პაატა გურასპაული: ასაკობრივმა ნაკრებებმა დასახული მიზნის მინიმუმიც ვერ შეასრულეს

საქართველოს კალათბურთის ფედერაციის პრეზიდენტ პაატა გურასპაულთან ინტერვიუს პირველი ნაწილი 28 აგვისტოს "ლელოში" დაიბეჭდა. მასთან ვილაპარაკეთ საქართველოს ნაკრების ახალ ნატურალიზებულზე და სექტემბერში გამართულ მსოფლიოს თასის საკვალიფიკაციო მატჩებზე.

ინტერვიუს მეორე ნაწილში კი შევეხეთ ახალგაზრდული ასაკის ნაკრებების წარუმატებელ გამოსვლას ზაფხულის მატჩებში. შეგახსენებთ, რომ 20-წლამდელები მეორე დივიზიონში მე-13 ადგილზე გავიდნენ, 18-წლამდელთა ნაკრები ამავე დივიზიონში - 21-ე იყო, ხოლო 16-წლამდელთა ნაკრებმა ევროპის თანატოლთა ჩემპიონატზე თამაშის მოგება ვერ მოახერხა.

პაატა გურასპაული: ზუროსის ამოცანაა ძლიერი ნაკრების ჩამოყალიბება ევრობასკეტი 2021-სთვის

ფაქტია, რომ რაღაცაა შესაცვლელი...

- ამ კითხვას ვერსად გავექცევით და არც უნდა გავექცეთ. არც არასოდეს ამირიდებია თავი მსგავსი შეკითხვებისთვის. როგორც 20-წლამდელებმა, ასევე 18-წლამდელებმა და 16-წლამდელებმა დასახული ამოცანა ვერ შეასრულეს. ახალგაზრდებს გოგა ბითაძესთან ერთად ევროპის ჩემპიონატის საგზურის მოპოვება შეეძლოთ, თუმცა გოგას გარეშეც არ იყო ცუდი გუნდი, მაგრამ ჯგუფიდან ვერ გავიდა. 18-წლამდელებსაც ჯგუფიდან გასვლას ვუსახავდით მიზნად, მაგრამ ვერც მათ მოახერხეს დადებითი შედეგის ჩვენება, ხოლო 16-წლამდელები ელიტარული დივიზიონიდან გამოვარდნენ.

- წარუმატებლობას ერთი კონკრეტული მიზეზი იშვიათად აქვს. თუ ესაუბრეთ ნაკრებების მწვრთნელებს და რა დასახელდა მიზეზად?

- რა თქმა უნდა, შევხვდი და გავეცანი მათ აზრებს, შეხედულებებს წარუმატებლობის მიზეზებთან დაკავშირებით. მითხრეს, რატომ მოხდა ეს ყველაფერი. ისიც ვიცი, რომ თითოეული ასაკობრივი ნაკრების მწვრთნელმა ყველა ღონე იხმარა მიზნის მისაღწევად, შრომა და ცოდნა-გამოცდილება არ დაუკლიათ, მაგრამ ფაქტს ვერსად გავექცევით...

სხვადასხვა მიზეზების შეჯერების შემდეგ შემიძლია აღვნიშნო, რომ მიდგომაა შესაცვლელი. თუმცა ეს სათუთი და შრომატევადი თემაა: უნდა ჩავეძიოთ მიზეზებს, გავაანალიზოთ რა მოხდა რატომ მოხდა და სწორედ ამის შემდეგ დავინახავთ, რა გზით ვიაროთ. დღევანდელი გამოცდილება გამოგვადგება საიმისოდ, რომ მომავალში იგივე აღარ განმეორდეს.

- საქართველოს ახლგაზრდული ასაკის ნაკრებების სისტემაში ეროვნული გუნდის მთავრი მწვრთნელი ილიას ზუროსიც ჩაერთვება?

- კალათბურთის ფედერაციის პრეზიდენტად მოსვლის დღიდან ვამბობდი, რომ უნდა არსებობდეს სანაკრებო ვერტიკალი, რომლის სათავეში ეროვნული გუნდის მთავარი მწვრთნელი იქნება. ამ სერიოზულ საკითხზე ველაპარაკეთ ილიას ზუროსს და 30 აგვისტოს, თბილისში ჩამოსავლის შემდეგ იგი საკუთარ მოსაზრებებს გაგვიზიარებს და ერთად ყველაფერს ისე დავგეგმავთ, რომ მომავალში აღარ განვიცადოთ ფიასკო და ვიაროთ პროგრესის გზით. ჩვენი მთავარი ამოცანა ის არის, რომ ახლო მომავალში სამივე ასაკობრივი ნაკრები ელიტარულ დივიზიონში, ევროპის ჩემპიონატზე თამაშობდეს.

