პოჩეტინომ შეცდომა აღიარა: საპასუხო მატჩისთვის მკაფიო ამოცანა გვაქვს... ტენ ჰაგისთვის ეს ჯერ საქმის ნახევარია

"აიაქსმა" კიდევ ერთხელ აალაპარაკა ევროპა, როცა ჩემპიონთა ლიგის პირველ ნახევარფინალში სტუმრად 1:0 მოუგო "ტოტენჰემს". ამსტერდამული გრანდი გახდა მესამე კლუბი, ვინც ჩემპიონთა ლიგის პლეი ოფში ზედიზედ 3 გასვლითი მატჩი მოიგო...

შეგახსენებთ, რომ მანამდე, ერიკ ტან ჰაგის ბიჭებმა სტუმრად 4:1 მოუგეს "რეალს" და 2:1 - "იუვენტუსს". ხოლო ის ორი გუნდი, ვინც ასეთი რამ მანამდე გააკეთა, იყვნენ "ბაიერნი" (2012/13) და "რეალი" (2017/18)...

მართალია, "ტოტენჰემს" სერიოზული დანაკლისი ჰქონდა შეტევის ხაზში (ჰარი კეინი ტრავმირებულია, ხოლო ჰიუნ-მინ სონს დისკვალიფიკაცია ჰქონდა), მაგრამ ძნელი წარმოსადგენი იყო, რომ მაურისიო პოჩეტინოს გუნდი ხეირიან საგოლე მომენტსაც ვერ შექმნიდა.

"აიაქსი" პირველ ტაიმში გაცილებით თავისუფლად თამაშობდა, ისე, როგორც ერიკ ტენ ჰაგის გუნდმა მიგვაჩვია. მეორე ნახევარში "ტოტენჰემმა" დაწოლა გააძლიერა და მეტოქე აიძულა, უკან დაეხია.

მიუხედავად ამისა, მეორე ტაიმში საგოლე მომენტები მაინც "აიაქსს" ჰქონდა. მარტო ის რად ღირს, დავიდ ნერეშმა ძელს რომ მოარტყა ბურთი! ანგარიში 2:0 რომ გამხდარიყო, თავისუფლად შეგვეძლო, ამსტერდამელებისთვის ფინალში გასვლა მიგველოცა, მაგრამ ახლა...

ცხადია, "აიაქსი" შინ ჩინებული შედეგით ბრუნდება, მაგრამ გადაწყვეტილი მაინც არაფერია. 8 მაისს "მამლები" "იოჰან კრუიფზე" უსაუთოდ დიდ ბრძოლას გამართავენ. მანამდე კი, ვნახოთ, რა შეფასებები გააკეთეს მწვრთნელებმა:

"ჩვენ კარგად ვერ დავიწყეთ თამაში, - თქვა პოჩეტინომ, - "აიაქსი" უფრო ენერგიული იყო და ძალიან გაგვიჭირდა. თითქოს, ძალები არ გვყოფნიდა... მეორე ტაიმში მეტოქე ვაიძულეთ, უკან დაეხია. მომენტებიც შევქმენით...

მიუხედავად იმისა, რომ წავაგეთ, ჯერ ისევ ცოცხლები ვართ. საპასუხო მატჩის წინ გვაქვს მკაფიო ამოაცანა - ეს არის გამარჯვება და ჩვენ უნდა გვჯეროდეს, რომ შეგვიძილია, მოვიგოთ საპასუხო მატჩი...

შეცდომა? დიახ, შემიძლია ვაღიარო, რომ 5-მცველიანი ტაქტიკური სქემა იყო შეცდომა. მაგრამ ალტერნატივა ბევრი არ გვქონდა. გოლი ამ სქემის გამო არ გაგვიშვია. ჩვენი დამოკიდებულება თამაშის მიმართ იყო გარკვეულწილად არასწორი. მე მწვრთნელი ვარ და პასუხსაც ვაგებ ამისთვის...

რაც შეეხება ვერტონგენის ტრავმას, ჩვენ მისი შეფასების საშუალება უახლოეს დღეებში გვექნება. პროცესში არ ვმონაწილეობდი, ეს იყო ექიმების გადაწყვეტილება. სხვა გზა არც იყო. არბიტრმა ჰკითხა იანს, შეეძლო თუ არა თამაში, მაგრამ აშკარა ჩანდა, რომ იმ მომენტში ძალიან ცუდად იყო და უნდა გაგვეყვანა მოედნიდან. ჩვენთვის ფეხბურთელის ჯანმრთელობა მთავარია", - ამბობს პოჩეტინო.

შედეგი შესანიშნავია, მაგრამ ეს მხოლოდ საქმის ნახევარია...

რა თქმა უნდა, ერიკ ტენ ჰაგი ძალიან კმაყოფილია ლონდონში გამარჯვებით, მაგრამ არ აქვს იმის ილუზია, რომ ყველაფერი დამთავრდა და რომ მისი გუნდი უკვე ფინალშია. ცხადია, ასეთი მიდგომა დამღუპველი იქნებოდა. ტენ ჰაგი მიიჩნევს, რომ ბრძოლა ჯერ კიდევ წინ არის:

"ბრწყინვალე საღამო და ბრწყინვალე შედეგი! ეს არის მოკლედ, რაც შემიძლია ვთქვა, - ბრძანა "აიაქსის" თავკაცმა პრესკონფერენციაზე, - როგორც მინიმუმ, თამაშის სასტარტო ნაწილში მთლიანად ვაკონტროლებდით მოედანს და ვფლობდით უპირატესობას, ფანტასტიკური გოლიც გავიტანეთ...

მეორე ნახევარში ბურთი ძირითადად მეტოქეს ჰქონდა, მაგრამ, რამაც ძალიან გამახარა, იყო ის, რომ ჩემმა ფეხბურთელებმა თავი არ დაზოგეს და ბოლომდე იბრძოლეს. თუმცა ვეთანხმები შენიშვნას, რომ მეორე ტაიმში გაცილებით უკვე შეგვეძლო თამაში. ძალიან სამწუხაროა, რომ ნერეშმა ვერ გაიტანა მეორე გოლი...

და მაინც, "ტოტენჰემის" მოედანზე მინიმალური ანგარიშით გამარჯვებაც უდიდესი მიღწევაა და ვეცდებით, ის საკუთარ მოედანზე განვავრცოთ. ჯერ მხოლოდ საქმის ნახევარია გაკეთებული...

ჩვენ ყოველთვის ჩვენს ფეხბურთს ვთამაშობთ. მაქსიმალურად უნდა გამოვიყენოთ ჩვენი ძლიერი მხარეები. დღეს ეს მხოლოდ ნაწილობრივ მოვახერხეთ... სხვანაირადაც შეგვიძლია თამაში. "აიაქსს" თავდაცვაც კარგად ეხერხება".

ყოველდღიური სპორტული გაზეთი "ლელო"
604
მკითხველის კომენტარები / 0 /
მსგავსი ამბები
რუბრიკის სხვა სიახლეები
;