პაატა შალამბერიძე: ლეგიონერთა რაოდენობის ზრდა გამორიცხული არ არის

დიდი ალბათობით, ახალი სეზონიდან "სამტრედია" განახლებული შემადგენლობით ითამაშებს. გუნდში მიმდინარე ცვლილებებზე კლუბის მმართველი დირექტორი პაატა შალამბერიძე გველაპარაკა:

"ჯერ სიახლებზე სრულად ლაპარაკი ნაადრევია, რადგან სეზონი ახალი დასრულებულია და ფეხბურთელების კონტრაქტებს ვადა არ გასვლია. თუმცა, შემიძლია ვთქვა, რომ რამდენიმე მოთამაშემ უკვე დაგვტოვა. დათო ჯიქიას ამბავი ცნობილია.

მასთან ერთად, გუნდს ბაკარ ბალდეც დატოვებს, რომელმაც თავისი საქმე გააკეთა, მაგრამ უკეთეს ვარიანტზე ვფიქრობთ", - ამბობს შალამბერიძე და იქვე ახალწვეულების ვინაობასაც გვიმხელს:

"მართალია, ჯერ კონტრაქტი არ გაგვიფორმებია, მაგრამ რამდენიმე მოთამაშეს მისი გახანგრძლივება შევთავაზეთ - მიგინეიშვილს, მჭედლიშვილს, რაჟამაშვილს, მანჯგალაძესა და საბანაძეს, უახლოეს დღეებში სხვებსაც დაველაპარაკებით.

სიახლე ის არის, შევთანხმდით გიორგი ერისთავთან და ის ჩვენთან ითამაშებს. დავაბრუნეთ შოთა კერძევაძეც. ორივე სამტრედიელია და მათი გვეიმედება. საერთოდ, მაქსიმალურად გვსურს სამტრედიელების მოზიდვა. საინტერესო ახალგაზრდებიც მოდიან და მათ ყურადღება უნდა მივაქციოთ. ლეგიონერებიდან დარჩება მაიკლ ოლაიტანი, რომელიც კარგი ფეხბურთელი და პიროვნებაა.

მასთან კონტრაქტი 2018 წლის ბოლომდე გვაქვს. გუნდს დიდი სამსახური გაუწია ინტერს გიიმაც, რომელსაც ხელშეკრულების ვადა ივნისში უმთავრდება, მაგრამ მასთანაც თანამშრომლობის გაგრძელება გადავწყვიტეთ. კონტრაქტი მალე უმთავრდება გაბონის ნაკრების წევრ ანრი ნდონგსაც და შესაძლოა, მასაც ახალი ხელშეკრულება შევთავაზოთ. არ არის გამორიცხული, უცხოელების რაოდენობა კიდევ გაიზარდოს".

ბოლოს, შალამბერიძე სამტრედიელთა ყოფილი მწვრთნელის, გია ცეცაძის ახალგაზრდულ ნაკრებში დანიშვნასაც გამოეხმაურა: "ამ ამბავმა ძალიან გაგვახარა. მან ძალიან კარგად იმუშავა "სამტრედიაში". გია არა მხოლოდ ძლიერი სპეციალისტი, არამედ სამაგალითო პიროვნებაცაა. დარწმუნებული ვარ, შესწევს ძალა, რომ ახალგაზრდული ნაკრები უკეთეს დონეზე აიყვანოს".

ყოველდღიური სპორტული გაზეთი "ლელო"
1978
მკითხველის კომენტარები / 0 /
მსგავსი ამბები
რუბრიკის სხვა სიახლეები
;