- ნაკრებების მწვრთნელებით რამდენად კმაყოფილი ბრძანდებით?

- ყველა მწვრთნელს ერთი კითხვა დავუსვი - კალათბურთის ფედერაციამ მოსამზადებელ პერიოდში რამე ხომ არ დააკლო? პასუხი ასეთი იყო - რაც შეიძლებოდა, ფედერაციამ ყველაფერი გააკეთა. შეძლებისდაგვარად, რასაკვირველია. შეკრებები იქნებოდა თუ ტურნირები, ფედერაციამ თავისი შესაძლებლობებიდან გამომდინარე მაქსიმუმი გააკეთა.

რაც შეეხება ჩემს კმაყოფილებას თუ უკმაყოფილებას, ერთი ვიცი - ნაკრებების მწვრთნელები კალათბურთზე უზომოდ შეყვარებული ხალხია, პროფესიონალები არიან და, როგორც აღვნიშნე, ყველა ღონე იხმარეს წარმატებისთვის. თუმცა შედეგი ყველგან ერთია - წარუმატებელი. მინიმუმიც კი ვერ მივიღეთ თუმდაც ერთ ასაკში.

- იყო შემადგენლობასთან დაკავშირებული პრობლემებიც...

- 18 და 16-წლამდელთა ნაკრებებში საკადრო პრობლემა არ იყო, მწვრთნელებმა კანდიდატებიდან საუკეთესოები შეარჩიეს. ამას ვერ ვიტყვით 20-წლამდელთა ნაკრებზე, რომელსაც ორი კალათბურთელი აკლდა - გოგა ბითაძე და ლუკა ბულაშვილი.

გოგას აგენტმა ყველა ღონე იხმარა, რომ კალათბურთელი ახალგაზრდულ ნაკრებში არ ჩამოსულიყო. შეგვეძლო შედარებით მკაცრად მოგვეთხოვა და კონფრონტაციაში შევსულიყავით, მაგრამ ასე არ მოვიქეცით, იმიტომ, რომ ეს შეიძლება ძალიან ცუდად ასახულიყო თავად კალათბურთელზე. ჩვენი დიდი მცდელობის მიუხედავად სერბეთიდან კატეგორიული უარი მოვიდა. სწორედ გოგასთვის გაკეთდა, რომ უკიდურეს ზომებს აღარ მივმართეთ.

ბითაძე ძალიან ახალგაზრდა, პერსპექტიული მოთამაშეა, ნაციონალური საკალთბურთო ასოციაციისთვის ემზადება და ჩვენც ძალიან გვეიმედება - იგი ნაკრების ერთ-ერთი მთავარი კალათბურთელი უნდა გახდეს. სანაკრებო მატჩებში გოგამ უკვე დაგვანახა, რაც შეუძლია.

- რაც შეეხება ლუკა ბულაშვილს...

- ლუკა ილიას ზუროსის მიერ შედგენილ ეროვნული ნაკრების გაფართოებულ შემადგენლობაში მოხვდა. გუნდთან ერთადაც ვარჯიშობდა, თუმცა საბოლოო, 12-კაციან განაცხადში ვერ მოხვდა. ამის შემდეგ კი, მისი პირადი გადწყვეტილება იყო, რომ აღარ ეთამაშა 20-წლამდელთა ნაკრებში. ეს ჩემთვის მიუღებელი საქციელია.

ბულაშვილითან და ბითაძესთან ერთად 20-წლამდელებს შესაძლოა, სულ სხვაგვარად ეთამაშათ.

ყოველდღიური სპორტული გაზეთი "ლელო"
1524
მკითხველის კომენტარები / 2 /
რაჭველი
0
მიზეზი ერთია მწრთვნელების დაბალი კვალიფიკაცია ერთი და იგივე ხალხი ცოდვილობს ხმ ამბობენ უძაღლო
ქვეყანაში კატები ყეფავენ,ასეა ფეხბურთშიც სამწუხაროდ.
სანდრინიო10
0
პასუხისმგებლობა აიღეთ საკუთარ თავზე და ან მწვრთნელები გაუშვით ან გადადექი, კალათბურთი რომ უკან უკან მიდის ამას ყველა ხედავს, როგორ შეიძლება ამ შედეგების მერე მწვრთნელების კალათბურთის სიყვარულზე ლაპარაკობდე. ჭაობშია ქართული კალათბურთი. ლიპარტელიანის ჭაობში !!!
მსგავსი ამბები
რუბრიკის სხვა სიახლეები
;