პირველად NBA-ს თასი კანადაში - 10 ფაქტი ფინალის შესახებ

ეროვნული საკალათბურთო ასოციაციის ფინალი „ტორონტოს“ მოგებით დასრულდა. ფინალური სერია ექვსი მატჩი გაგრძელდა. გთავაზობთ 10 ისტორიასა და ფაქტს, რომელიც ამ სერიას უკავშირდება.

აშშ უორიორზის წინააღმდეგ
„უორიორზი“, შესაძლოა, ფავორიტად მიიჩნეოდა, მაგრამ ნამდვილად არ ყოფილა პუბლიკის სიმპათია. კვლევის შედეგად, რომელიც ფინალის წინ გამოქვეყნდა, აშშ-ის 50 შტატიდან 47-ში მაყურებელი „ტორონტოს“ საგულშემატკივროდ ემზადებოდა. გამონაკლისი იყო - ნევადა, ჰავაი და, რა თქმა უნდა, კალიფორნია.

მეომრების ხუთი ფინალი
„გოლდენ სტეიტი“ ზედიზედ მეხუთედ თამაშობდა NBA-ის მთავარ ფინალში, რაც დასავლეთ კონფერენციაში არასოდეს მომხდარა. აღმოსავლეთში ეს მხოლოდ ერთხელ შეძლო ერთმა გუნდმა - „ბოსტონმა“. ეს ჯერ კიდევ 50-იანი და 60-იანი წლების მიჯნაზე მოხდა და მაშინ „სელტიქსი“ ზედიზედ 10 ფინალში გავიდა (1957-66) და ცხრა ტიტული მოიგო. „უორიორზმა“, როგორც უკვე ვიცით, მხოლოდ სამჯერ გაიმარჯვა.

გოლდენ სტეიტის ვარსკვლავთა ტრავმები
ტიტულისთვის ბრძოლა „გოლდენ სტეიტს“ ძალიან ძვირად დაუჯდა. „მეომრების“ ერთბაშად ორმა სუპერვასკვლავმა მიიღო უმძიმესი ტრავმა და შესაძლოა, მათ მთელი მომავალი სეზონის გამოტოვებამ მოუწიოთ.

კევინ დურანტმა ჯერ კიდევ „ჰიუსტონის“ წინააღმდეგ კონფერენციის ნახევარფინალში გადაიბრუნა ფეხი, რის გამოც გამოტოვა „როკეტსთან“ ბოლო მატჩები და მთელი სერია „პორტლენდთან“. ფორვარდი „ტორონტოსთან“ სერიის მეხუთე მატჩში დაბრუნდა, მაგრამ მეორე მეოთხედში ახალი ტრავმა მიიღო. როგორც გაირკვა, ამჯერად, დურანტმა აქილევსის მყესი გაიწყვიტა! მოგვიანებით გაირკვა, რომ მას ჯანმრთელობა არ აძლევდა ამ თამაშში მონაწილეობის საშუალებას. ახლა კი მკურნალობა მინიმუმ ერთ წელს დაიკავებს.

მეექვსე მატჩში კი დაიმტვრა კლეი ტომპსონი. მან არენა ყავარჯნებით დატოვა. მოგვიანებით გამოაცხადეს, რომ მცველს მუხლის ჯვარედინი მყესების გაწყვეტა დაუდგინეს. ასეთი ტრავმის შემდეგაც აღდგენამ შეიძლება ერთი წელი ან წელიწად-ნახევარი დაიკავოს.

კარის მორიგი აცილება
სტეფ კარი ლიგის ისტორიაში უძლიერეს სნაიპერად მიიჩნევა და ზუსტი სამქულიანების რაოდენობით თითქმის ყველანაირი რეკორდის მფლობელია. მაგრამ სწორედ მისმა აცილებამ გახსნილი პოზიციიდან სირენამდე ექვსი წამით ადრე (110:111-ზე), არ მისცა „გოლდენ სტეიტს“ მატჩის მოგების საშუალება. გასაოცარია, მაგრამ საკუთარი რეკორდების მიუხედავად, კარიმ პლეი ოფის თამაშებში რვიდან რვა სამქულიანი ააცილა ბოლო 24 წამში, როცა მის ტყორცნას შეეძლო „გოლდენ სტეიტი“ წინ გაეყვანა.

