პიონჩანი 2018: ახალი ისტორია უნგრეთისგან და დომრაჩევასგან

დღის კულმინაცია აღმოჩნდა ბიატლონის ესტაფეტა ქალებს შორის. ძლიერი თოვლისა და ქარის გამო, ეს სტარტი აბსოლუტურად არაპროგნოზირებადი გახდა.

მთელი დისტანციის განმავლობაში, ათი სხვადასხვა გუნდი იყო ლიდერი. საერთოდ არაფერი გამოუვიდა მთავარ ფავორიტ გერმანიას, ვერც ნორვეგიამ აიცილა პრობლემები.

ასეთ პირობებში, გამარჯვება მოიპოვა ბელარუსის ნაკრებმა, რომელსაც ერთი ვარსკვლავი ჰყავს დარია დომრაჩევას სახით. ის არ დააღალატეს შედარებით დაბალი კლასის თანაგუნდელებმა და როცა ბელარუსების ლიდერმა ესტაფეტა ჩაიბარა, თითქმის ცხადი იყო, ეს გუნდი პირველობას არავის დაუთმობდა და ასე მოხდა კიდეც.

მორიგი გმირობა ჩაიდინა ამ ოლიმპიადაზე შვედმა ჰანა ობერგმა. ინდივიდუალური რბოლის ჩემპიონმა უიმედო მდგომარეობიდან მეორე ადგილზე გაიყვანა თავისი გუნდი. სტაბილური იყო საფრანგეთის ნაკრები, რომელმაც ბრინჯაო მოიგო.

დომრაჩევა პირველი ქალი ბიატლონისტი გახდა, ვისაც ოთხი ოლიმპიური ოქრო აქვს მოგებული. სამ-სამი ოქრო აქვთ სლოვაკ ანასტასია კუზმინას და გერმანელ კატია ვილჰელმს.

ყოველდღიური სპორტული გაზეთი "ლელო"
882
მკითხველის კომენტარები / 0 /
მსგავსი ამბები
რუბრიკის სხვა სიახლეები
;