პორტუგალიის ტურნირი: ორივე ფრონტს მხოლოდ შაფათავა შემორჩა

პორტუგალიურ ობიდოშში ჩოგბურთელ ქალთა 25.000-იანი საერთაშორისო ტურნირის ძირითად ბადეში ორი ქართველი ჩაება.

შეჯიბრებაში „ველური ბარათით“ მიწვეულმა სოფიო შაფათავამ სტარტზე გერმანელი ვივიენ ჰეისენი დაამარცხა - 7:6, 7:6. საამისოდ 2 საათი და 15 წუთი დასჭირდა.

ჩვენებურმა 6 ორმაგი შეცდომა დაუშვა და 13-დან 7 ბრეიკპოინტი გამოიყენა, ალემანი 8-ჯერ შეცდა და 11 ბრეიკპოინტიდან 7 შანსის რეალიზება შეძლო. პირველ სეტს გერმანელი 5:3-ს იგებდა, თანაც მისი მოწოდება იყო, მაგრამ უპირატესობის გამოყენება ვერ შეძლო. მეორე სეტში - პირიქით: შაფათავა 5:2 გავიდა წინ, მაგრამ ჰეისენმა ქართველს ზედიზედ ოთხი გეიმი აართვა, თუმცა მიზანს ვერც ამჯერად მიაღწია - პირველი ხელის მსგავსად, ეს სეტიც ტაიბრეიკში დათმო.

მერვედფინალში შაფათავა ჩეხ ბარბორა სტეფკოვას გაუწევს მეტოქეობას. ამ უკანასკნელმა იოლად სძლია ესპანელ მარინა ბასოლს რიბერას - 6:3, 6:2.

წყვილებში შაფათავამ და ემილი ვებლი-სმიტმა (დიდი ბრიტანეთი), რომლებიც მესამე ნომრად არიან განთესილი, პირველ წრეში ნურია პარიზას-დიასი (ესპანეთი) და ანასტასია პრიბილოვა (რუსეთი) დაამარცხეს - 6:7, 6:2, 10:1. მეოთხედფინალში ქართულ-ბრიტანული დუეტის მეტოქე იქნება დალმა დალფისა (უნგრეთი) და ამანდინ ჰესეს (საფრანგეთი) ტანდემი, რომელმაც გზიდან ფრანცისკა ხორხე (პორტუგალია) და ანდრეა კა (კამბოჯა) ჩამოიშორა - 6:3, 6:3.

მარიამ ბოლქვაძე პორტუგალიურ ტურნირში განთესვით მეშვიდეა. სტარტზე მისი მეტოქე იყო ჩეხი ანასტასია დეტიუცი და იგი სამ სეტში დაჯაბნა - 4:6, 6:4, 6:2. მეტოქეებმა კორტზე 2 საათი და 18 წუთი დაყვეს. თითო ეისი მიითვალეს

. ბოლქვაძემ 19-დან მხოლოდ 8 ბრეიკპოინტი გამოიყენა, ჩეხმა 9-დან 6-ჯერ მიაღწია მიზანს. საგულისხმოა, რომ პირველი ხელის მოგების შემდეგ ანასტასია მეორე სეტში წინ იყო 4:0, მაგრამ ზედიზედ 6 გეიმი დათმო, რაც ამ შეხვედრაში გადამწყვეტი აღმოჩნდა - ბოლქვაძემ მესამე სეტშიც მიაღწია წარმატებას 6:2 და მეორე წრეში ინეს ტეიქსეირას (პორტუგალია, 6:3, 6:3) მძლეველ ანდრეა კას (კამბოჯა) ეთამაშება.

წყვილებში ბოლქვაძე და ნასტია კოლარი (სლოვენია) მე-4 ნომრად განთესილ ამინა ანშბასა (რუსეთი) და ანასტასია დეტიუცთან (ჩეხეთი) ვერაფერს გახდნენ - 3:6, 6:2, 9:11.

ორ საათსა და 32 წუთს გაგრძელდა ტუნისურ ტაბარკაში (საპრიზო ფონდი 15.000 დოლარი) 18 წლის ანა მაქაცარიას და ჩეხი გაბრიელა ჰორაჩკოვას ორთაბრძოლა, რომელიც ჩვენებურის მარცხით დასრულდა - 5:7, 6:4, 2:6.

მექსიკური მოტერეის საერთაშორისო ტურნირში (საპრიზო ფონდი 250 ათასი დოლარი) თბილისელმა ოქსანა კალაშნიკოვამ და იაპონელმა მისაკი დოიმ წყვილთა ასპარეზობის მერვედფინალში ავსტრალიელებთან - მონიკ ადამჩაკსა და ჯესიკა მურთან წააგეს - 6:7, 6:3, 7:10 და შეჯიბრებას გამოეთიშნენ.

ამერიკული ჯეკსონვილის 25-ათასიანი ტურნირის ძირითად ბადეში გასვლა ვერ მოახერხა სალომე დევიძემ - ქართველი ჩოგბურთელი კვალიფიკაციის გადამწყვეტ წრეში მასპინძელ მეგან მაქრეისთან დამარცხდა - 4:6, 6:7. წყვილებში სალომემ და ამერიკელმა ჯადა რობინსონმა მე-3 განთესვის მქონე ნიკა კუხარჩუკსა (რუსეთი) და კოტომი ტაკაჰატასთან (იაპონია) დათმეს პაექრობა - 4:6, 3:6.

ყოველდღიური სპორტული გაზეთი "ლელო"
444
მკითხველის კომენტარები / 0 /
მსგავსი ამბები
რუბრიკის სხვა სიახლეები
;