პიონჩანი 2018. ლიცენზიები და პრეტენზიები

ცუდია, როცა ოლიმპიურ თამაშებში მონაწილეობის ლიცენზიის მოპოვებას სპორტსმენი ადეკვატური შედეგით ვერ ამართლებს.

მეტიც, ოლიმპიურ სარბიელზე ზოგი ისე უსუსურად გამოდის, ასპარეზობას ვერც ამთავრებს. სხვა საქმეა, ძლიერ, დაძაბულ სპორტულ კონკურენციას შეწირული მოლოდინი.

სპორტია და ყველაფერი ხდება. რა შეიძლება ითქვას, ამ პრინციპებიდან გამომდინარე, ჩვენს ოლიმპიელებზე, რომლებმაც დღემდე უკვე იასპარეზეს? ყველაფერი გაკეთდა მათი შესაძლებლობების სრულად გამოსავლენად?

პიონჩანში, ზამთრის თამაშებზე გიორგი სოღოიანის მოხვედრა უკვე თავისთავად იყო წარმატება. ოლიმპიადაზე კი ბაკურიანელი სპორტსმენი (ჯერ 21 წლისაც არ არის) 32-ე ადგილზე გავიდა, შეგახსენებთ, რომ ოლიმპიური კვოტით დადგენილ მსოფლიოს 40 უძლიერეს მოციგავეთა კოჰორტაში ჩვენი ახალბედა ოლიმპიელი 38-ე შედეგით შევიდა. ასე რომ, დებიუტანტის წინსვლა უდავოა.

დანარჩენს ამ სპორტსმენზე და საქართველოში საციგაო სპორტის მდგომარეობა-პერსპექტივაზე მის მწვრთნელთან და ამ ფედერაციის პრეზიდენტთან ფელიქს ქუმარიტაშვილთან ინტერვიუდან შეიტყობთ, რომლის შემოთავაზებას "ლელოს" მომდევნო ნომერში ვგეგმავთ.

გამოცდილმა ოლიმპიელმა, ნინო წიკლაურმაც საგრძნობლად გააუმჯობესა მაჩვენებლები. გიგანტურ სლალომში ნინო 46-ე იყო, ხოლო სლალომში - 39-ე. ეს შედეგი მის ოლიმპიურ ბიოგრაფიაში საუკეთესოა.

მორის ყვითელაშვილმა პიონჩანში გეგმის მინიმუმი შეასრულა - მოკლე პროგრამაში მოიპოვა უძლიერესთა ფინალურ ეტაპზე ოლიმპიური შეჯიბრების გაგრძელების უფლება.

წილისყრით გარკვეული უპირატესობის შანსი კი მიეცა, მაგრამ 24 ფინალურ მონაწილეს შორის ბოლო ადგილზე გავიდა, რაც, ცხადია, დასანანია, მისგან უკეთეს შედეგს მოელოდნენ და არა მხოლოდ იმით დაკმაყოფილებას, რომ "მთავარია მონაწილეობა."

18 თებერვალს, საქართველოდან ამ ოლიმპიადის ბოლო მონაწილის, სამთომეთხილამურე იასონ აბრამაშვილის ჯერი დადგა. 29 წლის ქართველი სპორტსმენისთვის ეს მეოთხე ოლიმპიადაა.

იასონი გუშინ, გიგანტურ სლალომში გამოსვლით ჩაერთო ოლიმპიურ ასპარეზობაში. ჩვენს სპორტსმენს პირველი და მეორე დაშვება, გამოცდილების გათვალისწინებით, ტაქტიკურად ჭკვიანურად ჰქონდა გათვლილი, მაგრამ ურთულეს ტრასაზე მასაც, ისევე როგორც არაერთ ძლიერ სპორტსმენს, პირველსავე ცდაზე გაუცრუვდა იმედი.

იასონმა, სამწუხაროდ, ბოლო მონაკვეთზე დაუშვა ტექნიკური ხარვეზი და წაიქცა, რითაც დაკარგა მეორე ეტაპზე შეჯიბრების გაგრძელების უფლება.

22 თებერვალს აბრამაშვილი სლალომში იასპარეზებს, რითაც სპორტსმენიც და ჩვენი ოლიმპიური გუნდიც ბოლო შანსის სათავისოდ გამოყენებას შეეცდება.

შეგახსენებთ, რომ ოლიმპიურ სარბიელზე, ვაჟთა სლალომში, საქართველოდან ჯერჯერობით სწორედ ამ სპორტსმენს აქვს საუკეთესო მაჩვენებელი - სოჭი (2014) 22-ე ადგილი. სოჭში მან 2006 წლის ოლიმპიადაზე მოპოვებული თავისივე მიღწევა (31-ე) გააუმჯობესა.

თენგიზ გაჩეჩილაძე
პიონჩანიდან

882
მკითხველის კომენტარები / 0 /
მსგავსი ამბები
რუბრიკის სხვა სიახლეები
;