[პრეზენტაცია] გიორგი ნემსაძე: ვპირდები ყველას, რომ შედეგიც გვექნება და ქომაგსაც გავახარებთ

გორის "დილამ" მთავარი მწვრთნელის პოსტზე გიორგი ნემსაძე წარადგინა. პრესკონფერენციაზე, რომელსაც ჟურნალისტები და კლუბის გულშემატკივრები ესწრებოდნენ, წარადგინეს აგრეთვე მისი თანაშემწე ლაშა ჭელიძე და სამი ახალწვეული - თენგიზ წიქარიძე, გიორგი ჩოჩიშვილი და ალეფ სანტოსი...

გიორგი ნემსაძე ფეხბურთელის ამპლუაში ყველასთვის კარგად იყო ცნობილი, მწვრთნელად კი მას თბილისის "შევარდენი 1906-სა" და საქართველოს 17-წლამდელთა ნაკრების თავკაცად უმუშავია. "დილაში" დანიშვნამდე მან დატოვა გუნდი, რომელსაც 17-მატჩიანი წაუგებელი სერია აქვს...

თენგიზ წიქარიძე და გიორგი ჩოჩიშვილი გორელები არიან. პირველი - წლების განმავლობაში გორში თამაშობდა, საიდანაც 2018 წელს ქუთაისის "ტორპედოში" გადავიდა და ახლა ისევ დაუბრუნდა მშობლიურ კლუბს.

ჩოჩიშვილი კი "დილაში" პირველად ჩაირიცხა. აქამდე ის "ოლიმპის", "საბურთალოს", "შევარდენის", ჩეხეთის "სლავიასა" და სლოვაკეთის "ზლატე მორავცეს" კარს იცავდა. გახლდათ აგერთვე საქართველოს ასაკობრივი ნაკრებების წევრი, მონაწილეობდა ევროპის 19-წლამდელთა ჩემპიონატზე, რომელსაც 2017 წლის ზაფხულში საქართველომ უმასპინძლა.

ბრაზილიელი მცველი ალეფ სანტოსი "დილაში" ბათუმის "დინამოდან" მიიყვანეს, სადაც, თავის მხრივ, ამ წლის დასაწყისში ჩავიდა სამხრეთ ამერიკიდან...

სამივე ახალწვეული და მწვრთნელები საზოგადოებას კლუბის ერთ-ერთმა ხელმძღვანელმა ვანო ხორგუაშვილმა გააცნო. მანვე კიდევ ერთხელ გვამცნო, რომ "დილა" დატოვეს ლუკა გუგეშაშვილმა, გოდერძი მაჩაიძემ და დიდიე კუგბენიამ...

* * *

გიორგი ნემსაძე: - ჩემთვის ძალიან დიდი პატივია გორის "დილას" მთავარი მწვრთნელის პოსტზე დანიშვნა. მინდა მადლობა გადავუხადო კლუბის ხელმძღვანელობას ნდობისთვის და ამ საპასუხისმგებლო თანამდებობის შეთავაზებისთვის...

გუნდი კარგად არის დაკომპლექტებული, თუმცა არის რგოლები, სადაც მცირედი ხარვეზებია. სათამაშო სტილის თვალსაზრისით ჩვენი ტაქტიკური მონახაზი მცირედით განსხვავდება იმისგან, როგორც "დილა" თამაშობდა აქამდე. შესაბამისად, გარკვეული სამუშაოს გაწევა მოგვიწევს გუნდზე იმ სათამაშო სტილის მორგებისა და დახვეწისთვის, რაც, ჩვენი აზრით, წარმატების მომტანი უნდა იყოს გორული კლუბისთვის.

- ვფიქრობთ, რომ გიორგი ნემსაძის მოსვლა "დილაში" ნიშნავს გუნდის ამბიციის ზრდას. წლევანდელი სეზონი მთლად სახარბიელოდ ვერ მიდის, რას უნდა ველოდოთ თქვენ მიერ დამოძღვრილი გუნდისგან?

