პაატა გურასპაული: ვიცი, რომ ზუროსს აქვს სურვილი ოჯახთან ერთად საქართველოში საცხოვრებლად ჩამოვიდეს

დღეს, ჩვენი გაზეთის სტუმარია კალათბურთის ფედერაციის პრეზიდენტობის კანდიდატი პაატა გურასპაული. მას, პირველ რიგში, საკუთარი თავის წარმოდგენა ვთხოვეთ.

- საკალთბურთო სამყაროს წარმოვადგენ, უფრო ზუსტად რომ ვთქვა, კალათბურთი ჩემი ცხოვრებაა. არ მახსენდება დღე, კალათბურთის გარეშე მეცხოვროს. 54 წლისა ვარ, მყავს მეუღლე, ორი შვილი და ორიც შვილიშვილი. ჩემი სამეგობრო წრის უდიდესი ნაწილი საკალათბურთო სამყაროს წარმომადგენელია. ვთამაშობდი საბჭოთა კავშირის ახალგაზრდულ ნაკრებში, საქართველოს ეროვნულ ნაკრებში...

- კალათბურთის ფედერაციის საპრეზიდენტო არჩევნებში მონაწილეობა რატომ გადაწყვიტეთ?
- წინა არჩევნების დროს იყო ლაპარაკი კანდიდატურის წამოყენებაზე, მაგრამ მაშინ უარი ვთქვი. ამჯერად კი ვფიქრობ, რომ დადგა დრო ამ სფეროში ჩემი ცოდნა, კავშირები, როგორც საქართველოში, ისე მის ფარგლებს გარეთ კალათბურთს მოვახმარო, განვახორციელო ბევრი სასიკეთო პროექტი...

- კონკურენტები ხშირად ოპონირებენ, რომ ფედერაციის კანდიდატი ხართ...
- ამ თემაზე აქამდეც მკითხეს და წერტილი უკვე დავუსვი. მყავს მეგობრები კალათბურთის ფედერაციაში, ისევე, როგორც მთელ საკალათბურთო სამყაროში. ვთანამშრომლობ და მომავალშიც აუცილებლად ვითანამშრომლებ ყველასთან, ვისაც ქართული კალათბურთისთვის კარგი უნდა და აქვს სურვილი გვერდში დაგვიდგეს. ჩვენ ერთ ოჯახს წარმოვადგენთ. ნებისმიერ არჩევნებს ახლავს აზრთა სხვადასხვაობა, თუმცა მოვუწოდებ კონკურენტებს, ჩემს მეგობრებს თანამშრომლობისკენ.

თუ კალათბურთის ფედერაციის პრეზიდენტად ამირჩიეს, ჩემი კარი ყველასთვის ღია იქნება, ხოლო თუ დავმარცხდი, არსად წასვლას არ ვაპირებ, კალათბურთში ვარ და კალათბურთში დავრჩები. როგორც ერთ, ასევე მეორე შემთხვევაში მთელს ენერგიას მოვახმარ კალათბურთს.

- კალათბურთის ფედერაციის მუშაობით რამდენად კმაყოფილი ბრძანდებით?
- ქუჩაში რომ გავაჩეროთ ადამიანი, რომელსაც ოდნავ მაინც აინტერესებს სპორტი და ვთხოვოთ საქართველოში სპორტის წარმატებული სახეობების ჩამოთვლა. რა თქმა უნდა, კალათბურთსაც დაასახელებს. მისი სახეა საქართველოს ნაკრები, რომლის წარმატება ამ, მართლაცდა ნიჭიერი თაობის დამსახურებაა, თუმცა არ უნდა დაგვავიწყდეს, რომ სწორი მუშაობით, სწორი დაგეგმარებით, მწვრთნელების კომპეტენტური შერჩევით კალათბურთის ფედერაციას დიდი წვლილი მიუძღვის ბოლოდროინდელ წარმატებებში.

