პელე, მარადონა, რონალდო, ვან გაალი, ზიდანი - რას ამბობს მსოფლიო მესიზე

ლიონელ მესი თანამედროვე ფეხბურთს ამშვენებს თავისი დიდებული თამაშით. მასზე ბევრს ლაპარაკობენ. თქვენ წინაშეა ყველაზე ცნობილი ფრაზები, რომლებიც ოდესმე უთქვამთ არგენტინელ გენიოსზე...

"ჩემთვის ძალიან დიდი პრივილეგიაა ის, რომ ლიონელ მესისთან ერთად ერთ გუნდში ვთამაშობ", - ლუის სუარესი.

"მესი ჩემთვის უნიკალური ადამიანი და ფეხბურთელია. მადლობა ღმერთს, რომ მასთან ერთად მიწევს თამაში. დიდი იმედი მაქვს, რომ ეს ნეტარება კიდევ კარგა ხანს არ დასრულდება. მე მას თვალდახუჭული ვპოულობ მინდორზე", - ანდრეს ინიესტა.

"ვინ არის მსოფლიოს საუკეთესო ფეხბურთელი? ეს იოლი კითხვაა ყველა იმ ფეხბურთელისთვის, რომელიც მესისთან ერთად ვარჯიშობს. ლეო საუკეთესოა მსოფლიოში და ეს არის ფაქტი, რომელსაც ბევრი სჯა-ბაასი არ სჭირდება", - ნეიმარი.

"მესი საუკეთესოა მსოფლიოში. თუ ფეხბურთს უყურებ, ეს უნდა აღიარო. ვინც საწინააღმდეგოს ამბობს და რონალდოს ასახელებს, ის, უბრალოდ, მისი ნათესავია", - ჩავი ერნანდესი.

"ჩემთვის ათნომრიანი მაისურა ძალიან ბევრს ნიშნავს. მე სულ ვოცნებობდი, რომ ამ ნომრით მეთამაშა, თუმცა "სიტიში" 16-ნომრიანითაც მითამაშია. ჩემთვის "ათნომრიანი" მაისურის მნიშვნელობას ისიც ზრდის, რომ ის ლიონელ მესის აცვია. ყველა იამაყებდა ასეთი მეგობრით და მეც ამაყი ვარ", - სერხიო აგეურო.

"არ ვიცი, როგორ შეიძლება, გიყვარდეს ფეხბურთი და არ გიყვარდეს მესი. არ ვიცი, რა აქვს თავში იმ ხალხს, ვინც ლეოს აკრიტიკებს. პირდაპირ ვიტყვი ჩემს აზრს: მიმაჩნია, რომ ასეთმა ხალხმა საერთოდ არ იცის, რა არის ფეხბურთი", - კარლოს ტევესი.

"ერთხელ, ვარჯიშის მსვლელობის დროს, გადავწყვიტე, რადაც უნდა დამჯდომოდა, მესი შემეჩერებინა. რაც მოხდა მერე, ცოტათი სასაცილოა. თავად ვერ შევამჩნიე, როგორ გადავედი უხეშობაზე. პეპ გვარდიოლამ მთხოვა, მისთვის ტრავმა არ მიმეყენებინა.

მე ვუთხარი პეპს, რომ მაშინ წვრთნა უნდა შეეჩერებინა. რა არ გავაკეთე, მაგრამ ის სულ გვერდს მივლიდა. მესი საუკეთესოა მსოფლიოში, ამას ბევრი ლაპარაკი არ უნდა", - კარლეს პუიოლი.

"ის არა მხოლოდ საუკეთესო ფეხბურთელია, არამედ სიკეთის ნამდვილი სიმბოლოცაა. ლეო ძალიან კარგი ბიჭია. მე ის მიყვარს, როგორც სუფთა ადამიანი", - ფრანჩესკო ტოტი.

"მესი ყოველ შეხვედრაში ამტკიცებს, რომ ის საუკეთესოა. ერთი მხარეა ფეხბურთი და მეორე - პიროვნული თვისებები. მე მასში ყველაზე მეტად მისი უბრალოება მიყვარს. დამიჯერეთ, მის შემთხვევაში ყველა ვერ გაუძლებდა ცდუნებას", - ლუის ვან გაალი.

"მესი, აიყვანე ხელში საკუთარი თავი! თუ ასე თამაშობ სეზონის დასაწყისში, მერე რაღა უნდა აჩვენო? ცოტა მომავლისთვისაც შეინახე", - გარი ლინეკერის კომენტარი თბილისში გამართულ სუპერთასის მატჩზე.

"ბარსელონა" დიდებული გუნდია, სადაც თამაშობს ათი ფეხბურთელი და ერთი უცხოპლანეტელი", - "სევილიას" პრეზიდენტი ხოსე კასტრო.

"ის უცხოპლანეტელია. უბრალოდ, დროებით გვესტუმრა და ჩვენთან ერთად თამაშობს ფეხბურთს", - ჯანლუიჯი ბუფონი.

