პოჩეტინოს გადადგომას დიდი  სამწვრთნელო გადაადგილებები მოჰყვება...

მაურისიო პოჩეტინო და „ტოტენჰემი“ გაყრის პირას არიან. თუმცა ეს არ იქნება იოლი - „დეზების“ მეპატრონე დენიელ ლევის ეს პროცესი 32 მილიონი ფუნტი დაუჯდება.

იოლი გამოსავალი იქნება მხოლოდ ის, თუ 47 წლის არგენტინელი სპეციალისტი თავად წავა, ან კლუბის მფლობელთან კონტრაქტის ორმხრივ გაწყვეტაზე შეთანხმდება, რაც, ასე თუ ისე, ორივე მხარეს დააკმაყოფილებს...

ბოლო ორმა მარცხმა (2:7 „ბაიერნთან“ და 0:3 „ბრაიტონთან“) აჩვენა, რომ „ტოტენჰემი“ კრიზისშია. ეს კრიზისი კი, შეიძლება, ციკლის დასასრულის მომასწავებელი იყოს, იმ 5-წლიანი ციკლისა, რომელიც 2014 წელს „საუთჰემპტონიდან“ მაურისიო პოჩეტინოს მოსვლით დაიწყო...

მიუხედავად ყველაფრისა, პოჩეტინო მაინც რჩება მოთხოვნად სპეციალისტად და აქტიურადაც განიხილება მისი კანდიდატურა იმ გუნდებში, სადაც სამწვრთნელო კრიზისი მძვინვარებს...

„დეილი მეილი“ ვარაუდობს, რომ „ტოტენჰემიდან“ პოჩეტინოს წასვლა ევროპის რამდენიმე ტოპკლუბში გამოიწვევს სამწვრთნელო რყევას...

თავად პოჩეტინოსთვის ახლა ყველაზე განხილვადი ვარიანტები „რეალი“ და „მანჩესტერ იუნაიტედია“. მას არასოდეს დაუმალავს აღფრთოვანება „სამეფო კლუბში“ დასაქმების პერსპექტივით...

მაგრამ „რეალი“ ახლა ლა ლიგის ლიდერია, მიუხედავად იმისა, რომ გუნდიც და მისი მთავარი მწვრთნელიც სერიოზული კრიტიკის ადრესატები არიან. რაც არ უნდა იყოს, ფლორენტინო პერესი ამ ეტაპზე ნამდვილად ვერ მიუთითებს კარისკენ ზინედინ ზიდანს...

თუმცა არ იყო გამორიცხული, ეს „ბრიუგესთან“ საშინაო მარცხის შემთხვევაში მომხდარიყო, რასაც „რეალი“ ძლივს დაუძვრა (2:2).
თუ პოჩეტინო მაინც მივა „სანტიაგო ბერნაბეუზე“, ზიდანის ახალი ნავსაყუდელი შეიძლება გახდეს მდიდარი „პარი სენ-ჟერმენი“, სადაც მას „რეალზე“ ნაკლები ხელფასი არ ექნება, თუ მეტი არა...

ჯერ კიდევ ელოდება მუშაობის განახლებას ჟოზე მოურინიო, რომელმაც უკვე არა ერთი წინადადება უარყო, მათ შორის, ზღაპრული კონტრაქტი უმდიდრესი ჩინური („გუანჯოუ ევერგრანდი“) კლუბისგან.

ჟოზეს ევროპაში სურს მუშაობა და ფაქტია, „რაღაცას“ ელოდება. რამდენიმე დღის წინ მან თქვა, რომ ამ ეტაპზე „რეალში“ დაბრუნება არ სურს. მაგრამ... რატომ არა „ტოტენჰემი“? ამ კლუბს უკვე აქვს პრემიერლიგის ერთ-ერთი გრანდის სტატუსი, ითამაშა ჩემპიონთა ლიგის ფინალში და წამოჭიმა დიდებული სტადიონი...

ახლა ჟოზე „სქაი სპორტის“ ექსპერტია და კარგადაც გრძნობს თავს ამ ამპლუაში, მაგრამ ეჭვგარეშეა, გაფაციცებით ადევნებს თვალს თუნდაც „ტოტენჰემში“ მიმდინარე პროცესებს...

მასიმილიანო ალეგრიმ თქვა, რომ მომავალ ზაფხულამდე აპირებს დასვენებას. ცნობილია ისიც, რომ „იუვენტუსის“ ყოფილი თავკაცი მთელი წლის

განმავლობაში სწავლობდა ინგლისურს და აშკარა იყო, პრემიერლიგაში სამუშაოდ ემზადებოდა...
შესაძლოა, მისი დრო მოდის და დასვენებაც გადაიფიქროს. „ტოტენჰემის“ გარდა, სამწვრთნელო კრიზისის სურნელი ტრიალებს „მანჩესტერ იუნაიტედშიც“,

რომლის თამაშის ხარისხი, შედეგებთან ერთად, ვერავითარ კრიტიკას ვერ უძლებს.
როცა „იუნაიტედმა“ 2018 წლის დეკემბრის ბოლოს გაუშვა ჟოზე მოურინიო და ოლე გუნარ სულშერი დაიქირავა, რა თქმა უნდა, ყურადღება არ მიაქცია ნორვეგიელის ღარიბ სამწვრთნელო დოსიეს, რაც ალეგრის შემთხვევაში რადიკალურად განსხვავებულია - სერია A-ს 5 ტიტული ორ სხვადასხვა კლუბში („მილანი“ და „იუვენტუსი“) და ჩემპიონთა ლიგის ორი ფინალი.

41 წლის ედი ჰაუ ძალიან საინტერესო მწვრთნელია. მას ყოველთვის განიხილავენ ალტერნატივად პრემიერლიგაში ნებისმიერი სამწვრთნელო გადაადგილების დროს, მათ შორის, გრანდებშიც. ერთიხანობა, ჰაუს „არსენალში“ არსენ ვენგერის მემკვიდრედაც მიიჩნევდნენ... 

მისი გუნდები ყოველთვის სანახაობრივ ფეხბურთზე არიან ორიენტირებულები. ასე იყო „ბარნლიში“ და ასეა მისთვის მშობლიურ „ბორნმუთშიც“, სადაც 2012 წლიდან უწყვეტად (2011 წელს „ბარნლიში“ გადავიდა და მომდევნო სეზონში დაბრუნდა) მუშაობს.

სხვათა შორის, „ტოტენჰემის“ ბოსი დენიელ ლევი ჰაუს ერთ-ერთი თაყვანისმცემელია და ეს არაერთხელ აღუნიშნავს კიდეც. ამიტომ, პოჩეტინოს წასვლის შემთხვევაში, სწორედ ჰაუ შეიძლება გახდეს ლევის მთავარი სამიზნე და არა - ალეგრი ან მოურინიო.

ვნახოთ...

ყოველდღიური სპორტული გაზეთი "ლელო"
467
მკითხველის კომენტარები / 0 /
მსგავსი ამბები
რუბრიკის სხვა სიახლეები
;