პრეზიდენტი, ალკოჰოლიკი და მსახიობი. სამი დიდი ლეგენდის ისტორია

ეს წერილი ეხება მსოფლიო ფეხბურთის სამ ლეგენდას. უფრო ზუსტად, იმ პერიოდს, რომელიც მათ აქტიური სპორტიდან წასვლის შემდეგ გაატარეს.

მთელი თავიანთი ბრწყინვალებით თქვენ წინაშე არიან ჯორჯ ვეა, პოლ გასკოინი და ერიკ კანტონა. სამი მეგაფიგურა, რომელთაც არც მინდორზე და არც მის მიღმა არ მოჰკლებიათ გულშემატკივართა ინტერესი...

ჯორჯ ვეა

მსოფლიო ფეხბურთის ლეგენდა ლიბერიიდან. ის ერთადერთი ფეხბურთელია მსოფლიოს ნომერ პირველი სპორტის ისტორიაში, რომელმაც ისე მოიგო “ოქროს ბურთი”, მსოფლიოს ჩემპიონატის ფინალურ ეტაპზე ერთი მატჩიც კი არ ჩაუტარებია.

ჯორჯ ვეამ აქტიური საფეხბურთო კარიერის დასრულების შემდეგ დიდხანს იფიქრა, თუ რა ეკეთებინა. ის ლიბერიაში თავიდანვე ძალიან პოპულარული ადამიანი იყო. 1994 წელს გაეროს ბავშვთა ფონდის ელჩი გახდა. როცა ევროპაში საფეხბურთო პაუზების დრო დგებოდა ხოლმე, ის მუდამ მიფრინავდა აფრიკაში, მონაწილეობას იღებდა სხვადასხვა საქველმოქმედო აქციებში, აწყობდა მათთვის სპეციალურ სახლებსა და თავშესაფრებს.

“მე მაგალითი ვარ აფრიკელი ბავშვებისთვის. ეს უკვე ძალიან დიდი პასუხისმგებლობაა ჩემთვის. ისინი მზად არიან, გაითვალისწინონ გამოცდილება, რომელიც დავაგროვე. მათთვის ჩემი კარიერა რაღაცას ნიშნავს. ისინი ჩემი მთავარი საზრუნავია”, - აცხადებდა მაშინ ვეა.

ვეა წლების განმავლობაში გახლდათ ლიბერიის ნაკრების ერთადერთი ვარსკვლავი. სიტყვა “ლიდერი” ზუსტად არ ასახავს იმას, რაც ვეა იყო ლიბერიისთვის. ის უაღრესად გაჭირვებული ქვეყნის ქომაგებს საკუთარი ფულით ყიდულობდა მატჩზე დასასწრებ ბილეთებს, თავისი ფულით ნიშნავდა მწვრთნელებს ეროვნულ გუნდში, ნიჭიერი ლიბერიელები პირადი ინიციატივით მიჰყავდა საზღვარგარეთ სათამაშოდ...

ვეა მხოლოდ ფეხბურთელი არ იყო. მთელ რიგ შემთხვევებში ჯორჯი გახლდათ მოთამაშე-მწვრთნელი. ფეხბურთელები მას უფრო უსმენდნენ, ვიდრე იმ მწვრთნელებს, რომელთა დაქირავებაშიც, პირდაპირ თუ ირიბად, ვეას ფინანსები ერია, რადგან ლიბერიას არ ჰქონდა იმის საშუალება, რომ თუნდაც საშუალო დონის უცხოელი დამრიგებელი ჩამოეყვანა.

აქტიური ფეხბურთიდან წასვლის შემდეგ გავიდა ერთი წელი და ვეამ პრეზიდენტის პოსტზე გადაწყვიტა კენჭისყრა. საამისოდ ის სათავეში ჩაუდგა პარტიას, გახსნა ტელე და რადიოსადგურები. ის ქვეყანას დაჰპირდა სამ რამეს - ელექტროფიკაციას, განათლებასა და გზებს. პირველ ტურში ვეამ გაიმარჯვა, მაგრამ მეორეში დამარცხდა ელენ ჯონსონ-სერლიფთან, პირველ ქალთან, რომელიც გახდა აფრიკული ქვეყნის პრეზიდენტი.

ვეას მომხრეებმა არჩევნები ფალსიფიცირებულად გამოაცხადეს, მაგრამ, დამკვირვებელთა აზრით, ყველაფერმა კანონის დაცვით ჩაიარა. ვეას ოპონენტებმა კი განაცხადეს, რომ მას არ ჰქონდა საკმარისი განათლება ქვეყნის გაძღოლისთვის.

