პატარა გორი დიდია - ჩემპიონია!

გორის მუნიციპალიტეტის ახალშექმნილმა გუნდმა - "გოლდენ გორმა" წარმატებით დაასრულა თავისი დებიუტი ევროპის საკლუბო პირველობაზე და შაბათს ბუქარესტში გამართული რანგით მეორე საკლუბო ტურნირის, "ევროპის ლიგის" გამარჯვებული გახდა.

და გაისად უმაღლეს ეტაპზე ანუ ჩემპიონთა ლიგაში იასპარეზებს.

"გორი" სულ რამდენიმე თვის შექმნილია და მის შემადგენლობაში მხოლოდ ხუთი ძიუდოისტი ირიცხება ანუ ზუსტად იმდენი, რამდენი წონაცაა გუნდში. მათ სათადარიგოებიც კი არ ჰყავთ, რადგან მუნიციპალიტეტს თავდაპირველად კლუბის ხარჯიც კი არ ჰქონდა გაწერილი, არათუ სათადარიგოების დასამატებელი.

აი, გაისად კი მათ დამატებასაც აპირებენ, თუმცა "გორი" იმდენად ძლიერი კლუბია, საკითხავია - განა რამდენი ძიუდოისტი მოიძებნება ისეთი, ეს გუნდი კიდევ უფრო მეტად რომ გააძლიეროს? მათ წლეულს ჩემპიონთა ლიგაშიც შეეძლოთ წარმატების მოპოვება, იქ რომ ეჭიდავათ. კლუბი მთლიანად გორელი, მაგრამ ტიტულოვანი სპორტსმენებითაა დაკომპლექტებული:

ევროპის ჩემპიონი და მსოფლიოს მესამე პრიზიორი ვაჟა მარგველაშვილი (66), ოლიმპიური და ევროპის ჩემპიონი ლაშა შავდათუაშვილი (73), ახალგაზრდებში ევროპის წლევანდელი ჩემპიონი და მსოფლიოს მესამე პრიზიორი ლუკა მაისურაძე (81), ევროპის ბრინჯაოს მედალოსანი ბექა ღვინიაშვილი (90) და მსოფლიოს წლევანდელი ფინალისტი უშანგი კოკაური (+90). კოკაური ბოლო წლებში აზერბაიჯანის სახელით გამოდის და წლეულსაც მათ მოუტანა მსოფლიოს ვერცხლი.

"გოლდენ გორმა" პირველი შეხვედრა გერმანულ "ლაიპციგთან" ჩაატარა და 4:1 მოიგო. ქართლელებმა სწრაფადვე გაინაღდეს გამარჯვება, რადგან პირველმა ოთხეულმა მიყოლებით მოიგო და 4:0 დაწინაურდნენ: მარგველაშვილმა, შავდათუაშვილმა, მაისურაძემ და ღვინიაშვილმა დაამარცხეს, შესაბამისად, გერმანელი დენის ერმანი, უნგრელი ლასლო ჟოკე, ასევე გერმანელები - ჰანეს კონრადი და რენე კირსტენი. მხოლოდ კოკაური დამარცხდა არაფრისმომცემ შეხვედრაში კუბელ ენდი გრანდასთან.

ნოდარ მეტრეველის შეგირდებმა მეორე შეხვედრაშიც ასეთივე ანგარიშით, 4:1 მოიგეს იტალიურ "ფიამი ჯილესთან". აქ ჩვენებმა მხოლოდ პირველი პაექრობა დათმეს - მარგველაშვილი ელიოს მანძისთან დამარცხდა გაფრთხილებით, დანარჩენებმა კი წმინდად აჯობეს გაბრიელე სულის, ანდრეა ჯისმონდოს, ანტონიო ჩიანოს და ჯულიანო ლოპორჩიოს.

