პოჩეტინო, სარი... იუვენტუსს ალეგრის შესაცვლელად 5 კანდიდატურა ჰყავს

მას მერე, რაც "იუვენტუსიდან" მასიმილიანო ალეგრის წასვლა გადაწყდა, ბუნებრივია, მედიის მთავარ თემად იქცა მისი შესაძლო შემცვლელები.

როგორც ამბობენ, ყველაზე რეალური კანდიდატია მაურიციო სარი. მიუხედავად იმისა, რომ "ჩელსი" ევროპალიგის ფინალშია გასული, გამარჯვების მიუხედავადაც სარი დიდი ალბათობით დატოვებს გუნდს და იტალიაში დაბრუნდება.

როგორც ამბობენ, რომან აბრამოვიჩმა მის მიმართა პატივისცემა და ნდობა დაკარგა მას მერე, რაც მეკარე კეპა არისაბალაგამ მწვრთნელს შეცვლაზე უარი უთხრა...

თუმცა სარის იტალიაში "რომას" ვარიანტიც აქვს. დიდი ხანია იწერება ანტონიო კონტეზე. თავის დროზე მან "იუვენტუსში" ნაყოფიერად იმუშავა და კარგად იციან მისი ფასი.

მაგრამ არც კონტეა ალტერნატივის გარეშე - მას დაჟინებით უხმობს "ინტერი", რომელსაც სეზონის ბოლოს ლუჩანო სპალეტისთან განშორება აქვს გადაწყვეტილი.

კიდევ ერთი კანდიდატურა პრემიერლიგიდან - მაურისიო პოჩეტინო, რომელმაც "ტოტენჰემი" ჩემპიონთა ლიგის ფინალში გაიყვანა.

"ბებერ ქალბატონთან" მის შესაძლო კავშირს ადასტურებს მისივე სიტყვები "აიაქსთან" მატჩის შემდგომ პრესკონფერენციაზე - მოვიგებთ თუ წავაგებთ ლიგის ფინალს, მნიშვნელობა არ აქვს, "ტოტენჰემიდან" ყველა ვარიანტში შეიძლება წავიდეო...

ალეგრის სავარაუდო შემცვლელებს შორის არიან ასევე "ლაციოს" თავკაცი სიმონე ინძაგი, რომელიც გაურკვევლობაშია, და "იუვეს" ყოფილი მწვრთნელი, მსოფლიოს ჩემპიონი დიდიე დეშამი.

შეიძლება გაგიკვირდეთ და, ამ ჩამონათვალს შორის ბევრი ძალიან სერიოზულ კანდიდატად მიიჩნევს ინძაგის, რომელმაც რამდენიმე დღის წინ "ლაციოს" იტალიის თასი მოაგებინა და ევროპალიგის საგზურიც დაუბევა.

მაგრამ საკმარისია თუ არა ეს რეგალიები "იუვენტუსის" ბოსებისთვის, ამის თქმა ძნელია.

699
მკითხველის კომენტარები / 0 /
მსგავსი ამბები
რუბრიკის სხვა სიახლეები
;