პიონჩანიდან. ბევრი სენსაცია და 17 წლის ჩემპიონი

დღე პირველი

პიონჩანის თამაშების პირველი ჩემპიონი გახდა შვედი მოთხილამურე შარლოტ კალა. 15-კილომეტრიანი სკიატლონის ფინიშამდე 3 კილომეტრით ადრე, მან შეტევა წამოიწყო და რისკმა გაამართლა. ვერც დიადმა მარიტ ბიორგენმა და ვერც ფინელმა კრისტა პიარმაკოსკიმ შეძლეს ახლა უკვე სამგზის ოლიმპიური ჩემპიონის დაწევა.

ორი დღის განმავლობაში, პიონჩანში ძალიან ბევრი სენსაცია მოხდა. ერთ-ერთი იყო ჰოლანდიელი კარლეინ ახტერეკტეს გამარჯვება ციგურებით რბოლაში 3000 მეტრზე. აქამდე, ამ ჰოლანდიელს ერთი მოგებაც არ ჰქონდა მსოფლიოს თასის ეტაპებზე. ახტერეკტემ გაუსწრო თავის სახელოვან თანამემამულეებს - ირენ ვიუსტსა და ანტუანეტ დე იონგს.

კაცებს შორის ნორმალურ ტრამპლინზე გერმანელმა ანდრეას ველინგერმა მოიგო, რომელსაც დაუჯერებელი მეორე ცდა გამოუვიდა - ნახტომი იდეალური იყო როგორც ტექნიკით, ასევე სიგრძითაც. შედეგად, მეორე ცდის წინ მეექვსე ადგილზე მყოფი ველინგერი პირველ ადგილზე გადავიდა.

მეორე და მესამე ადგილებზე ნორვეგიელები - იოჰან ანდრე ფორფანგი და რობერტ იოჰანსონი აღმოჩდნენ. არადა, პირველი ცდის შემდეგ, ორი პოლონელი იყო წინ - ჰულა და შტოხი, მაგრამ ფსიქოლოგიურად "გადაიწვნენ".

ბიატლონში მედლების პირველი კომპლექტი გათამაშდა - ქალთა სპრინტერულ რბოლაში. სპორტსმენებს ურთულეს პირობებში მოუწიათ გამოსვლამ და საბოლოოდ, მხოლოდ სამმა ბიატლონისტმა შეძლო უშეცდომოდ სროლა.

ერთ-ერთი იყო გერმანელი ლაურა დალმაიერი და სწორედ ის გახდა ჩემპიონი. მეორე და მესამე ადგილების მფლობელთა ვინაობა სენსაციურია - ნორვეგიელი მარტე ოლსბუ და ჩეხი ვერონიკა ვიტკოვა.

მთავარი ფავორიტი ანასტასია კუზმინა ძალიან სწრაფად მოძრაობდა, მაგრამ სროლისას სამჯერ ააცილა და სლოვაკი მედლების გარეშე დარჩა, ისევე, როგორც სხვა გრანდები - დომრაჩევა, მაკარაინენი და სხვები.

შორტ-ტრეკში მასპინძელ კორეას დიდი გეგმები აქვს - რვა დისციპლინიდან ექვსში გეგმავს ოქროს და ერთი უკვე აიღო - 1500 მეტრი კაცებს შორის, ოლიმპიური რეკორდით მოიგო ჰიო-იუნ ლიმმა.

საინტერესოა, რომ მესამე ადგილი სემიონ ელისტრატოვმა (ოლიმპიური ათლეტები რუსეთიდან) დაიკავა, რომელსაც 2016 წელს მელდონიუმი უპოვეს, მაგრამ მაინც დაუშვეს თამაშებზე.

დღე მეორე

ძალიან კარგი სანახავი გამოდგა კაცების სკიატლონი. რა თქმა უნდა, ფავორიტები ნორვეგიელები იყვნენ და მათ დაიკავეს კიდეც მთელი პოდიუმი, მაგრამ ყველასთვის გასაკვირად, მედლის გარეშე დარჩა მთავარი ნორვეგიელი, მსოფლიოს თასის ლიდერი იოჰანეს კლებო.

გამარჯვება სიმენ კრიუგერმა მოიპოვა, რომელიც დისტანციის სტარტზე დაეცა, ჯოხი დაკარგა, ტრავმა კინაღამ მიიღო, მაგრამ არა მარტო დაეწია ძირითად ჯგუფს, არამედ მოგებაც შეძლო.

ბიატლონში კაცების სპრინტი სენსაციურად დასრულდა - პრიზიორებს შორის არ აღმოჩნდა არც მარტენ ფურკადი და არც იოჰანეს ბოე, რომლებსაც წელს მსოფლიოს თასის 15 სტარტიდან 14 ჰქონდათ მოგებული. ფრანგმა სამი ტყვია ააცილა, ნორვეგიელმა - ოთხი.

საბოლოოდ, გაიმარჯვა იმან, ვინც არცერთხელ არ ააცილა - გერმანელმა არნდ პაიფერმა. მეორე და მესამეზე კი საერთოდ "ნოუნეიმები" გავიდნენ - ჩეხი მიხალ კრჩმარი და იტალიელი დომინიკ ვინდიში.

19 წლის ფრანგმა პერენ ლაფონმა და 17 წლის ამერიკელმა რედმონდ ჯერარდმა მოიგეს ქალების მოგული (ფრისტაილი) და კაცების სლოუპსტაილი (სნოუბორდი).

მედლების ბოლო კომპლექტი მამაკაცებს შორის ერთადგილიან ციგებში გათამაშდა. ბოლო მეოთხე ცდა სენსაციურად დასრულდა. სამი ცდის შემდეგ, ლიდერმა და ლეგენდამ ფელიქს ლოხმა ბოლო დაშვება ჩააგდო და საპრიზო სამეულის მიღმა აღმოჩნდა.

ოლიმპიური ჩემპიონი ავსტრიელი დავიდ გლაირშერი გახდა, მეორეზე გავიდა ამერიკელი კრის მაზდზერი, მესამეზე - გერმანელი იოჰანეს ლუდვიგი.

ყოველდღიური სპორტული გაზეთი "ლელო"
1276
მკითხველის კომენტარები / 0 /
მსგავსი ამბები
რუბრიკის სხვა სიახლეები
;