პაატა გურასპაული: რამდენიმე ვარიანტიდან დარჩა ერთი არენა, სადაც ევრობასკეტი 2021-ს ვუმასპინძლებთ

საქართველოს კალათბურთის ფედერაციის პრეზიდენტი პაატა გურასპაული მასმედიის წარმომადგენლებს Holiday Inn-ში შეხვდა. მან ყველა აქტუალურ შეკითხვას უპასუხა. პირველი, რა თქმა უნდა, დარბაზთან დაკავშირებული კითხვა იყო. მოგეხსენებათ, არენა, რომელმაც ევრობასკეტი 2021-ის ერთ ჯგუფს უნდა უმასპინძლოს, მზად 2021 წლის ზაფხულში უნდა იყოს. მანამდე წელიწადნახევარია დარჩენილი...

მოვუსმინოთ პაატა გურასპაულს:

- ყველამ კარგად ვიცით, რომ სულ უფრო ცოტა დრო რჩება, რომ ევრობასკეტი 2021-ს ყოველმხრივ მომზადებულები შევხვდეთ. ფედერაცია საამისოდ ყველაფერს აკეთებს. სახელმწიფოც ბოლომდეა ჩართული და მზადაა გაკეთდეს ყველაფერი ევრობასკეტის ღირსეულად სამასპინძლოდ.

დარბაზთან დაკავშირებით გვქონდა რამდენიმე ვარიანტი: ერთი იყო დიღმის ჭალებში ახალი არენის აგება. ეს ვერ მოხერხდება. განვიხილავდით ძველი სპორტის სასახლის რეკონსტრუქციას და გათანამედროვებას. ტექნიკურად ეს შეუძლებელი აღმოჩნდა - ტევადობა იმდენით ვერ გაიზრდება, რომ ფიბა-ს მოთხოვნები დააკმაყოფილოს.

მესამე ვარიანტი უნივერსიტეტის მაღლივ კორპუსთან მდებარე ოლიმპიური სასახლის ძირეულად გადაკეთება იყო. საბოლოოდ სწორედ ამაზე შევჩერდით. სადღეისოდ მის დიდ დარბაზში 2.5 ათასი მაყურებელი ეტევა. ევრობასკეტისთვის კი სერიოზულ ტრანსფორმაციას განიცდის და 10.5 ათას კაცზე იქნება გათვლილი. სამუშაოები იანვრიდან დაიწყება.

თავიდან ქვეყნის მთავრობა დაგვპირდა, რომ ევრობასკეტისთვის ახალი დარბაზი აშენდებოდა. ცხადია, ჩემპიონატისთვის სამზადისში ნებისმიერი ცვლილება ფიბასთანაა შესათანხმებელი...

- დარბაზთან დაკავშირებით ყოველგვარი სიახლე, ვინც საჭიროა, ყველამ იცის. ფიბა-ს წარმომადგენლებიც იყვნენ ჩამოსულები და პროექტიც ნანახი აქვთ. მათთვის მთავარია ქვეყანაში იყოს თანამედროვე დარბაზი, რომელიც ფიბას სტანდარტებს დააკმაყოფილებს. ახალი არენა, რომელსაც ოლიმპიური სასახლის დარბაზის ტრანსფორმაციის შედეგად მივიღებთ, უმაღლესი სტანდარტისა იქნება. აქ არც ფართობის ნაკლებობის პრობლემა დადგება, არენის გარშემო საკმარისადაა ადგილი დარბაზის გასაფართოვებლად და პარკინგის მოსაწყობად, რომლის მშენებლობაც ტერასებად იგეგმება.

კიდევ ერთი საკითხი, რომელიც აქტუალურობას ოლიმპიურ სასახლეში "სატრანსფორმაციო" სამუშაოების დაწყების შემდეგ შეიძენს - სად გაგრძელდება სუპერლიგა, სად გაიმართება "ა" ლიგა და ასაკობრივი ჩემპიონატები?

- ერთი ვარიანტი ძველი სპორტის სასახლეა, რომელიც სუპერლიგას რამდენიმე წლის წინ მასპინძლობდა. მშვენიერი ადგილია ვერის ბაღის დარბაზი, რომლის კალათბურთის ფედერაციისთვის გადმოცემა გადაწყვეტილია. იმედი გვაქვს, ეს მნიშვნელოვანი მოვლენა და საკალათბურო მატჩების ვერაზე გადატანა ერთმანეთს დაემთხვევა. ვერის ბაღის დარბაზი ხომ ქართული საკალათბურთო მექაა, სადაც უთამაშიათ ჩვენი კალათბურთის ლეგენდებსა და უამრავი თაობა აღზრდილა. ეს არის ქართული კალათბურთის სახლი.

კალათბურთის ფედერაციის ჟურნალისტებთან შეხვედრის სრულ ვერსიას მალე შემოგთავაზებთ.

3037
მკითხველის კომენტარები / 0 /
მსგავსი ამბები
რუბრიკის სხვა სიახლეები
;