პეპ გვარდიოლა: ეძღვნებათ პატიმარ კატალონიელებს!

"მანჩესტერ სიტის" მთავარმა მწვრთნელმა პეპ გვარდიოლამ განაცხადა, რომ "ნაპოლი" ერთ-ერთი საუკეთესო გუნდია იმათგან, ვისაც სამწვრთნელო კარიერის განმავლობაში დაპირისპირებია. შეგახსენებთ, რომ ინგლისურმა კლუბმა ნეაპოლელებს შინ 2:1 მოუგო.

"ვიცოდი, რომ ბოლო წამამდე არ გადაწყდებოდა შეხვედრის ბედი, რადგან "ნაპოლი" ძალიან ძლიერი და გამოუცნობი გუნდია. ჩვენ შესანიშნავი პირველი ტაიმი ჩავატარეთ, განსაკუთრებით - საწყისი 30-35 წუთი. გავიტანეთ ორი ბურთი და კიდევ შეგვეძლო გატანა. შემდეგ ჩვენ დავიღალეთ და ვეღარ ვიყავით ისეთივე ეფექტურები, როგორც მანამდე...

...მოწინააღმდეგე მარტივად თამაშობდა, არ აკეთებდა ზედმეტ მოძრაობებს. მოხარული ვარ, რომ მოვიგეთ. ეს ბევრზე მეტყველებს. თუ ვერ ითამაშებ შესანიშნავ ფეხბურთს, ისე "ნაპოლის"დამარცხება წარმოუდგენელია. ასეთი თამაშით იტალიელებს თავიანთი ჩემპიონატის მოგება შეუძლიათ. ესაა ერთ-ერთი საუკეთესო გუნდი, რომელსაც ჩემი სამწვრთნელო კარიერის განმავლობაში შევხვედრივარ", - თქვა პეპმა და იქვე დასძინა, თუ ვის მიუძღვნა გამარჯვება:

"მინდა, ეს გამარჯვება იმ კატალონიელების იყოს, ვინც ესპანეთის პოლიციამ დააპატიმრა. ისინი მუდამ ძალიან ზრდილობიანად გამოთქვამენ თავიანთ შეხედულებებს და იმედი მაქვს, მალე გათავისუფლდებიან", - დაასრულა გვარდიოლამ.

პოლიტიკა და ბირთვული ფიზიკა

რა თქმა უნდა, გვარდიოლას სიტყვები ესპანეთის ხელისუფალთ ყურადღების მიღმა არ დარჩენიათ. სპორტის, განათლებისა და კულტურის მინისტრმა, ინიგო მენდეს დე ვიგომ, "მანჩესტერ სიტის" მწვრთნელის სიტყვებს კომენტარი გაუკეთა:

"ჩემი აზრით, ყურადღება მივაქციოთ სპორტსმენის გამონათქვამებს პოლიტიკის შესახებ, ეს იგივეა, ვინმე დაინტერესდეს ჩემი აზრით ბირთვული ფიზიკის თაობაზე, რომლის შესახებაც მე საერთოდ არაფერი ვიცი. გვარდიოლას აქვს თავისი აზრი, მაგრამ მე მას არ ვიზიარებ. ყველას აქვს აზრის გამოთქმის საშუალება და ძალიან ვაფასებ გვარდიოლას, როგორც ფეხბურთელს. ასეთ სიტუაციაში თუნდაც კლუბებმა თავი უნდა შეიკავონ აზრის გამოთქმისგან. ეს "ბარსელონას" ვნებს.

ამ გუნდს ბევრი გულშემატკივარი ჰყავს თუნდაც ესპანეთის ფარგლებს გარეთ. ბევრ მათგანს არ მოეწონა კლუბის პოზიცია. ჩემი აზრით, იმ პირებმა, რომლებიც სარგებლობენ საზოგადოების მხრიდან დიდი ყურადღებით, და მათ შორისაა გვარდიოლაც, უფრო დაკვირვებულები უნდა იყვნენ, როცა რაღაცას ამბობენ. თუ "ბარსელონა" გავა ლა ლიგიდან, ლიგა ბევრს დაკარგავს. ეს იგივე იქნება, რაც ყავა კოფეინის გარეშე. ჩვენი პირველობა ბევრ ემოციას დაკარგავს", - თქვა მინისტრმა.

ამაყები ვართ, რომ არ გავტყდით...

...დავუბრუნდეთ მატჩს. საინტერესო უნდა იყოს "ნაპოლის" მწვრთნელ მაურიციო სარის მოსაზრებაც: "არ ვიცი, რა მოგვივიდა საწყისი 30 წუთის განმავლობაში. ჩვენ საკუთარ თავს არ ვგავდით და მოწინააღმდეგეს ორჯერ მივეცით გატანის საშუალება. ამის შემდეგ ვიპოვეთ საკუთარი თამაში და, შეიძლება ითქვას, "სიტის" დონეზეც კი ვიყავით. დასანანია, რომ პირველ ნახევარში თერთმეტმეტრიანი ვერ გამოვიყენეთ. ამის მიუხედავად, საკუთარ თავში ვიპოვეთ ძალა და ჩავატარეთ შესანიშნავი მეორე ნახევარი...

...თუ "სიტი" შეინარჩუნებს ამჟამინდელ დონეს, ეს გუნდი ჩემპიონთა ლიგის მოგების ერთ-ერთ მთავარ პრეტენდენტად მესახება. ჩვენ ამაყები ვართ, რომ არ გავტყდით და ბოლომდე ვიბრძოლეთ. ბევრი გუნდი ამას ვერ შეძლებდა. ვაგრძელებთ მუშაობას და ყველაფერს გავაკეთებთ იმისთვის, რომ ჯგუფიდან გავიდეთ. ორ ფრონტზე გვიწევს ბრძოლა, მაგრამ შეგვწევს იმის ძალა, რომ ორივეგან წარმატებულები ვიყოთ", - აღნიშნა სარიმ.


ყოველდღიური სპორტული გაზეთი "ლელო"

1188
მკითხველის კომენტარები / 0 /
მსგავსი ამბები
რუბრიკის სხვა სიახლეები