პლავები ზაგრებიდან: გაიცანით ხორვატიის ყველაზე ტიტულოვანი კლუბი,  რომელიც დღეს საქართველოს ჩემპიონს დაუპირისპირდება 

ჩემპიონთა ლიგის მეორე საკვალიფიკაციო ეტაპის პირველ მატჩს “საბურთალო” ზაგრების “დინამოს” წინააღმდეგ 23 ივლისს, მიხეილ მესხის სახელობის სტადიონზე გამართავს.

თამაში 21:30 საათზე დაიწყება და პირდაპირ რეპორტაჟს I არხი შემოგთავაზებთ.
ჩვენ კი გადავწყვიტეთ, ამ მოკლე ისტორიული ექსკურსით გაგაცნოთ ზაგრების “დინამო”...

ერთადერთი კლუბი ხორვატიაში 

კლუბი 1945 წლის მაისში, მეორე მსოფლიო ომის დამთავრებისთანავე დაარსდა - სამი ყველაზე წარმატებული ზაგრებული კლუბი (“ჰასკი”, “გრაჯანსკი” და “კონკორდია”) კომუნისტური მთავრობის ბრძანებით დაიშალა და ისინი 9 ივნისს ახალმა სპორტულმა საზოგადოებამ - “დინამომ” ჩაანაცვლა. 

ახალმა კლუბმა “გრაჯანსკიდან” მემკვიდრეობით მიიღო ფერი და ფანები, რადგან ამ კლუბის მოთამაშეთა დიდმა ნაწილმა კარიერა “დინამოში” გააგრძელა. პირველ წლებში გუნდი საშინაო მატჩებს კუტურაშკას სტადიონზე მართავდა, მაგრამ მალევე “ჰასკის” სტადიონზე გადავიდა. 

ზაგრებული კლუბის მეტსახელია “პლავი”, ანუ - “ლურჯები”. გუნდი თამაშობს ზაგრების “მაქსიმირზე”, რომლის ტევადობაა 35 423, თუმცა “საბურთალოსთან” მატჩში ტრიბუნები ცარიელი იქნება უეფას სანქციის გამო.

ზაგრების “დინამომ” 7-ჯერ მოიგო იუგოსლავიის ჩემპიონატი და სამჯერ გახდა თასის მფლობელი, ხოლო 1991 წელს ჩემპიონატი იუგოსლავიის დაშლის გამო დატოვა. 

ეს ერთადერთი კლუბია ხორვატიაში, რომელსაც ევროპული ტიტული აქვს მოპოვებული - 1967 წელს ზაგრების “დინამო” ბაზრობათა თასის (უეფას თასის წინამორბედი) ფინალში, ორი მატჩის ჯამში 2:0 (2:0, 0:0) დაამარცხა ინგლისური “ლიდს იუნაიტედი” და თავისი პირველი ევროპული ტურნირი მოიგო. 
სხვათა შორის, ბაზრობათა თასის ფინალში “პლავები” მანამდეც (1963) გავიდნენ, მაგრამ “ვალენსიასთან” წააგეს - 1:4 (1:2, 0:2).

ნათლობის პერიოდი

1992 წლიდან, როცა იუგოსლავია დაიშალა, “დინამო” ხორვატიის უმაღლეს დივიზიონში ასპარეზობს. იმავე წელს კლუბმა შეიცვალა სახელი და “ჰასკ გრაჯანსკი” დაირქვა. ერთ წელიწადში კვლავ შეიცვალა სახელი და უკვე ზაგრების “კროაციად” იწოდებოდა. სახელწოდების ცვლილება მიღებულ იქნა, როგორც პოლიტიკური ნაბიჯი ხელმძღვანელობის მხრიდან, რათა დაშორებოდნენ კლუბის კომუნისტურ წარსულს...

2000 წლის 14 თებერვალს კლუბმა კვლავ დაიბრუნა სახელი - “დინამო”. ხორვატიის მოქმედი ჩემპიონი, დამოუკიდებლობის პერიოდიდან მოყოლებული, ტიტულების რაოდენობით ხორვატიის საუკეთესო კლუბად ითვლება. ზაგრების “დინამო” ქვეყნის 20-გზის ჩემპიონი, თასის 15-გზის და სუპერთასის 5-გზის მფლობელია. 

ჩემპიონთა და  ევროპალიგაზე

ზაგრების “დინამო” ჩემპიონთა ლიგის ჯგუფურ ეტაპზე ზედიზედ გავიდა 1998/99, 1999/00, მერე 2011/12, 2012/13, ხოლო შემდეგ 2015/16, 2016/17 წლების სეზონებში. უეფას თასის ჯგუფურ ეტაპზე კი 2004/05, 2007/08 და 2008/09 წლების სეზონებში იასპარეზა.

“დინამოს” ბევრი ფეხბურთელი იცავდა იუგოსლავიის ნაკრების ღირსებას - ჟელკო ჩაიკოვსკი, ბრანკო ზებეცი, ზლატკო შკორიჩი, კრასნოდარ რორა, დრაჟენ ერკოვიჩი, ივან ხორვატი, სლავენ ზამბატა, რუდოლფ ბელინი... 

დამოუკიდებლობის პერიოდის თაობებიდან კი გამორჩეულები იყვნენ დავორ შუკერი, დარიო შიმიჩი, ბოშკო ბალაბანი, ივიცა ოლიჩი, ნიკო კრანჩარი, იოსიპ შიმუნიჩი, ედუარდო და სილვა, ლუკა მოდრიჩი, ვედრან ჩორლუკა, დანიელ პრანიჩი, დეიან ლოვრენი, ოგნიენ ვუკოევიჩი, დომაგოი ვიდა, მარიო მანჯუკიჩი... ასევე, მარკ ვიდუკა (ავსტრალია) და იენს ნოვოტნი (გერმანია). 

კლუბმა წამყვან ევროპულ კლუბებში არაერთი ძვირადღირებული ტრანსფერი განახორციელა: 2001 წელს ბოშკო ბალაბანი “ასტონ ვილაში” 7.8 მილიონ ევროდ გაუშვა, ედუარდო “არსენალში” 13,5 მილიონად, ვედრან ჩორლუკი 2007 წელს “მანჩესტერ სიტიში” - 13 მილიონად, ლუკა მოდრიჩი 2008 წელს “ტოტენჰემში” - 21 მილიონად, დეიან ლოვრენი - “ლიონში” 8 მილიონად, მარიო მანჯუკიჩი “ვოლფსბურგში” 2010 წელს 7 მილიონად, ხოლო 18 წლის მატეო კოვაჩიჩი 2013 წელს 11 მილიონ ევროდ “ინტერში”.

ყოველდღიური სპორტული გაზეთი "ლელო"
640
მკითხველის კომენტარები / 0 /
მსგავსი ამბები
რუბრიკის სხვა სიახლეები
;