"როცა მესის სამოქალაქო ფორმა აცვია, ის ჩვეულებრივ სკოლის მოსწავლეს ჰგავს. გაიხდის ტანსაცმელს, ჩაიცვამს ფორმას და, უბრალოდ, შეუჩერებელი ხდება", - ბიქსენ ლიზარაზუ.

"ის ისე თამაშობს ფეხბურთს, თითქოს მარტო დასდევდეს ბურთს ცარიელ ქუჩაში. მას არ ანერვიულებს გულშემატკივარი. თითქოს, საერთოდ არ აქვს ემოცია. მე ვიტყოდი, რომ ის საუკეთესოა", - გუუს ჰიდინკი.

"ყველაფერი გასაგები გახდება, თუ "ბარსელონას" ერთ თამაშს მაინც უყურებ. მესის შეუძლია, ნებისმიერი შეხვედრა შოუდ აქციოს. მას პირადად შეუძლია ნებისმიერი მატჩის ბედის გადაწყვეტა. ეს განსაკუთრებული თვისებაა.

მესის კიდევ ერთი დიდებული რამ ახასიათებს: ის სულ წინ მიდის, არ აკეთებს უკან და განივ პასებს. მისი სათამაშო ფილოსოფია გოლების გატანაა. უდიდეს სიამოვნებას ვიღებ, როცა მის თამაშს ვუყურებ", - ზინედინ ზიდანი.

"მესიმ თავადაც არ იცის, სად გადის მისი შესაძლებლობების ზღვარი. ჩვენ ფეხბურთის ისტორიაში საუკეთესო ტრიო შევქმენით", - "ბარსელონას" პრეზიდენტი ხოსე მარია ბარტომეუ.

"ლეო დიდებული ფეხბურთელია. ეჭვი არ მეპარება, რომ რუსეთში გასამართავ მსოფლიოს ჩემპიონატზე ის აასრულებს თითოეული არგენტინელის ოცნებას და "ალბისელესტეს" მუნდიალის ოქროს მედლებს მოაგებინებს", - ხუან სებასტიან ვერონი.

"ჩემთვის საუკეთესო ყოველთვის იყო პელე. მას დიდებაში მარადონა ეზიარებოდა. მჯერა, მესი შეძლებს ორივეს გადასწრებას", - უგო სანჩესი.

"პარი სენ-ჟერმენის პრეზიდენტი რომ ვიყო და ერთი ტრანსფერის განხორციელების უფლება მქონდეს, ლიონელ მესის შევიძენდი", - ედინსონ კავანი.

"როცა მესისთან ერთად ხარ მინდორზე, წამითაც ვერ მოდუნდები. ის სხვა გზას არ გიტოვებს - შენც საუკეთესო უნდა იყო", - დავიდ ვილია.

"მესი ჩვენი თაობის პელეა. მაგრად გაგვიმართლა, ასეთი ფეხბურთელი ჩვენი თანამედროვე რომ არის", - ჟულიანო ბელეტი.

"მსოფლიოში ერთადერთი ფეხბურთელი, ვინც ჩემზე წინ არის, ეს მესია. დანარჩენები ბევრად უკან არიან", - მარიო ბალოტელი.

"მის თამაშს რომ უყურებ, ორგაზმს აღწევ", - ლუიშ ფიგუ.

"მესიმ ფეხბურთი შეცვალა, რონალდომ კი ვერა. ამიტომაცაა ლეო დღეს პირველი ნომერი", - დანი ალვეში.

"მესი უფრო გუნდური ფეხბურთელია, რონალდო კი უფრო გამტანი. თუ მე დავაკომპლექტებდი გუნდს, იქ სწორედ მესის ავიყვანდი", - პელე.

"ჩვენ გაგვიმართლა, რომ მის ეპოქაში ვცხოვრობთ. პირადად მეც გამიმართლა, რომ ვიყავი მისი მწვრთნელი და უფროსი მეგობარი", - პეპ გვარდიოლა.

"ყველაფერი რომ ვთქვა, რასაც მასზე ვფიქრობ, ციხეში ჩამსვამენ. ფეხბურთში ჭკვიანი ხალხი მუშაობს. წესით, მათ ყველაფერი კარგად უნდა იცოდნენ", - კრიშტიანო რონალდო მას შემდეგ, რაც მესი მსოფლიოს 2014 წლის ჩემპიონატის საუკეთესო ფეხბურთელი გახდა.

"ხალხს სჭირდება გმირიც და განტევების ვაციც. მესის ორივე ეს სტატუსი აქვს. როცა გუნდი იგებს, ის გმირია, როცა აგებს, ყველა ამბობს, რომ ეს მისი ბრალია. ის უდიდესი ფეხბურთელია", - ხორხე ვალდანო.

"ლეო, შენ ფეხბურთის ისტორიაში საუკეთესო გახდები", - დიეგო მარადონა.

ყოველდღიური სპორტული გაზეთი "ლელო"
4165
მკითხველის კომენტარები / 0 /
მსგავსი ამბები
რუბრიკის სხვა სიახლეები