ამით გორელები ნახევარფინალში გავიდნენ, სადაც "მშრალად", 5:0 დაამარცხეს სერბული "კინეზისი". ხუთივე ჩვენებურმა იპონით იმარჯვა, მეტოქეებად კი სერბთა ერთადერთი ლეგიონერი, მონღოლი ტუმურკულეგ დავაადორჯი და სერბები: მარკო ვუკიჩევიჩი, მილან მიჰაილოვიჩი, ფილიპ მოსიჩი და ნიკოლა იერემიჩი ჰყავდათ.

აქვე გეტყვით, რომ სერბული კლუბის შემადგენლობაში გამოდის მძიმეწონოსანი გელა ზაალიშვილი, თუმცა მას ჩვენებურებთან არ უჭიდავია. სამაგიეროდ, მის მიერ რუს ბატურ შაკიროვთან შესრულებულ უზადო კისრულზე, რომელმაც წმინდა გამარჯვება მოუტანა, მთელი ევროპა ალაპარაკდა.

ფინალში ჩვენებურთა მეტოქე ფრანგული კლუბი ესბმ "ბლანკ-მესნილი" აღმოჩნდა, რომელსაც 3:2 მოუგეს. გორელებმა გამარჯვება მესამე შეხვედრის შემდეგ დაიბევეს, რადგან სამივე მოიგეს და 3:0 დაწინაურდნენ, რითაც დარჩენილი ორი პაექრობა ფორმალობად აქციეს. მარგველაშვილს ძალიან გაუჭირდა ვინსენტ ლიმართან, თუმცა გვარიანად კი უტევდა და მისი წინააღმდეგობა ბოლო წამებზე მოგვერდით მოპოვებული ვაზარით გატეხა. შავდათუაშვილმაც ვაზარით დაამარცხა იტალიელი გიომ ჩაინე, როცა უკან გადააგორა, მაისურაძემ კი ჯერ დააგდო და იქვე შებოჭა ჯონათან ალარდონი. ღვინიაშვილი ბოლო წამებზე დაეცა იპონზე მაქსიმ ამენოსთან, ხოლო კოკაურმა ჰოლანდიელ ევროპის მედალოსან როი მეიერთან წააგო.

როგორც ვხედავთ, გორელთა ხუთეულში ორი კაცია ისეთი, ვინც ყველა შეხვედრა მოიგო და ევროპირველობა უდანაკარგოდ ჩაამთავრა: მაისურაძე და შავდათუაშვილი.

შერაზადიშვილის გმირობა

ამ ტურნირამდე ერთი დღით ადრე ჩატარდა "ოქროს ლიგა", რომელიც ისტორიაში პირველად მოიგო პორტუგალიის "სპორტინგმა".

ამ ტურნირში ჩვენ წარმომადგენელი არ გვყავდა, თუმცა გამარჯვებულთა რიგებში ორი ქართველი ლეგიონერი გამოდიოდა - ანრი ეგუტიძე პორტუგალიიდან და ესპანელთა მსოფლიოს ჩემპიონი ნიკოლოზ შერაზადიშვილი. რუსულ "იავარა ნევასთან" გადამწყვეტი შეხვედრაც შერაზადიშვილმა მოიგო. თავიდან პორტუგალიელები 2:0 დაწინაურდნენ:

დავიდ რაისმა ვაზარით, ხოლო მონგოლმა ოლდბაიარ განბაატარმა იპონით დაამარცხეს, შესაბამისად, ანზაურ არდანოვი და ზელიმხან ოზდოევი. ამის შემდეგ ეგუტიძე დამარცხდა დენის კალინინთან და ანგარიში 2:1-მდე შემცირდა. აი, სწორედ ამ დროს შერაზადიშვილმა ვაზარით აჯობა სტანისლავ რეტინსკის და ანგარიში 3:1 გახადა, რითაც პორტუგალიელებმა გამარჯვება გაინაღდეს, შეხვედრა 3:2 დამთავრდა.

ყოველდღიური სპორტული გაზეთი "ლელო"
1438
მკითხველის კომენტარები / 0 /
მსგავსი ამბები
რუბრიკის სხვა სიახლეები
;