პირველი სალიცენზიო ტურნირი სეულში - ვერა გავაწყვეთ...

სამხრეთ კორეის დედაქალაქ სეულში მოხმალავეთა გრან პრის გათამაშებაში, რომელიც 2020 წლის ოლიმპიური თამაშების პირველი სალიცენზიო ტურნირი იყო, საქართველოს ხუთი მოფარიკავე მონაწილეობდა.

საგულისხმოა, რომ FIE-ს კლასიფიკაციაში გრან პრიზე მოპოვებული სარეიტინგო ქულები კონტინენტის პირველობაზე მოპოვებული ქულების ტოლფასია, ამიტომ სეულში უძლიერესმა მოხმალავეებმა მოიყარეს თავი.

წლეულს ასეთივე შეჯიბრებას ქაირომ უმასპინძლა. ეგვიპტეში მაშინ შესანიშნავად იასპარეზა სანდრო ბაზაძემ, რომელმაც ქართული ფარიკაობის ისტორიაში პირველად მსგავსი პაექრობის ბრინჯაოს მედალი მოიპოვა. სეულშიც მან კარგად დაიწყო ჯგუფური ეტაპი - ექვსიდან ხუთი შეხვედრა მოიგო. ზედიზედ დაამარცხა მაქსიმ პიანფეტი (საფრანგეთი, 5:4), ბიორნ ჰუებნერი (გერმანია, 5:1), ტამონ იოშიდა (იაპონია, 5:1), ჯორჯ იაკო (ავსტრალია, 5:2), მარია პასკუალ დი ტელა (არგენტინა, 5:3) და ერთადერთი ორთაბრძოლა ეგვიპტელ მუსტაფა აიმანთან დათმო - 1:5. პლეი ოფში სანდრომ აჯობა ნიკოლა რუსეს

(საფრანგეთი, 15:11), მეორე პაექრობა კი მსოფლიოს ჩემპიონატების ერთი ოქროს, ორი ვერცხლისა და ოთხი ბრინჯაოს, ევროპის ჩემპიონატების თითო ოქრო-ვერცხლისა და 3 ბრინჯაოს მფლობელ ტამაშ დეჩისთან (უნგრთი) წააგო ერთი ჩხვლეტით - 14:15 და საბოლოოდ 43-ე ადგილით დაკმაყოფილდა. 

ჯგუფურ ეტაპზე თავი გამოიჩინა ბექა ბაზაძემაც - მანაც ხუთი მეტოქე დაჯაბნა: იუნჰო ვონი (კორეა, 5:2), ვლადისლავ პოზდნიაკოვი (რუსეთი, 5:4), სებასტიან კელერი (კოლუმბია, 5:3), ბენო შნეიდერი (გერმანია, 5:2), ზაკ ლეონჰარდი (ავსტრალია, 5:1) და მხოლოდ ში ვანთან (ჩინეთი, 2:5) წააგო. მერე პლეი ოფში იუნჰო ვონთან დამარცხდა - 12:15 და 69-ე ადგილზე გავიდა.

ამჯერად საკუთარი შესაძლებლობები ვერ გამოავლინა მიხეილ მარდალეიშვილმა, რომელმაც ჯგუფში მხოლოდ იადრინ დიკს (ავსტრალია, 5:3) სძლია, დანარჩენ ორთაბრძოლებში მოწინააღმდეგეებთან ვერაფერს გახდა და 160 მონაწილეს შორის 144-ე ადგილი დაიკავა. საპრიზო ადგილები კი ასე განაწილდა: 1. სანგუკ ოჰი (კორეა), 2. არონ სილადი (უნგრეთი), 3. მაქს ჰარტუნგი (გერმანია) და იუნგჰვან კიმი (კორეა).

ქალებში 2017 წლის ევროპის ჩემპიონმა თეოდორა კახიანმა ჯგუფში სამ მეტოქეს აჯობა - დია პერმატასარს (ინდოეთი, 5:1), ჯესიკა კორბისა (დიდი ბრიტანეთი, 5:1) და ანა ლიმბახს (გერმანია, 5:3), სამ მოწინააღმდეგესთან ვერაფერი გააწყო. პლეი ოფში ორი კონკურენტი ჩამოიშორა გზიდან - ჯილიან ადინსკი (აშშ, 15:10) და მარგო რიფკისი (საფრანგეთი, 15:12), ჩინელ იაძი ჩაოსთან დათმო შეხვედრა და 58-ე ადგილზე გავიდა. 

ლიკა ჯიჯეიშვილი, რომელმაც გრან პრიზე მხოლოდ ორი გამარჯვება (ალეხანდრა რომერო ბენიტესი, ვენესუელა, 5:3 და აილენ გრენჩი, პანამა, 5:3) მოიპოვა, პლეი ოფში ვერ მოხვდა და საბოლოოდ 117-ე იყო. 

კვარცხლბეკი: 1. ოლგა ხარლანი (რუსეთი), 2. იეონ კიმი (კორეა), 3. მანონ ბრუნე (საფრანგეთი), იეონ სეო (კორეა). 
მოხმალავეთა მესამე გრან პრი რუსეთის დედაქალაქ მოსკოვში 24-26 მაისს გაიმართება. 

ყოველდღიური სპორტული გაზეთი "ლელო"
519
მკითხველის კომენტარები / 0 /
მსგავსი ამბები
რუბრიკის სხვა სიახლეები
;