თუმცა შორს ვარ იმ აზრისგან, რომ შეცდომა არ ყოფილა. კალათბურთის ფედერაციის პრეზიდენტად მოსვლის შემთხვევაში დეტალურად შევისწავლი ყველა პროექტს, რომელიც მომავალზეა გათვლილი და წარმატებას მოგვიტანს - კვლავ განვაგრძობთ, ზოგიერთ პროექტში შეიძლება შესწორება შევიტანოთ, ხოლო თუ ისეთი იქნება, რომელიც რაღაცა კუთხით სარგებელს არ მოუტანს კალათბურთს, აღარ განვაგრძობთ.

- რამდენად სასარგებლოდ მიგაჩნიათ "ბასკონიასთან" გაფორმებული ხელშეკრულება?
- მაქვს ჩემი შეხედულება, მაგრამ რადგან კარგად არ ვიცნობ კონტრაქტის დეტალებს, ამიტომ მის ავკარგიანობაზე დღეს ვერ ვილაპარაკებ. როგორც ვიცი, სამართლებრივი კუთხით ყველაფერი წესრიგშია, რადგან უკვე გაიარა რამდენიმე ინსტანცია... ფედერაციის პრეზიდენტად არჩევის შემთხვევაში, ისევე, როგორც სხვა პროექტებს, ამასაც სიღრმისეულად შევისწავლი.

- ქართულ რეალობაში იყო შემთხვევები ფედერაციის ხელმძღვანელობის შეცვლის შემდეგ შეიცვალა ნაკრების მთავარი მწვრთნელიც. საინტერესოა თქვენი მოსაზრება ილიას ზუროსთან დაკავშირებით.
- პირადად ჩემთვის არ უთქვამს, მაგრამ ვიცი, რომ ილიას ზუროსს აქვს სურვილი ოჯახთან ერთად საქართველოში საცხოვრებლად ჩამოვიდეს და აქ იმუშაოს. მის მაღალ კვალიფიკაციაში, ალბათ, ეჭვს ვერავინ შეიტანს. ძლიერი სპეციალისტია, საქართველომდე ხომ საბერძნეთის ნაკრებსაც ხელმძღვანელობდა. მსოფლიოს ჩემპიონატის საკვალიფიკაციო ეტაპზეც გამოჩნდა, რომ კრიტიკულ მომენტში ბევრი სწორი გადაწყვეტილების მიღება შეუძლია. ამასთან, ყოველ მატჩში შეუძლია მეტოქისთვის სურპრიზების შეთავაზება.

თუმცა თავს ზემოთ ძალა არაა, საქართველოს ნაკრებმა სერბეთსა და გერმანიაში მაქსიმუმი გააკეთა, სამწუხაროდ, ორივე მატჩში დავმარცხდით. თუ ილიას ზუროსის სურვილი იქნება, ფედერაციამ ყველანაირად უნდა შეუწყოს ხელი, რომ ჩამოვიდეს და ადგილზე დააკვირდეს სანაკრებო კანდიდატებს, მიადევნოს თვალი ახალგაზრდების პროგრესს და სწორედ ილიას ზუროსის მეთვალყურეობით მოექცეს ყველა ასაკობრივი ნაკრები ვერტიკალში, რომ ეროვნულ გუნდში კალათბურთელი ყოველმხრივ მომზადებული მივიდეს.

- როგორც ნაკრების ყოფილი მოთამაშე, როგორ აფასებთ ჩვენი გუნდის გამოსვლას მსოფლიოს ჩემპიონატის საკვალიფიკაციო ეტაპის საწყის ორ მატჩში?
- შემადგენლობებს თუ გადავხედავთ, დღევანდელი გუნდით სერბეთში გამარჯვების ილუზია არ უნდა გვქონოდა, თუმცა პირველი ტაიმის შემდეგ მცირე იმედი მაინც გაჩნდა, ძალიან დაგვხმარა მაიკლ დიქსონი, რომელიც ბოლო პერიოდში დაიღალა...

