პაატა გურასპაული: ილიას ზუროსს კონტრაქტს სექტემბერში გავუფორმებთ 

გუშინ შემოგთავაზეთ ინტერვიუ კალათბურთის ფედერაციის პრეზიდენტ პაატა გურასპაულთან, რომელშიც იგი მსჯელობდა იმ ნაბიჯებზე, რაც ფედერაციამ გადადგა ევრობასკეტი 2021-ის მიღებისთვის.

თუმცა მასთან სხვა თემებზეც ვილაპარაკეთ - ახლადდასრულებულ 20-წლამდელთა „ბ“ დივიზიონზე, ევრობასკეტის შესარჩევის წილისყრაზე, ეროვნული გუნდის მთავარ მწვრთნელზე - ილიას ზუროსს ხომ ახალი კონტრაქტი ჯერ არ გაუფორმებია...

წილისყრა

- ევროპის ჩემპიონატის ერთი ჯგუფი თბილისში გაიმართება. შესაბამისად, საქართველოს ნაკრებს ევრობასკეტი 2021-ზე მოხვედრა გარანტირებული აქვს, თუმცა ფიბა-ევროპამ გადაწყვიტა, რომ ოთხივე მასპინძელი შესარჩევ ტურნირში ითამაშებს. ცხადია, მათ მიერ ნაჩვენები შედეგები სხვა გუნდების გასვლა-არგასვლაზე არ იმოქმედებს. თითო ჯგუფიდან გავა სამი და ევრობასკეტის მასპინძლების ჯგუფებიდან - ჩვენ გარდა კიდევ ორი. საბოლოოდ მივიღებთ 24 გუნდს, რომლებმაც ევროპის 2021 წლის ჩემპიონატზე უნდა ითამაშონ.

მივესალმები მასპინძლების შესარჩევში ჩართვის იდეას. ეს საშუალებას მოგვცემს ნაკრები რიტმში იყოს, ხოლო მწვრთნელ ილიას ზუროსს შესაძლებლობა ექნება, თამამი ექსპერიმენტები ჩაატაროს, ბევრი კანდიდატი გამოსცადოს და გუნდი კარგად მოამზადოს ევრობასკეტისთვის. 

მეტოქეები

- ორი მოწინააღმდეგე ცნობილია - სერბეთი და ფინეთი. ერთის ვინაობა წინასწარი საკვალიფიკაციო ეტაპის დასრულების შემდეგ გაირკვევა. ეს იქნება ან ისლანდია, ან პორტუგალია, ანაც შვეიცარია. წინასწარ ვერავინ იტყვის, რომელი გავა ჯგუფიდან, თუმცა ჩვენ სავარაუდო მეტოქეებზე წარმოდგენა გვაქვს: ისლანდიასთან გვითამაშია და ახლა რა გუნდიცაა, ისიც ვიცით, რამდენიმე წლის წინ პორტუგალიასთანაც ვითამაშეთ, შვეიცარიას ნაკლებად ვიცნობთ, მაგრამ ვიცით, რომ საშუალო დონის გუნდია. 

რაც შეეხება ფინეთის ნაკრებს, კარგი კალათბურთელები ჰყავს და შესარჩევ ეტაპზე სრული შემადგენლობით იასპარეზებს. სერბეთს რაც შეეხება, იმ დონის საკალათბურთო ქვეყანაა, მესამე ნაკრებიც რომ ჩამოიყვანოს, ისიც ძალიან ძლიერი იქნება. სერბეთი ხომ მეორე ნაკრებია მსოფლიოში.

ევროლიგა

- ევრობასკეტის შესარჩევ ეტაპზე, სავარაუდოდ, არ გვეყოლება ევროლიგის და NBA-ის წარმომადგენლები. ნაციონალური საკალათბურთო ასოციაციიდან მოთამაშის ნოემბერში ან თებერვალში გამოშვება წარმოუდგენელია, რაც შეეხება ევროლიგას, მიზერული შანსი არის, რომ შეთანხმება შედგეს. სხვათა შორის, ფიბა-ევროპის იურიდიული კომიტეტის, რომლის პრეზიდენტია გიორგი ქართველიშვილი, ერთ-ერთი მთავარი მიზანია ევროლიგასთან ურთიერთობის დარეგულირება...

