პეპ გვარდიოლა: ახლა აღარავის სჯერა, რომ ნახევარფინალში გასვლა შეგვიძლია

ჩემპიონთა ლიგის პირველი მეოთხედფინალური რაუნდი დასრულებულია. უცნაურია, რომ ოთხიდან სამ შეხვედრაში დიდი ანგარიში დაფიქსირდა და ამ სამ დაპირისპირებაში საპასუხო შეხვედრები ფორმალობას დაემსგავსა.

პრინციპში, "ბაიერნსაც", რომელმაც სევილიაში 2:1 მოიგო, არ უნდა გაუჭირდეს ანდალუსიური ბარიერის დაძლევა. ხაზს ვუსვამთ - დიახ, ეს ხდება მეოთხედფინალში!

ოთხშაბათს შთამბეჭდავი გამარჯვება მოიპოვა "ლივერპულმა", რომელმაც პირველივე ტაიმში 3 უპასუხო გოლი აგემა პრემიერლიგის ჯერ კიდევ არაოფიციალურ ჩემპიონ "მანჩესტერ სიტის", "ბარსელონამ" კი 4:1 მოუგო "რომას", თუმცა ისიც აღსანიშნავია, რომ იტალიელებმა ორი გოლი საკუთარ კარში გაიტანეს...

რას ფიქრობენ მწვრთნელები?

ეუსებიო დი ფრანჩესკო ("რომა"): "რა თქმა უნდა, ეს არ იყო ჩვენი საუკეთესო თამაში. ბოლომდე ვერ ვიპოვეთ საკუთარი თავი მინდორზე. ხშირად ჩვენს თამაშში არ შეიმჩნეოდა ბალანსი. რა თქმა უნდა, მეტოქეს შესანიშნავი გუნდი ჰყავს, თუმცა მიმაჩნია, რომ მინიმუმ ერთი გოლის გატანა კიდევ შეგვეძლო...

რაც შეეხება მსაჯს. მე მოკლედ ვიტყვი: "ბარსელონა" იმდენად ძლიერი გუნდია, რომ მას არც ერთ შემთხვევაში არ სჭირდება მსაჯების დახმარება. სათქმელია ისიც, რომ ჩვენ ძალიან გაგვიჭირდა ნაინგოლანისა და იუნდერის გარეშე".

ერნესტო ვალვერდე ("ბარსელონა"): "ჩვენ დიდ პრობლემებს შევეჩეხეთ მატჩის დასაწყისში. რომაელები ძალიან კარგად თამაშობდნენ პრესინგს და გაგვიჭირდა მარწუხებისგან თავის დაღწევა. მეორე ნახევარში მოწინააღმდეგემ თამაში გახსნა და ჩვენ ისინი დავსაჯეთ ამისთვის, მაგრამ ორმატჩიან დუელში ჯერ არაფერია გადაწყვეტილი".

პეპ გვარდიოლა ("მანჩესტერ სიტი"): "ჩვენ კარგად დავიწყეთ თამაში, მაგრამ შემდეგ გოლი გავუშვით. მერე კიდევ ორი გოლი გაგვიტანეს... რთულია ამასთან შეგუება.

ისინი სულ 10-15 წუთით იყვნენ ჩვენზე უკეთესები და საბოლოოდ ასეთი შედეგი მივიღეთ. მეორე ტაიმში კი მოვუმატეთ, მაგრამ გატანა ვერ მოვახერხეთ. ახლა აღარავის სჯერა, რომ ნახევარფინალში გასვლა შეგვიძლია, მაგრამ მაინც დაველოდოთ საპასუხო მატჩს. "ლივერპულმა" სამჯერ შეუტია და სამჯერ გაიტანა".

შემდეგ გვარდიოლამ ილაპარაკა მატჩის წინ მომხდარ ინციდენტზე, როცა "ლივერპულის" ფანებმა "მანჩესტერ სიტის" ავტობუსს ბოთლები და სხვა საგნები დაუშინეს. პეპმა სარკასტულად გადაუხადა მადლობა მეტოქე კლუბის შტაბს - დიდი მადლობა ასეთი დახვედრისთვისო!..