გერმანიასთან მართლაც შეიძლებოდა სასურველი შედეგის დაფიქსირება. ამ ეტაპზე ჩვენი მიზანი არა ჯგუფიდან გამსვლელ სამ გუნდს შორის მოხვედრა, არამედ შემდეგი ეტაპისთვის სასურველი ქულათა მარაგით გასვლაა. ავსტრიას უნდა ვაჯობოთ და, ვფიქრობ, თბილისში გერმანიის 10 და მეტი ქულით დამარცხებაც რეალურია.

- არჩევნების წინ რას ჰპირდებით ქართულ საკალათბურთო საზოგადოებას?
- ვიცხოვრებ ისე, როგორც აქამდე ვცხოვრობდი - კალათბურთით. დღე-ღამეს გავასწორებ, ყურადღებას არ მოვადუნებ, რომ საპრეზიდენტო ვადის ამოწურვის შემდეგ ვალმოხდილი ვიყო, შეიძლება ყველა დაპირება ბოლომდე ვერ მივიყვანო, მაგრამ მართალი ვიყო, ვთქვა, რომ ენერგია არ დამიზოგავს საქმის გასაკეთებლად.

კალათბურთის ვალი მაქვს, იმიტომ, რომ სპორტის ამ სახეობამ ჩემი ცხოვრება დღესასწულად აქცია. ბედნიერი ვიქნები, თუ ამ ვალს თუნდაც ნაწილობრივ დავაბრუნებ.

ყოველდღიური სპორტული გაზეთი "ლელო"
2115
მკითხველის კომენტარები / 1 /
სოსო
0
არ ვიცი როგორი სპეციალისტია პაატა გურასპაული,ვიც რომ თავის დროზე კარგი კალათბურთელი იყო და გულიც შესტკივა ქართულ კალათბურთზეასე რომ ნებისმიერ რანგში წარმატებებს ვუსურვებ მას.რაც შეეხება ზუროსს,შესანიშნავი ამბავია და თუ განხორციელდა ,მილტონ ჰეიგის მსგავსი პროგრესი შეიძლება განახორციელოს,მას ხომ საქართველოსათვის უნიკალური ცოდნა აქვს კალათბურთში.თუ ზუროსი ყველა ნაკრების კურირებას მოახდენს და ყველა მათგანთან იმუშავებს ერთი საერთო,განვითარების გრძელვადიანი პროგრამით,ქართულ კალათბურთს ძალიან მალე შეეტყობა სასიკეთო ძვრები,მით უმეტესი,რომ კალათბურთს გაცილებით უკეთესი სასტარტო პირობები აქვს, ვიდრე თავის დროზე რაგბის ჰქონდა.
zaza
0
ჩემი აზრით კალათბურთის ფედერაციას ფულიანი ბიძა და ერთი გია ნიჟარაძე უნდა დანარჩენი ყველაფერი ფუჭი დაპირებებია ასე ამბობდა ჩოგოვაძეც რო ხდებოდა ფედერაციის პრეზიდენტი ფულს მოვიზიდაო ბიზნესიდანო რეგიონებში მივხედავ ბავშვთა კალათბურთსო მარა მერე დაავიწყდა თავის დაპირებები როგორც ხშირად ხდება ხოლმე ჩვენში.საქმის მკეთებელი კაცი ჭირდება კალათბურთს დღეს და ფულის მომტანი და არა ფუნქციონერი დირექტორი ეგარი რეალობა. ბავშვთა კალათბურთი და რეგიონებში აკადემიები აი ესარი დღეს მთავარი გამოწვევა აღარაფერს ვამბობ კლუბების ევროთასებზე თამაშზე.
15:48 2017.12.06
მსგავსი ამბები
რუბრიკის სხვა სიახლეები
;