პარიზის გრანდსლემზე წილი ჰყარეს: რომელ ქართველს რა შანსი აქვს?

8 თებერვალს პარიზში სეზონის მეორე სოლიდური შეჯიბრება -"დიდი მუზარადი" იწყება, რომელშიც 117 ქვეყნის 688 სპორტსმენი გამოდის - 411 ვაჟთა, 277 კი ქალთა ტურნირში. მათ შორის საქართველოს 17 წარმომადგენელიცაა - 12 ვაჟი და 5 - ქალი. დღეს გამართული წილისყრით გაირკვნენ მათი მეტოქეები.

[VIDEO პარიზიდან] ვარლამ ლიპარტელიანი: ...რომ საქართველოს ჰიმნი ავაჟღეროთ

66 კგ
60 კილოგრამი ვაჟთა ტურნირის ერთადერთი წონაა, სადაც მონაწილე არა გვყავს, დანარჩენებში კი 2-2 მონაწილით გამოვდივართ.

66 კილოგრამში თორნიკე ნაგლიაშვილი ტურნირში მეორე წრიდან ჩაებმება, სადაც ჰაიტელ ხერარდ კადეტს შეხვდება. ბექა წიფიანი პირველივე წრეში იჭიდავებს - ინდოელ იასლეენ სინგჰ საინის დაეჭიდება, ვინც შარშან თბილისის "დიდ პრიზზე" მეხუთე იყო.

73 კგ.
ჩვენებიდან თუ ვინმეს არ გაუმართლა, ალბათ, მათ შორის ერთ-ერთი პირველი საქართველოს ვიცე-ჩემპიონ თორნიკე გვიჭიანია, ვინც პირველ წრეში თავისუფალი კი არის, მაგრამ მეორეში იაპონელთა სამგზის მსოფლიოს ჩემპიონსა და ოლიმპიადის ორგზის ბრინჯაოს პრიზიორ მასაში ებინუმას ხვდება.

ალეკო მამიაშვილიც მეორე წრიდან ჩაებმება შეჯიბრებაში, თუმცა მას ბევრად სუსტი მეტოქე ჰყავს მაროკოელი აჰმედ ელ მეზიატი. სამაგიეროდ, მომდევნო ეტაპზე სავარაუდო მეტოქეთა შორის ჰყავს ჩვენი ტურნირის შარშანდელი ფრანგი გამარჯვებული გიიომ ჩაინე.

81 კგ.
წილისყრამ დიდად არც საქართველოს მოქმედ ჩემპიონ გიორგი კაციაშვილს გაუმართლა. შეჯიბრებაში ისიც მეორე წრიდან ჩაებმება, მაგრამ ჯერ იქ ჰყავს მეტოქედ არცთუ სასურველი კორეელი მოონ ჯინ ლეე, ამათში მოგებული კი შემდეგ ეტაპზე, დიდი ალბათობით, იაპონელთა მსოფლიოს ვიცე-ჩემპიონ სოტარო ფუჯივარას შეხვდება - ყოველ შემთხვევაში, მანამდე ის ტაივანელ მასაიუკი ტერადასთან შეხვედრაში აშკარა ფავორიტია.

ამავე ჯგუფშია კანადელთა მსოფლიოს ფინალისტი და ოლიმპიადის ბრინჯაოს მედალოსანი ანტოინ ვალუა-ფორტიეც.

ვლადიმერ ახალკაციც მეორე წრეში ჩაატარებს პირველ პაექრობას - ფრანგ იბრაჰიმ კეიტასთან. ამავე ჯგუფში არიან ჰოლანდიელი ფრანკ დე ვიტი, პორტუგალიელთა ანრი ეგუტიძეც და თურქთა ექს-ქართველი მსოფლიოს მესამე პრიზიორი ვედატ ალბაირაქიც. ამათგან ახალკაცთან ყველაზე ახლოს ჰოლანდიელია, ვისაც საუკეთესო შემთხვევაში მერვედფინალში შეხვდება, სხვებთან კი მისი გზა მეოთხედფინალში თუ გადაიკვეთება.

90 კგ.
წილისყრამ არც გიორგი პაპუნაშვილი დაინდო - პირველივე წრეში მეტოქედ ჩვენთვის კარგად ცნობილი იაპონელი სანშირო მურაო არგუნა. ამათში გამარჯვებულს კი მეორე ეტაპზე სავარაუდო მეტოქეთა შორის ანგარიშგასაწევი მონღოლი ალტანბაგანა განტულგა ჰყავს.

