[VIDEO] პეტრიაშვილი მსოფლიომაც აღიარა

სეზონის ბოლოს ნომინანტები მსოფლიოს გაერთიანებული ჭიდაობის ფედერაციამაც დაასახელა, მათ შორის კი ერთი ქართველიცაა - თავისუფალი სტილით ჭიდაობაში მსოფლიოს ზედიზედ სამგზის ჩემპიონი გენო პეტრიაშვილი (125) მესამეა. უკვე ამ ნომინაციებს საკუთარი კრიტერიუმით ავლენს - გარკვეულ ტურნირებზე მოპოვებული ადგილების მიხედვით ქულებს აჯამებს და ასე გამოჰყავს საუკეთესო შედეგის მქონე ათლეტი. წლეულს ამ კრიტერიუმით თავისუფალი სტილის ჭიდაობაში საუკეთესო ფალავანი იტალიელთა ნატურალიზებული კუბელი, ევროპის სამგზის და მსოფლიოს ჩემპიონი, ოლიმპიური პრიზიორი ფრენკ მარკეზ ჩამიზო (70) გახდა, ვინც წლეულს მსოფლიოს ფინალიც იჭიდავა, მაგრამ რუსთა ოს ზაურბეკ სიდაკოვთან დამარცხდა, მეორე ადგილზე კი ამერიკელი მსოფლიოს მოქმედი ჩემპიონი ჯეიდენ კოქსი გავიდა. ჩამიზომ საუკეთესოს ტიტული ამერიკელ დევიდ ტეილორს ჩამოართვა და ჯილდოდ 30 ათასი შვეიცარიული ფრანკი მიიღო. კოქსი 20 ათასი, ხოლო პეტრიაშვილი 10 ათასი შვეიცარიული ფრანკით დაჯილდოვდა.

„კმაყოფილი ვარ, მაგრამ არა სრულყოფილად, არამედ - მხოლოდ 80 პროცენტით, რადგან წავაგე მსოფლიოს ჩემპიონატის ფინალი, მე კი მთელი წელიწადი მხოლოდ იმისთვის ვვარჯიშობდი, რომ გავმხდარიყავი მსოფლიოს ჩემპიონი“ - განაცხადა ჩამიზომ.

ბერძნულ-რომაულ ჭიდაობაში 2019 წლის სეზონის საუკეთესო მოჭიდავე უნგრელი ვიქტორ ლორინცი (87) გახდა, მეორეზე იაპონელი მსოფლიოს მოქმედი გამარჯვებული შინობუ ოტა (63) გავიდა, მესამე ადგილი კი მსოფლიოს აწ უკვე შარშანდელმა ჩემპიონებმა, უკრაინელმა ჟან ბელენიუკმა (87) და რუსთა ინგუშმა მუსა ევლოევმა (87) გაინაწილეს. არადა, ბელენიუკმა წლეულს მსოფლიოს ჩემპიონატის ფინალი ლორინცს მოუგო, თუმცა მადიარმა სხვა, უვვ-ს სარეიტინგო შეჯიბრებებში ივარგა და პირველობაც ამით დაიბევა.

ქალებში წლის საუკეთესოდ მსოფლიოს კიდევ ერთი შარშანდელი გამარჯვებული, ამერიკელი ტამირა მენსაჰი (68) დაასახელეს, მეორე-მესამე ადგილები კი ყირგიზთა კიდევ ერთ მოქმედ მსოფლიოს ჩემპიონ აისულუ ტინიბეკოვასა (62) და გერმანელ ალინე როტერის (76) ერგოთ. აღსანიშნავია, რომ ტინიბეკოვა პირველი ყირგიზი ქალია, ვინც ჭიდაობაში მსოფლიოს ჩემპიონის ტიტულს დაეუფლა.

8221
მკითხველის კომენტარები / 0 /
მსგავსი ამბები
რუბრიკის სხვა სიახლეები
;