ერთი ამოსუნთქვით: გენო პეტრიაშვილმა ბულგარეთიდან ოქრო ჩამოიტანა

თავისუფალ ჭიდაობაში ევროპისა და მსოფლიოს ჩემპიონი, ოლიმპიური პრიზიორი გენო პეტრიაშვილი (125) ბულგარეთის საერთაშორისო ტურნირის ჩემპიონია. სოფიაში ჩატარებული დან კოლოვისა და ნიკოლა პეტროვის მემორიალი გორელმა ტალანტმა ჩვეულად, ერთი ამოსუნთქვით ჩაატარა და მეტოქეებს კვლავაც გრიგალივით გადაუქროლა - თავდაპირველად ბულგარელი დანიელ ვასელინოვი პირველივე პერიოდში "დააშამათა" - 10:0 და წმინდა მოგება, ნახევარფინალში კი იმავე ანგარიშით ასევე იოლად დაამარცა ბერძენი იოანის კარგაკიოტაკისი.

ფინალში ჩვნებურმა ქულებით იმარჯვა რუს მურადინ კუშხოვთან - 5:0, თუმცა ეს სულაც არ ნიშნავს, რომ გაუჭირდა ან რუსთა ჩეჩენი ათლეტი მისი სადარი მეტოქე იყო. სულაც არა - ალბათ, პეტრიაშვილმა შესაძლებლობების ნახევარიც არ გამოავლინა, იმდენად ილოლად მოიგო, ხოლო კუშხოვი მარცხს შეგუებული ჩანდა. პეტრიაშვილმა ამ ხუთიდან სამი ქულა წრიდან გაყვანით მოიპოვა. თავიდან ეს პირველივე წუთებზე გააკეთა, როცა რუსმა მაღალქულიან გდებას თვითშეწირვის მეთოდი არჩია და აშკარად გაექცა გარეთ.

⊂გენო პეტრიაშვილი #1 გორელი სპორტსმენია⊃

მომდევნო ორ ეპიზოდში ჩვენებური ფეხში სევიდა. კუშხოვი თითქოს კი ჩაუწვა ილეთის დასაბლოკად, მაგრამ გენომ ორივეჯერ იოლად ასწია და გაიყვანა იმის მიუხედავად, რომ რუსთა ოსი თავკაცი ჯამბულათ თედეევი ჩეჩენს აქტიურად მოუწოდებდა ზონაში დარჩენისკენ. გენომ ის ოქრულიანი გდებაც ფეხში შესვლიდან გააკეთა - ილეთი ასე კი წამოიწყო, მაგრამ მერე წელზე გადავიდა და გადააგდო.

სოფიაში ეს ტუირბნირი სამივე საჭიდაო სტილში ჩატარდა, თუმცა ჩვენგან მხოლოდ ვაჟები გამოდიოდნენ ორივე გუნდით, ქალებში კი მონაწილე არ გვყავდა. მთლიანობაში, ჩვენმა გაერთიანებულმა გუნდმა ბულგარეთში 9 მედალი მოიპოვა: 1 ოქრო, 3 ვერცხლი და 4 ბრინჯაო.

აქედან თავისუფალი სტილით მოჭიდავეთა მონაგარი 5 მედალია - თითო ოქრო-ვერცხლი და 3 ბრინჯაო. როგორც გითხარით, ჩემპიონი პეტრიაშვილი გახდა, ირაკლი მწითურმა (92) კი ფინალური პაექრობა დათმო რუსთა ოლიმპიურ, მსოფლიოსა და ევროპის ჩემპიონ აბდულრაშიდ სადულაევთან. მესამეზე ოთარ გოგავა (61), ჯაბა ყველაშვილი და ნიკა კენჭაძე (ორივე - 79) გავიდნენ.

ბერძენ-რომაელთა მონაგარი 4 ჯილდო - 2-2 ვერცხლი და ბრინჯაოა. ფინალში თორნიკე ძამაშვილი (82) და ზვიად პატარიძე (130) დამარცხდნენ, თუმცა ძამაშვილმა რეალურად წააგო პოლონელ ედგარ ბაბაიანთან, პატარიძე კი ტრავმის გამო ფინალში არ გასულა საჭიდაოდ თურქთა მსოფლიოს სამგზის ჩემპიონ რიზა კაიაალპთან. ბრინჯაოს მედლები რამაზ ზოიძემ (72) და გიორგი მელიამ (97) მოიპოვეს.

2679
მკითხველის კომენტარები / 0 /
მსგავსი ამბები
რუბრიკის სხვა სიახლეები
;