პონომარი ტორპედოში ჩაირიცხა, ხაჩიძეს ელოდებიან. რატომ დადგა დღის წესრიგში სამწვრთნელო საკითხი?

ვიტალი პონომარმა სამედიცინო შემოწმება გაიარა და "ტორპედოს" ფეხბურთელი ოფიციალურად გახდა, - ამ ინფორმაციას ქუთაისური კლუბის ვებგვერდი ავრცელებს. უკრაინელი მოთამაშე საქართველოში რამდენიმე დღის წინ ჩამოვიდა და "ტორპედოსთან" ერთად ვარჯიშს შეუდგა...

სხვათა შორის, უგუნდობის მიუხედავად, ის საკმაოდ კარგ კონდიციებშია, რადგან ლუცკის "ვოლინიდან" წამოსვლის შემდეგ "ოლექსანდრიას" დუბლებში ვარჯიშობდა.

შეგახსენებთ, რომ ქუთაისელთა უკრაინელი ახალწვეული თავდამსხმელია, რომლის ტრანსფერიც დონეცკის "შახტარს" ეკუთვნოდა, მაგრამ ძირითადად უკრაინის დაბალი ლიგის გუნდებში თამაშობდა. 2014-19 წლებში პონომარი "ოლექსანდრიას" ღირსებას იცავდა (135 მატჩი, 26 გოლი) და მის რიგებში 2015 წელს ჯერ პირველი ლიგის გამარჯვებული გახდა, ხოლო 2019 წელს - ჩემპიონატის მესამეადგილოსანი.

ბოლოს 29 წლის პონომარი ლუცკის "ვოლინში" ირიცხებოდა, სადაც 2-წლიანი კონტრაქტი გაწყვიტა და ქუთაისელებს შეუერთდა. დიდი ალბათობით, ის განაცხადში 7 მარტის მატჩისთვის მოხვდება - ამ დღეს ქუთაისის ტორპედო" ეროვნული ლიგის მეორე ტურში "ეროსი მანჯგალაძეზე" "სამტერდიას" ესტუმრება.

დიდი ალბათობით, ოთხშაბათს "ტორპედო" ახალ ოფიციალურ მთავარ მწვრთნელსაც წარადგენს და, სავარაუდოდ, ეს იქნება ვლადიმერ ხაჩიძე - პროლიცენზიის მქონე მწვრთნელი, რომელმაც "ვიტ ჯორჯიასთან" კონტრაქტი უკვე გაწყვიტა.

კვლავ "ტორპედოში" იქნება მიხეილ აშვეთია, რომელსაც მთავარი მწვრთნელის პოსტის დაკავების უფლებას  ფეხბურთის ფედერაციის მიერ 2019 წელს დამტკიცებული ლიცენზირების ახალი წესი არ აძლევს - ეროვნული ლიგის მთავარ მწვრთნელად მხოლოდ პროლიცენზიის მქონე მწვრთნელმა უნდა იმუშაოს, აშვეთიას კი ეს სერთიფიკატი ჯერ არ აქვს.

1146
მკითხველის კომენტარები / 0 /
მსგავსი ამბები
რუბრიკის სხვა სიახლეები
;