პარიზის გრანდ სლემი. პარიზში ერთად, ერთ გუნდად - ლიპარტელიანი იჭიდავებს

9-10 თებერვალს პარიზი ძიუდოისტთა გრანდ სლემს უმასპინძლებს, რომელიც არც წლეულს ღალატობს ტრადიციას და კვლავაც უჩვეულოდ წარმომადგენლობითი იქნება - წინასწარი მონაცემებით, დარეგისტრირებულია 98 ნაკრები და ეჭვიც არ შეგეპაროთ, დიდი ალბათობით, უკლებლივ ყველა გამოვა. დასახელებულთა შორის ომის ქარცეცხლში გახვეული სირიაც კია.

ასევე წინასწარი მონაცემებით, ტურნირში 609 სპორტსმენია დარეგისტრირებული - 360 ვაჟებში და 249 - ქალებში. აი, აქ კია მოსალოდნელი კლება, თუმცა არა რადიკალური. ერთი სიტყვით, ეს ტურნირი კვლავაც ინარჩუნებს ტრადიციას და თვით მსოფლიოს ჩემპიონატს უწევს ერთგვარ მეტოქეობას.

წინასწარ განაცხადში მსოფლიოს ყველა წამყვანი ქვეყანაა დასახელებული ძალის საზომად ქცეული იაპონიისა და კორეის ჩათვლით. იაპონიას 23 სპორტსმენი ჰყავს დარეგისტრირებული - 11 ვაჟი და 12 ქალი. ვაჟები, მართალია, არასრული გუნდით მიდიან, მაგრამ ყველა წონაში ლიდერები მიჰყავთ. ქალთა ნაკრები რამდენადმე გადახალისებულია, უმთავრესი დანაკლისი კი მსოფლიოს მოქმედი ჩემპიონი უტა აბეა (52), მისი ძმა, ჰიფუმი აბე (66) კი ჭიდაობს.

ცხადია, საშინაო ტურნირში უძლიერესი შემადგენლობით გამოვლენ ფრანგებიც, თუმცა აკლიათ მთავარი „ვარსკვლავი“ - ორგზის ოლიმპიური, მსოფლიოს 10-გზის და ევროპის 5-გზის ჩემპიონი ტედი რინერი (+100) - ის საგანგებო პროგრამით ემზადება ტოკიოს ოლიმპიადისთვის, მანამდე კი შეჯიბრებებში მისი ხილვის ბედნიერება ნაკლებად გვექნება.

საქართველოდან პარიზში მხოლოდ ვაჟთა ნაკრები იასპარეზებს და ისიც არასრული შემადგენლობით - 11 სპორტსმენით გამოვალთ. მათ შორის ბევრი ახალი კადრია, მაგრამ ამას გადახალისებას ვერ დავარქმევთ - თითქმის ყველა მათგანი საქართველოს მოქმედი ჩემპიონია და ნამდვილად იმსახურებენ ამ შანსს. გამონაკლისი 81 და +100 კილოგრამებია, სადაც ჩემპიონები არ მიდიან. რაც შეეხება 90 კილოგრამს, იქ მონაწილე არ გვეყოლება, რადგან ბექა ღვინიაშვილიც, ავთანდილ ჭრიკიშვილიც და უშანგი მარგიანიც პატარ-პატარა ტრავმებს იშუშებენ.

ეს ტურნირი კარგი შანსია ჩვენი ახალგაზრდებისთვის, თუმცა - უმძიმესი გამოცდაც, რადგან ძალიან ძლიერი შეჯიბრებაა და ჩვენებს ყოველთვის უჭირთ იქ გამარჯვება. საბედნიეროდ, ბოლო წლებში ეს ტრადიცია სასიკეთოდ შეიცვალა და ჩვენები თანდათან გაუშინაურდნენ პარიზული კვარცხლბეკის უმაღლეს საფეხურს.

ამასთან, „ფრანგული მუზარადი“ დებიუტი იქნება ნაკრების დროებითი მთავარი მწვრთნელის - ნოდარ მეტრეველისთვის, ხოლო ხანგრძლივი არეულობის და დიდი შერიგების შემდეგ გუნდის წევრები ისევ ერთად, ერთ გუნდად იასპარეზებენ ერთ ტურნირზე.

საქართველოს ნაკრები
60 კგ. ჯაბა პაპინაშვილი, თემურ ნოზაძე
66 კგ. ვაჟა მარგველაშვილი, ნიკოლოზ ჭიკაიძე
73 კგ. ლაშა შავდათუაშვილი, ლაშა გიუნაშვილი
81 კგ. კობა მჭედლიშვილი
100 კგ. ვალერი ლიპარტელიანი, ლაშა ტაველური
+100 კგ. ონისე ბუღაძე, გიორგი ზაქარიაძე

ყოველდღიური სპორტული გაზეთი "ლელო"
1692
მკითხველის კომენტარები / 1 /
ZAGREB
0
WERE IS GIORGI PAPUNASHVILI WE WAITING HIM IN 90 KG
მსგავსი ამბები
რუბრიკის სხვა სიახლეები
;