ბოლო მატჩი ორაკლ-არენაზე
„ტორონტოსთან“ სერიის მეექვსე მატჩი ბოლო აღმოჩნდა „გოლდენ სტეიტისთვის“ მის ამჟამინდელ არენაზე. ახალი სეზონიდან „უორიორზი“ ოკლენდიდან სან ფრანცისკოში გადაინაცვლებს. გუნდთან გამოსათხოვებლად 20 ათასზე მეტი მაყურებელი შეიკრიბა, მაგრამ „მეომრებმა“ მაინც წააგეს. სწორედ ამ მატჩში საბოლოოდ დაკარგეს მათ ტიტულის შენარჩუნების ყველა შანსი.

კანადის პირველი წარმატება
როცა „მონრეალ კანადიენსმა“ 1993 წელს სტენლის თასი მოიპოვა, კანადელი გულშემატკივრები ვერც კი წარმოიდგენდნენ, რომ თავიანთი ქვეყნის კლუბების ახალი წარმატებისთვის 26 წელი ლოდინი მოუწევდათ! და ნამდვილად ვერ იფიქრებდნენ, რომ ტრიუმფი შედგებოდა არა NHL-ში, არამედ NBA-იში! სხვათა შორის, „რეპტორზი“ იმ 1993 წელს ჯერ არ არსებობდა - გუნდი მხოლოდ 1995 წელს დააარსეს. NBA-ის ეს ფინალი პირველი იყო „ტორონტოსთვის“ და მთლიანად კანადისთვის. შესაბამისად, პირველად მთავარი საკალათბურთო ლიგის ისტორიაში ჩემპიონი გახდა არაამერიკული გუნდი.

ერთი კანადელი კანადურ გუნდში
NBA-ის კლუბების შემადგენლობებში, დღეისთვის 12 კანადელი მოთამაშე ირიცხება, მაგრამ მათგან მხოლოდ ერთი თამაშობს „ტორონტოში“. თუმცა, „თამაშობს“ ხმამაღალი ნათქვამია. „უორიორსთან“ ფინალურ სერიაში კრის ბუშერი ერთხელაც არ გამოჩენილა მოედანზე, ოთხ მატჩში საერთოდ განაცხადში არ ყოფილა. მიუხედავად ამისა, ფორმალობა შესრულებულია - ბუშერი გახდა ერთადერთი კანადელი კანადურ კლუბში, ვინც NBA-ის ჩემპიონის ბეჭედი დაისაკუთრა. თუმცა, კანადელიც პირობითადაა - კრისი სენტ ლუსიაში დაიბადა.

ბუშერისა და აშშ-ის წარმომადგენლების გარდა, გამარჯვება ასევე მოიპოვა ორმა ესპანელმა (მარკ გასოლი და კონგოში დაბადებული სერჟ იბაკა), ერთმა კამერუნელმა (პასკალ სიაკამი) და ერთმა ბრიტანელმა (ო-ჯი ანუნობი).

მეორეჯერ MVP
როგორც მოსალოდნელი იყო, ფინალური სერიის უძვირფასესი მოთამაშე გახდა კავაი ლეონარდი. გასული წლის ზაფხულში ის „სან ანტონიოდან“ გაცვალეს „ტორონტოს“ მაშინდელ ლიდერ დემარ დეროზანში. ამ გაცვლის მიზეზი კი ლეონარდის კონფლიქტი იყო „სპურსის“ ხელმძღვანელობასთან.