ავთანდილ ჭრიკიშვილი ჯგუფში ჰოლანდიელთა მოქმედ მსოფლიოს ჩემპიონ ნოელ ვან ტ ენდთან მოხვდა, თუმცა მას მხოლოდ მეოთხედფინალში თუ შეხვდება, მანამდე კი ჩვენი მსოფლიოს ჩემპიონი პირველ წრეში გაბონელ პაულ კიბიკაისთან დაეჭიდება. მოგების შემთხვევაში ჭრიკიშვილს ბევრად ძლიერი კონკურენტი ეყოლება - ყაზახ ისლამ ბოზბაევსა და აზერბაიჯანელ რუფატ ისმაილოვს შორის გამარჯვებული.

მეოთხედფინალის გზაზე სავარაუდო მეტოქეთა შორის აღსანიშნავია ალჟირელი აბდელრაჰმან ბენამადი, თუმცა არც ამერიკელი კოლტონ ბრაუნია დასავიწყებელი.

100 კგ.
გამართლებულს ვერც ვალერი ლიპარტელიანის წილისყრას დავარქმევთ, რადგან მასთან ჯგუფში იაპონელი კენტარო იიდა მოხვდა. შეღავათი მხოლოდ ისაა, რომ მათი გზები მეოთხედფინალამდე არ იკვეთება. ისე კი ლიპარტელიანს მასთან მკვეთრად უარყოფითი ბალანსი აქვს - კარიერის სამივე შეხვედრა წააგო.

თუმცა ჩვენებურს იოლი გასეირნება არც პირველ შეხვედრაში ელოდება (ის პირველ წრეში ისვენებს), სადაც ინდოელ ავტარ სინგჰსა და კორეელ ჯაე იუნ კიმს შორის უძლიერესს შეხვდება. კორეელის გარდა, ჯგუფის ამ მხარეს ისეთი არავინაა, ლიპარტელიანი მეოთხედფინალამდე რომ შეაჩეროს.

ონისე სანებლიძეს თავიდან ნამდვილად გაუმართლა - პირველ წრეში პაკისტანელ შაჰ ჰუსაინ შაჰს ხვდება, ამათში გამარჯვებული კი შემდეგ ბულგარელი დანიელ დიჩევისა და ბელარუსი მიკიტა სვირიდის წყვილიდან უძლიერესს შეხვდება. ბადის ამ ნახევრიდან გასული მერვედფინალში რუსი ყაზბეგ ზანკიშიევის, გერმანელი ფილიპ გალანდისა და ებრაელი პეტერ პალჩიკის ტრიოდან უმჯობესს დაეჭიდება. ამავე ჯგუფში, ოღონდ ქვედა მხარეს არიან იაპონელთა მსოფლიოს ჩემპიონი რიუნოსუკე ჰაგა და აზერბაიჯანელთა მსოფლიოს მედალოსანი ელმარ გასიმოვი, ოღონდ სანებლიძე მათ მეოთხედფინალამდე ვერ შეხვდება.

+100 კგ.
თამამად შეიძლება ითქვას, რომ ჩვენებიდან ყველაზე მეტად ლევან მატიაშვილს არ გაუმართლა, რადგან ჯგუფში ლეგენდარულ ფრანგ ტედი რინერსა და იაპონელ კოკორო კაგეურასთან მოხვდა!

მატიაშვილი მათ მეოთხედფინალამდე არ ხვდება, თუმცა იქამდე მისასვლელადაც ძნელი ბარიერი უნდა გადალახოს. ის პირველ წრეში ისვენებს, მეორეში კი, წესით, უპრობლემოდ უნდა აჯობოს უზბეკ ალიშერ იუსუპოვს. აი, ამათში მოგებულს კი მესამე წრეში ძნელი ბრძოლა ელოდება, რადგან იქ რუსი ინალ ტასოევის, უკრაინელი იაკივ ხამოსა და ყირგიზი იური კრაკოვეცკის სამეულიდან გასულს გაეჯიბრება.