იურგენ კლოპი ("ლივერპული"): "ასეთ შედეგს არავინ ველოდით. და მაინც, არ ვარ ბოლომდე კმაყოფილი. მეორე ტაიმში უფრო კარგად უნდა გვეთამაშა.

"სიტის" არ ჰქონია ბევრი მომენტი, მაგრამ მეორე ნახევარში არც ჩვენი თამაში იყო იდეალური. ჯერ არაფერია გადაწყვეტილი. საერთო ჯამში, ჩვენ მხოლოდ ერთი დიდი მატჩის პირველი ნახევარი მოვიგეთ.

ცუდია, რომ სალაჰის შეცვლამ ნაადრევად მოგვიწია. ის დაშავდა და აუტის ხაზთან რომ მოვიდა, მაშინვე გადავწყვიტე, რომ შემეცვალა. ის ამბობს, რომ სერიოზული არაფერი სჭირს, თუმცა მთავარია ექიმების სიტყვა... თუ უნდათ, რომ პრემიერლიგაში ნახონ ბევრი ასეთი მატჩი, კალენდარზე უნდა დაფიქრდნენ.

"ევერტონთან" შეხვედრას ბევრი წლის მთავარ მატჩს უწოდებს, მე კი ამ თამაშისთვის ფეხბურთელები მყავს საძებარი".

ესპანეთი-იტალია 7:1

"გაძეტა დელო სპორტი" მთავარ ყურადღებას მილანურ დერბის უთმობს. პირველ გვერდზე მაურო იკარდის დიდი ფოტოა, რომელზეც არგენტინელი "მილანთან" შეხვედრაში განიავებულ შანსებს განიცდის...

მაგრამ პირველ გვერდზე ესეც წერია: "ესპანეთი-იტალია 7:1". სწორედ ასეთია საერთო ანგარიში "ბარსელონა"-"რომასა" და "იუვენტუსი"-"რეალის" პირველი მეოთხედფინალური მატჩების შემდეგ.

დაახლოებით იმავე შინაარსისაა "ტუტოსპორტისა" და "კორიერე დელო სპორტის" პირველი გვერდები. "დეილი მეილი" კი აქვეყნებს "ლივერპულის" სამი შემტევის - მოჰამედ სალაჰის, სადიო მანესა და ალექს ოქსლეიდ-ჩემბერლენის ფოტოებს. "ლივერპული" ჩემპიონთა ლიგის ორბიტაზე დაბრუნდა", - ასეთია სათაური.

"სალაჰმა, ოქსმა და მანემ გვარდიოლას ევროპული ოცნება თითქმის დაასამარეს", - წერს "სანი". "სიტი" "ენფილდზე" შოკში ჩააგდეს", - ეს კი პოპულარული ინტერნეტგამოცემა გოალ.ცომ-ის სათაურია.

იყო ორი პენალტი ?

"მსაჯს ორი პენალტი უნდა დაენიშნა "ბარსელონას" კარში, მაგრამ მან ეს ვერ გაბედა. და მაინც, ჩვენ ამაყები ვართ. შევაჩერეთ მესი, თუმცა იყო გარკვეული შეცდომები და ეს გაშვებულ გოლებად დაგვიჯდა.

მეორე შეხვედრაში ბოლომდე ვიბრძოლებთ, რათა სასწაული მოვახდინოთ. ფეხბურთში ყველაფერია შესაძლებელი და ამაში არაერთხელ დავრწმუნდით", - თქვა "რომას" სპორტულმა დირექტორმა მონჩიმ.

შოკი

"არ ვიცი, რა დაგვემართა. "ლივერპულმა" სულ რამდენჯერმე შეუტია და 3 გოლი გაგვიტანა. მეორე ტაიმში ჩვენ უკეთესები ვიყავით, თუმცა გოლი ვერ შევაგდეთ. წინ მეორე შეხვედრაა და ვითარების გამოსწორება შეიძლება", - თქვა "მანჩესტერ სიტის" ნახევარმცველმა კევინ დე ბრუინმა.

ყოველდღიური სპორტული გაზეთი "ლელო"
1327
მკითხველის კომენტარები / 0 /
მსგავსი ამბები
რუბრიკის სხვა სიახლეები
;