„უორიორსთან“ ექვს შეხვედრაში კავაი საშუალოდ 28.5 ქულას, 9.8 მოხსნასა და 4.2 შედეგიან გადაცემას აგროვებდა. ის მხოლოდ მესამე მოთამაშეა ისტორიაში, ვისაც ფინალის MVP-ის პრიზი ორ სხვადასხვა გუნდში აქვს მიღებული. კავაიმდე ეს შეძლეს ქარიმ აბდულ-ჯაბარმა („მილუოკიში“ და „ლეიკერსში“) და ლებრონ ჯეიმსმა („მაიამი“ და „კლივლენდი“). თავად ლეონარდი პირველად ფინალური სერიის MVP 2014 წელს გახდა „სან ანტონიოს“ შემადგენლობაში. პირველი ჩემპიონობაც სწორედ მაშინ მოიპოვა.

პატრიკ მაკოუს სამი ბეჭედი
თუ „რეპტორზის“ კალათბურთელთა უმრავლესობისთვის ეს საჩემპიონო ბეჭდები პირველია კარიერაში, პატრიკ მაკოუ უკვე მესამედ ხდება NBA-ის ჩემპიონი. რთულია მას მნიშვნელოვანი მოთამაშე უწოდო - პლეი ოფის ფინალში მან მხოლოდ ოთხ მატჩში ითამაშა საშუალოდ სამი წუთი. მიუხედავად ამისა, სამგზის ჩემპიონია. წინა ორ სეზონში მან „გოლდენ სტეიტში“ მოიპოვა საჩემპიონო ბეჭდები. ამის შემდეგ, ის ზაფხულში „კლივლენდში“ გაუშვეს, იქიდან კი ზამთარში გაცვლის შედეგად „ტორონტოში“ აღმოჩნდა. როგორც გაირკვა, მესამე ჩემპიონობის მოსაგებად!

გასოლების რეკორდი
მარკ გასოლი ამ სეზონს „მემფისის“ შემადგენლობაში იწყებდა, მაგრამ ზამთრის სატრანსფერო პერიოდის დროს გაცვალეს „ტორონტოში“. და ახლა, ესპანელი საჩემპიონო ბეჭდის მფლობელია! პირველად ისტორიაში, NBA-ის ჩემპიონები ძმები გახდნენ, თუნდაც, სხვადასხვა წელს. შეგახსენებთ, რომ პაუ გასოლი „ლეიკერსთან“ ერთად ორჯერ იყო ჩემპიონი - 2009-10 წლებში.

ჩემპიონების მწვრთნელი: დებიუტანტი
გასაოცარია, მაგრამ ფაქტია - ჩემპიონობამდე „ტორონტო“ მიიყვანა NBA-ის დებიუტანტმა მწვრთნელმა! ნიკ ნურსმა „რეპტორზი“ ამ სეზონის სტარტზე ჩაიბარა და მანამდე არ ჰქონია მსოფლიოს უძლიერეს ლიგაში მთავარ მწვრთნელად მუშაობის გამოცდილება.

უფრო მეტიც, თავის კარიერას ის დიდი ბრიტანეთის გუნდებში და ბელგიის „ოსტენდეში“ იწყებდა. მიუხედავად ამისა, NBA-იში აბსოლუტურ დებიუტანტად ის არ უნდა ჩაითვალოს - „ტორონტოს“ სისტემაში ასისტენტის რანგში 2013 წლიდან მუშაობდა.

და კიდევ, ნურსი გახდა პირველი მწვრთნელი ისტორიაში, ვისაც მოუგია D-ლიგა („განვითარების ლიგა“ - 2011 წელს „აიოვასთან“ ერთად და 2013 წელს „რიო გრანდესთან“ ერთად).

ყოველდღიური სპორტული გაზეთი "ლელო"
656
მკითხველის კომენტარები / 0 /
მსგავსი ამბები
რუბრიკის სხვა სიახლეები
;