გელა ზაალიშვილი პირველ წრეში აზერბაიჯანელ შაჰინ გაჰრამანოვს ხვდება, ამათსი მოგებულს კი შემდეგ ბრაზილიელთა მსოფლიოს ვიცე-ჩემპიონი დავიდ მოურა ელოდება. ამ სამეულიდან უძლიერესი მესამე წრეში ავსტრიელ დანიელ ალერსტორფერსა და უზბეკ ბეკმუროდ ოლტიბოევს შორის გამარჯვებულს შეხვდება. ამავე ჰგუფშია ჰოლანდიელთა მსოფლიოს ბრინჯაოს მედალოსანი როი მეიერი, მონღოლთა ოლიმპიური ჩემპიონი ტუვშინბაიარ ნაიდანი და ფრანგთა ქართველი ლუკა მხეიძე.

52 კგ
ტატიანა ლევიცკა-შუკვანისთვის ამ ტურნირს უდიდესი მნიშვნელობა აქვს სალიცენზიო ქულების თვალსაზრისით, თუმცა საკმაოდ ძნელი ბადე ერგო: ჯგუფში ბრაზილიელთა ოლიმპიურ ჩემპიონ სარა მენეზესსა და ბელგიელთა ევროპის ორგზის ჩემპიონთან, ოლიმპიურ და მსოფლიოს ბრინჯაოს მედალოსან ჩარლინე ვან სნიცკთან მოხვდა.

ამავე ჯგუფშია აზერბაიჯანელი გულთაი მამადალიევა, ვისთანაც იანვარში თელ ავივში წააგო, და ებრაელი გილი კოენიც. სამაგიეროდ, შეღავათი ისაა, რომ ებრაელის გარდა, მათ მეოთხედფინალამდე არ ხვდება, თავიდან კი ნამდვილად არა ჰყავს ასეთი "მონსტრები" - პირველ წრეში მონღოლ ხორლოოდოი ბიშრელტს ხვდება, ხოლო თუ მოუგებს, მერე გვინეა-ბისაუელ ტაციანა ცესარს დაეჭიდება. ერთი შეხვედრის მოგებაც კი მას საკმაოდ ქულებს შეჰმატებს.

პირველ წრეში მარიამ ჯანაშვილიც მონღოლს ხვდება - სოსორბარამ ლხაგვასურენს, ამათში გამარჯვებულს კი მერე ჰაიტელი საბიანა ანესტორი ელოდება. ჯანაშვილს სერიოზული მეტოქე მერვედფინალში ელოდება - ფრანგი ასტრიდე გნეტო.

57 კგ.
ეთერ ლიპარტელიანი ჯგუფში კანადელთა მოქმედ მსოფლიოს ჩემპიონ კრისტა დეგუჩისთან მოხვდა, თუმცა მათი გზები მეოთხედფინალამდე არ იკვეთება. ქართველი პირველ წრეში ფრანგ ვერონიკა მანდენს ხვდება, ამათში მოგებულს კი მერე ებრაელი ტიმნა ნელსონ ლევი ელოდება. ამავე ჯგუფშია პანამელთა გერმანული წარმოშობის მსოფლიოს მედალოსანი მირიამ პოპერიც.

70 კგ.
მარიამ ჭანტურია ტურნირს უზბეკ გულნოზა მატნიაზოვასთან პაექრობით იწყებს, ამათში მოგებულს კი მეორე წრეში შვედი ანა ბერნჰოლმი ელოდება.

+78 კგ.
წილისყრამ არც სოფიო სომხიშვილს გაუმართლა - პირდაპირ მეორე წრეში კია დაშვებული, სადაც ალჟირელ სონია ასელას შეხვდება, მაგრამ მომდევნო ეტაპზე ამათში მოგებულს ესპანელი სარა ალვარესის, იაპონელი ვაკაბა ტომიტას და ბრაზილიელთა მსოფლიოს ორგზის ფინალისტ მარია სუელენ ალტემანის ტრიოდან უძლიერესს დაეჭიდება.

2923
მკითხველის კომენტარები / 2 /
მთ
0
ბარემ სტატიის სათაურიც ,,არ გაგვიმართლა,, ყოფილიყო
Tbilisi
0
რავა არავის არ გაუმღთლა... თუმცა გამართლება რა შუაშია? ჩვენი ძიუდო იმ დონეზეა რომ ყველა სპორტსმენი ოქროზე უნდა ფიზრობდეს და ნებისმიერი ოპონენტის დამარცხების იმედი ჰქონდეს!
მსგავსი ამბები
რუბრიკის სხვა სიახლეები
;