- "დილას" ამბიცია არასოდეს აკლდა გამომდინარე იქიდან, რომ გორი საფეხბურთო ქალაქია, გულშემატკივრებით და საკლუბო წარმატებებით. აქ ძალიან რთულია გამარჯვება ნებისმიერი გუნდისთვის. ვგრძნობ დიდ პასუხისმგებლობას სწორედ ამ გულშემატკივრებისა და ქალაქის წინაშე. ვპირდები ყველას, რომ თავდაუზოგავად ვიშრომებთ, შედეგიც გვექნება და ქომაგსაც კარგად დავამახსოვრებთ თავს. 

- ჩემპიონატის განახლების შემდეგ უახლოესი მატჩი 4 აგვისტოს ბათუმში აქვს "დილას", სადაც სწორედ გულშემატკივრის სიმრავლისა და, ცხადია, ბათუმური გუნდის სიძლიერის გამოც, რთულია თამაში...

- ყველა მატჩსა და მეტოქეს ინდივიდუალურად უნდა მივუდგეთ. ასეა ბათუმური მატჩის შემთხვევაშიც. ჩვენ გვაქვს გარკვეული სტრატეგია რითაც დავუპირისპირდებით ბათუმის "დინამოს", თუმცა უფრო კონკრეტულად ამას მოედანზე ნახავთ. ჩვენ ყველა შეხვედრაში მიზნად გვექნება კარგი შედეგის ჩვენება, რომელიც თანხვედრაში იქნება სანახაობრივ თამაშთან.

ალეფ სანტოსის წარდგენა

თენგიზ წიქარიძე: - გორის "დილაში" ჩემი კარიერის დიდი ნაწილი გავატარე. ფეხბურთელად ჩემს ჩამოყალიბებაში ამ გუნდმა ძალიან დიდი როლი ითამაშა და ჩემთვის ძალიან საპასუხისმგებლოა ჩვენი კლუბის მაისურით ასპარეზობა. ჩემი წასვლის შემდეგ "დილას" შემადგენლობაში გარკვეული ცვლილებები კი იყო, მაგრამ არა ისე, რომ გუნდთან ადაპტაციის პერიოდი გამიგრძელდეს. იმედი მაქვს ამ ფეხბურთელებთან და ჩვენს ახალ მთავარ მწვრთნელთან ერთად დიდ გამარჯვებებს მივაღწევთ.

თენგიზ წიქარიძის წარდგენა

გიორგი ჩოჩიშვილი: - მოგეხსენებათ, რომ გასულ სეზონში "შევარდენში" ვთამაშობდი გიორგი ნემსაძის ხელმძღვანელობით. საკმაოდ კარგი სეზონიც ჩავატარე. შარშან ბატონი გიორგი გახდა მეორე წრის საუკეთესო მწვრთნელი, ხოლო მე - მეორე წრის საუკეთესო მეკარედ დამასახელეს. ამიტომ, ძალიან მიხარია, რომ ისევ მისი ხელმძღვანელობით მომიწევს თამაში. რაც შეეხება გორის "დილას". ამ გუნდს ძალიან დიდი ისტორია აქვს და წარმატებებიც არ აკლია. მე მეამაყება "დილას" ღირსების დაცვის საშუალება რომ მომეცემა, გამომდინარე იქიდან, რომ გორელი ვარ და ამიტომ ყველაფერს გავაკეთებ დიდი გამარჯვებების მოსაპოვებლად.

გიორგი ჩოჩიშვილის წარდგენა

არჩილ მელაძის ფოტოები

ყოველდღიური სპორტული გაზეთი "ლელო"
2442
მკითხველის კომენტარები / 1 /
V.nadiradze
0
Warmatebas gisurveb!!
მსგავსი ამბები
რუბრიკის სხვა სიახლეები
;