს. ორი აზრი არ არის - ყატარში გასამართავ მსოფლიოს ჩემპიონატზე მასპინძლები არავისთვის იქნებინ “საჩუქრები”, მით უმეტეს, თუ საგოლე მომენტების გამოყენებას ისწავლიან.

რა იქნება არგენტინაში?

მთელი არგენტინა იმ იმედით ცოცხლობს, რომ ქვეყნის უპირველესი გუნდი, ლიონელ მესისთან ერთად, მოახერხებს “კოპა ამერიკის” მოგებას. სადღეისოდ, პროგნოზის გაკეთება ძალიან რთულია. ვნახოთ, რა რეალობა იქნება მომავალ წელს. როგორ ფორმაში იქნება თავად მესი და ასე შემდეგ. არც ის უნდა დავივიწყოთ, რომ ტიტულს არანაკლები მონდომებით შეუტევენ სხვა ნაკრებებიც...
ამ მოლოდინში ვიყოთ მომავალ “კოპამდე”!..

ყოველდღიური სპორტული გაზეთი "ლელო"
508
მკითხველის კომენტარები / 0 /
მსგავსი ამბები
რუბრიკის სხვა სიახლეები
;