ილიას ზუროსი
- საქართველოს ნაკრების მწვრთნელი, ილიას ზუროსი ივლისის ბოლოს თბილისში კემპს გამართავს, სადაც ნაკრების ძირითად ბირთვთან ერთად დაძახებულია ყველა კანდიდატი, რომლებმაც ეროვნული გუნდის ღირსება ახლო მომავალში უნდა დაიცვან. ჩვენს მწვრთნელთან ერთად დავსხდებით და დავგეგმავთ მოსამზადებელ პროცესს, ოფიციალური მატჩების პარალელურად ნაკრებს საკონტროლო მატჩები და ტურნირები აუცილებლად დასჭირდება.
2021 წლის თებერვალში საბოლოოდ გაირკვევა ევრობასკეტის მონაწილეთა ვინაობა. მას შემდეგ ილიას ზუროსთან ერთად უფრო კონკრეტულ გეგმას შევადგენთ, როგორ უნდა მოვემზადოთ ევრობასკეტისთვის.

კონტრაქტი

- ილიას ზუროსს კონტრაქტი მსოფლიოს თასის ბოლომდე ჰქონდა, რომელიც სექტემბერში დასრულდება. ბერძენ სპეციალისტთან გვაქვს სიტყვიერი შეთანხმება, რომ ახალ ხელშეკრულებას სექტემბერშივე გავაფორმებთ და იგი საქართველოს ნაკრებში ევრობასკეტი 2021-ის დასრულებამდე იმუშავებს.
ილიას ზუროსი ბერძნული „პერისტერის“ მწვრთნელადაც დაინიშნა. არ ვეთანხმები მოსაზრებას, რომ იგი ორ სამუშაოს სრულყოფილად ვერ შეასრულებს. როდესაც კლუბიდან წინადადება მიიღო, გვკითხა აზრი. თან გვითხრა, რომ საქართველოს ნაკრებს „პერისტერის“ გამო ყურადღება წამითაც არ მოაკლდებოდა. ჩვენი მხრივ, ვფიქრობთ, რომ ნებისმიერ მწვრთნელს სჭირდება მუდმივი სათამაშო პრაქტიკა და კლუბში მას ეს ექნება.

20-წლამდელები

- ისეთი კარგი სტარტის შემდეგ, როგორიც ახალგაზრდულ ნაკრებს ჰქონდა, გულდასაწყვეტია, რომ მიზანს ვერ მიაღწია. ჩვენი მიზანი იყო ევროპის ჩემპიონატზე გამსვლელ სამ გუნდს შორის მოხვედრა. როგორც ჩანს, მეოთხედფინალში, პორტუგალიასთან დაძაბულ ბრძოლაში წაგება ბიჭებმა მტკივნეულად გადაიტანეს და შემდეგ კიდევ ორი მატჩი ვერ მოიგეს.

ვფიქრობ, შედეგი არადამაკმაყოფილებელია, მაგრამ მოგებული თამაშებიც და პორტუგალიასთან მატჩიც გვაძლევს იმის თქმის საფუძველს, რომ ეს თაობა მიაღწევს იმ შედეგს, რაც ქართულ კალათბურთს სჭირდება.

- მილოშ გლიგორიევიჩი
ვფიქრობ, რომ 20-წლამდელთა მწვრთნელად მილოშ გლიგორიევიჩის დანიშვნა მართებული იყო. ეს იმ ხაზის გაგრძელებაა, რომელზეც ილიას ზუროსთან ერთად ვლაპარაკობდით - საქართველოს ეროვნული გუნდის ასისტენტები ახალაზრდული გუნდების მთავარი მწვრთნელები უნდა იყვნენ.

ყოველდღიური სპორტული გაზეთი "ლელო"
493
მკითხველის კომენტარები / 0 /
მსგავსი ამბები
რუბრიკის სხვა სიახლეები
;