პეგასმა მეორე ადგილზე აინაცვლა

თბილისის სპორტის სასახლეში გუშინ საქართველოს ხელბურთელ ვაჟთა 2018-2019 წლების ჩემპიონატის მე-2 წრის მე-10 ტურის ორი მატჩი გაიმართა აღმოსავლეთის გუნდების მონაწილეობით. ორივე პაექრობა დაძაბული გამოდგა და საბოლოოდ 2-3 ბურთის სხვაობით დასრულდა.

დრამატულად წარიმართა ლიდერთა ჯგუფის წევრების - თბილისის „პეგასისა“ და თელავის „იმედი“-სტუ-ს შეხვედრა. თავიდან მასპინძლები 5:1 დაწინაურდნენ, მაგრამ ტაიმის მიწურულისკენ სტუმრები 6 ბურთით გავიდნენ წინ - 18:12. შესვენების შემდეგ უპირატესობას „პეგასი“ დაეუფლა, რომლის რიგებში კალანდაძე გამოირჩეოდა.

გუშინ მან თელავეთა კარში 17 ბურთი გაიტანა და საკუთარი გუნდის გამარჯვებაში დიდი წვლილი შეიტანა. საგულისხმოა, რომ ამ ჩემპიონატში პეგასელებმა მეორედ დაჯაბნეს „იმედი“, მოაგროვეს 16 ქულა და გათამაშების ცხრილის მეორე ადგილზე გადაინაცვლეს. მართალია, ამდენივე ქულა აქვს „ქუთაისსაც“, მაგრამ რიონისპირელები კონკურენტს დამატებითი მაჩვენებლებით ჩამორჩებიან.

ჩემპიონატის პირველ წრეში „სპორტუნი“ გორთან დამარცხდა. სტუდენტმა ხელბურთელებმა ამჯერად რევანში აიღეს, არადა, პირველი ტაიმი გორელებმა ოთხი ბურთის სხვაობით მოიგეს. სპორტის უნივერსიტეტის გუნდი 6 ქულით სწორედ „გორთან“ იყოფს მეხუთე-მეექვსე ადგილებს.

სპორტუნი-გორი 40:38
სპორტუნი: ხარაიშვილი, თიგიშვილი - 7, ჭელიძე - 7, აბაშიძე - 6, ცხვარაშვილი - 5, იობაშვილი - 5, ერისთავი - 4, ზურაბიანი - 3, ჩიკვილაძე - 3, ჩაკვეტაძე, გულდედავა, დელიბაშვილი, გურასპაული.
გორი: თითირაშვილი, დალაქიშვილი - 12, მჭედლიშვილი - 10, ახალბედაშვილი - 7, ზუბიაშვილი - 5, ზოზიაშვილი - 2, ნიაზაშვილი - 2, ტარუაშვილი, შემშენოვი, ხუბულური.

პეგასი-თელავი 33:30
პეგასი: დიხამინჯია, გორგოძიანი, დგებუაძე, კალანდაძე - 17, ზარნაძე - 5, გრიშიკაშვილი - 4, კუხალაშვილი - 3, ბაძაღუა - 2, შუბითიძე - 1, ქათამაძე - 1, ჭანტურია, კოხრეიძე, ჟვანია, მდივანი, გვაზავა, პატაშური.
თელავი: ცინცაძე, ხიდეშელი, ყორიაული - 9, ცისკარიშვილი - 6, დოლმაზაშვილი - 5, მიქავა - 4, გოგალაძე - 3, იობაშვილი - 2, ბაინაზიშვილი - 1, გავაშელიშვილი, კორსანტია.

თ მ ფ წ ბ ქ
ბათუმი 10 9 0 1 432:275 18
პეგასი 10 8 0 2 435:306 16
ქუთაისი 10 8 0 2 394:280 16
იმედი-სტუ 10 7 0 3 357:305 14
გორი 10 3 0 7 367:421 6
სპორტუნი 10 3 0 7 330:439 6
სამტრედია 10 1 1 8 272:378 3
წყალტუბო 10 0 1 9 237:411 1

მეორე წრის საერთო ტური 26 თებერვლიდან პირველი მარტის ჩათვლით თბილისში გაიმართება.

ყოველდღიური სპორტული გაზეთი "ლელო"
402
მკითხველის კომენტარები / 0 /
მსგავსი ამბები
რუბრიკის სხვა სიახლეები
;