პატარა გოგონას დიდი გმირობა

ვაჟთა ნაკრების წარმატების მიუხედავად, ამ ტურნირის მთავარ მოვლენად მაინც მარიამ ჭანტურიას გამოსვლას და მის მიერ მოპოვებულ მედალს მივიჩნევთ, რასაც კარგა ხანს ველოდით.

ქალებში მედლები დიდ ტურნირებზე აქამდეც გვქონია: ესტერ სტამი (70) ევროპის ვიცე-ჩემპიონი გახდა, ნინო ოძელაშვილმა (78) კი 2015 წელს ბაქოს გრანდ სლემზე გაიმარჯვა, ახლა კი პატარა აბაშელმა გოგონამ იყოჩაღა.

მართლაც რომ იყოჩაღა, რადგან ჭანტურია ჯერ მხოლოდ 17 წლისაა და ლამის დედისტოლა ქალებთან ორთაბრძოლაში გამოძერწა ეს მედალი.

ის ჭაბუკებიდან წლეულს გადმოვიდა ახალგაზრდებში, თუმცა ჯერ იქაც კი არ მიუღია სათანადო გამოცდილება. თან, ასაკის შეცვლასთან ერთად, წონითი კატეგორიაც შეიცვალა: 63-დან 70-ში გადავიდა, ახალ წონაში ადაპტაციას კი, როგორც წესი, გარკვეული დრო სჭირდება.

ხშირად ეს პროცესი 2-3 სეზონიც კი გრძელდება და, შეიძლება ითქვას, ჭანტურია ზღაპრის გმირივით დღითიდღე იზრდება. შედეგად, აგერ, ამდენი ცვლილების შემდეგ უკვე დიდებში, პრაქტიკულად, რამდენიმე კვირაში პირველი მედალიც მოიპოვა.

თან - ძალიან კარგ ჭიდაობაში. ერთი, რომ გერმანელი სანდრა დიდრიხი, ვისაც დამამშვიდებლის ფინალში გაფრთხილებებით მოუგო, ევროპის ბრინჯაოს მედალოსანია.

მასთან დაძაბულ პაექრობაში ჭანტურიამ გვაჩვენა, რას ნიშნავს მებრძოლი სული და რა სარგებლობა მოაქვს მას! კანადელ კელიტა ზუპანჩიჩთან წაგებულ შეხვედრაში ნატკენი მხარიც მაგრად აწუხებდა; პატარა გოგო მარათონულად ქცეულ შეხვედრაში, რომელიც დამატებით დროში, ლამის 7 წუთამდე გაგრძელდა, გვარიანადაც დაიღალა, მაგრამ მაინც იპოვა საკუთარ თავში ძალა აქტიურობისთვის და მეტოქეს მესამე გაფრთხილება მიაღებინა.

ის ზოგადად გამოირჩევა ჟინით, მუდამ უტევს და ტატამზე ლამის ყოველთვის ლამაზ სანახაობას დგამს. მან მხოლოდ ძალიან გამოცდილ კანადელ ზუპანჩიჩთან წააგო, თუმცა ვერ ვიტყვით, რომ იქაც ხელებჩამოყრილი იდგა - აშკარაა, მასთან მიღებულმა ტრავმამ ხელი შეუშალა.

სამაგიეროდ, ჯერ ძირითად ბადეში ძალიან დამაჯერებლად დაამარცხა ჰოლანდიელი ეველინ ბენდსენი და ბრიტანელი კეტიჯემიმა იეტსბრაუნი, დამამშვიდებელში კი გერმანელებს დიდრიხამდე სარა მაკელბურგიც დაუმარცხა იპონით.

ამის შემხედვარე, დარბაზში ვიღაცამ იხუმრა, ჭანტურია გერმანელებს მეორე ქანთარიად მოევლინაო.

ქალები

48 კგ
1. მარუსა სტანგარი (სლოვენია); 2. მილიცა ნიკოლიჩი (სერბეთი); 3. მელანი კლემე (საფრანგეთი), სარა მენეზესი (ბრაზილია).

52 კგ
1. ამანდინ ბუშარი (საფრანგეთი); 2. ეველინ ჩოპი (შვეიცარია); 3. გულბადამ ბაბამურატოვა (თურქმენეთი), ანია სტანგარი (სლოვენია); 7. მარიამ ჯანაშვილი (საქართველო).

57 კგ
1. ტერეზა შტოლი (გერმანია); 2. ელენ რესევო (საფრანგეთი); 3. ტიმნა ნელსონ ლევი (ისრაელი), ამელიე შტოლი (გერმანია).

63 კგ
1. კლარის აგბენიენუ (საფრანგეთი); 2. კაროლინა ტალაში (პოლონეთი); 3. ლუბიანა პიოვესანა, ლუცი რენსჰალი (ორივე - ბრიტანეთი).

70 კგ
1. მარი-ევ გაიე (საფრანგეთი); 2. კელიტა ზუპანჩიჩი (კანადა); 3. მარიამ ჭანტურია (საქართველო), კაროლა პაისონი (იტალია).

78 კგ
1. ოდრი ჩუმეო (საფრანგეთი); 2. ანასტასია ტურჩინი (უკრაინა); 3. მადელაინ მალონა (საფრანგეთი), ბეატა პაცუტი (პოლონეთი).

1. +78 კგ
რომანე დიკო (საფრანგეთი); 2. მარინა სლუცკაია (ბელარუსი); 3. სანდრა იაბლონსკაიტე (ლიტვა), ანე ფატუმატა მ"ბაირო (საფრანგეთი).

ყოველდღიური სპორტული გაზეთი "ლელო"
1473
მკითხველის კომენტარები / 0 /
მსგავსი ამბები
რუბრიკის სხვა სიახლეები