ოძეკის ტიტული - მიზანი მიღწეულია!

დასრულდა დრამატიზმით სავსე ზაფხულის ბაშო, რომელზეც ქართველმა სუმოისტმა უმთავრეს მიზანს მიაღწია, თუმცა იყო უფრო მეტის შანსიც, რომ არა ერთი დაცემა...

ტოჩინოშინმა იმავე ლევან გორგაძემ ბრწყინვალედ დაიწყო ბაშო - 12 დღიდან 12 მოგებით (მათ შორის დიდ ჩემპიონ ჰაკუჰოსთან), პირადი რეკორდით მიუახლოვდა მიზანს. 10 მოგება და 1 გამარჯვება მასზე დიდი რანგის სუმოისტთან, ეს მოთხოვნები შესრულებული იყო. ასე რომ, ტოჩინოშინს ოძეკის ტიტული უკვე განაღდებული ჰქონდა, მაგრამ მეტიც შესაძლებელი ჩანდა, კერძოდ კი იმპერატორის თასი...

მე-13 დღეს, როცა ტოჩინოშინს დოჰიოდან შოდაი გაჰყავდა, ის დაეცა და საკუთარი ტანით მაჯა დაიზიანა. მარცხს ტრავმა დაემატა, რის გამოც საბოლოოდ მიზანს ვერ მიაღწია, თუმცა დაშავებული ხელით ერთი ბრძოლა კიდევ მოიგო და ბაშო 13-2-ით დაასრულა.

ამით იგი კაკურიუს შემდეგ მეორე ადგილზე გავიდა და ვიცე-ჩემპიონობა (ჯუნ-იუშო) მიიღო. ამასთან, ლევანი ორი სპეციალური პრიზით დააჯილდოვეს, მას მებრძოლი სულის პრიზი და ტექნიკური რიკიშის პრიზები მისცეს.

ლევან გორგაძე კარიერაში მეოთხედ გახდა ვიცე-ჩემპიონი (იმპერატორის თასი ერთხელ აქვს მოგებული), მან კარიერაში მესამედ მიიღო ყველაზე ტექნიკური სუმოისტის პრიზი და კარიერაში მე-6-ედ მისცეს ყველაზე მებრძოლი სპორტსმენის ჯილდო.

იაპონიის სუმოს ასოციაციის მსაჯთა კომიტეტმა ოფიციალურად გასცა რეკომენდაცია - ტოჩინოშინი ჩემპიონის (ოძეკი) რანგს იმსახურებს. ახლა ამაზე მსჯელობა 30 მაისს გაიმართება, მაგრამ ყველაფერი უკვე გადაწყვეტილია, სუმოს საუკუნეების ისტორიაში ჯერ არ ყოფილა შემთხვევა, რომ ეს რეკომენდაცია არ შეესრულებინოთ.

საბოლოო მდგომარეობა
14-1: კაკურიუ (იოკოძუნა)
13-2: ტოჩინოშინი (სეკივაკე)
12-3: ჩიონოკუნი (მაეგაშირა 11)
11-4: ჰაკუჰო (იოკოძუნა)
10-5: ტაკაკეიშო (მ 10), კიოკუტაისეი (მ 15), მიოგირიუ (მ 16), ნიშიკიგი (მ 17).

ყოველდღიური სპორტული გაზეთი "ლელო"
6048
მკითხველის კომენტარები / 0 /
მსგავსი ამბები
რუბრიკის სხვა სიახლეები
;