ვეა არ დანებდა. ის ამერიკაში გაემგზავრა, მიიღო შესაბამისი განათლება და 2011 წელს ისევ სცადა პრეზიდენტობა, მაგრამ... ამჯერადაც უშედეგოდ. ბოლოს და ბოლოს, მოვიდა 2017 წლის არჩევნები, რომელშიც ამჯერად გაიმარჯვა! ჯონსონ-სერლიფი კენჭს აღარ იყრიდა, მის მოადგილეს კი ხალხმა მხარი აღარ დაუჭირა. ეკონომიკა ჩამოიქცა, ქვეყანაში მძვინვარებდა ებოლას ეპიდემია, ლიბერია სამოქალაქო ომის ქარცეცხლში იყო გახვეული და იზრდებოდა ექსტრემისტული ორგანიზაციების რაოდენობა.

ვერავინ იტყვის, რომ ვეას პრეზიდენტად გახდომის შემდეგ ლიბერიაში ცხოვრების დონე გაუმჯობესდა. ამის გაკეთება ძალიან რთულია, რადგან მსოფლიოს ერთ-ერთ უღარიბეს ქვეყანას ყველა სფეროში ძალიან უჭირს...

პოლ გასკოინი

საყოველთაო აღიარებით, ინგლისს არ ჰყოლია ასეთი ნიჭიერი ფეხბურთელი. ეგაა, პოლ გასკოინმა სანახევროდაც კი ვერ გვიჩვენა საკუთარი შესაძლებლობები. ამის მიზეზი ერთბაშად რამდენიმეა - მას სტანჯავდა მუდმივი ნევროზი, მიდრეკილი იყო ალკოჰოლისადმი და პრაქტიკულად ყოველ მეორე დღეს ეხვეოდა სკანდალებში.

2000-იანი წლების დასაწყისში პოლი არიზონის ცნობილ კლინიკაში მოხვდა, სადაც ალკოჰოლიკებსა და ნარკომანებს მკურნალობენ. “ეს ძალიან მძიმე პერიოდი იყო ჩემს ცხოვრებაში. შენ ხედავ, როგორ გამოდის შენი ორგანიზმიდან ათასი საზიზღრობა. პირველად მაშინ გამოვუტყდი თავს, რომ ალკოჰოლიკი ვიყავი”, - იხსენებს გასკოინი.

პოლი დაბრუნდა ფეხბურთში, მაგრამ მალევე დაიწყო სმა და ისევ კლინიკაში მოხვდა: “საშინელი ცხოვრებით ვცხოვრობდი. ასე ცხოვრება წარმოუდგენელი იყო. ძალიან ხშირად გაზეთები ჩემზე წერდნენ. მე ამას ვერ ვიტანდი. ვცდილობდი, საკუთარი თავი დამერწმუნებინა, რომ ეს ყველაფერი ტყუილი და მოგონილი იყო, მაგრამ ჟურნალისტებს ერთი უპირატესობა ჰქონდათ - ისინი მუდამ მართლები იყვნენ, მუდამ მიგებდნენ ბრძოლას”, - დაწერა გასკოინმა თავის ავტობიოგრაფიულ წიგნში.

მას არაერთხელ უფიქრია სუიციდზე. არაერთხელ ყოფილა ისეთი შემთხვევა, როცა ქუჩაში, ან ბარში უნახავთ უგონოდ მყოფი, მაგრამ ხალხმა მაინც არ შეიძულა პოლ გასკოინი. ალბათ, იმიტომ, რომ მას არასოდეს უთამაშია “კარგი ბიჭი”, ის ყოველთვის იყო ის, რაც იყო.

“ხალხის სიყვარული მაძლიერებს. ეს არის ის, რასაც ვერასოდეს ვერაფერი გადაწონის. ძალიან მინდოდა, მათთვის მეტი სიხარული მიმენიჭებინა, მაგრამ რაც გამოვიდა, მგონი ესეც არაა ძალიან ცოტა. მე ვერ გავცემ პასუხს კითხვაზე, ჩემი შესაძლებლობების რამდენი პროცენტი ვითამაშე. ერთი ზუსტად ვიცი: ბოლომდე ნამდვილად არ ამომიწურავს საკუთარი თავი. საამისოდ ძალიან სულელი ვიყავი. და მაინც, ჩემი კარიერა არის ის, რისაც არასოდეს შემრცხვება. მგონი, არცთუ ისე ცუდი ფეხბურთელი ვიყავი. რა და როგორ იყო, ეს ხალხმა უნდა განსაჯოს”, - ამბობს “გაზა”.

2017 წლიდან ის ცოტა “დაჭკვიანდა”. “ტვიტერზე” გახსნა საკუთარი გვერდი. აქტიურად ეხმარება ფონდს, რომელიც ალკოჰოლიკებსა და ნარკომანებს უწყობს ხელს ცხოვრების გაიოლებაში. არადა, “უძღები შვილი” ძალიან უყვართ ინგლისში. როცა გასკოინმა “ტოტენჰემის” შემადგენლობაში ითამაშა ვეტერანთა მატჩში, აპლოდისმენტებისგან სტადიონი კინაღამ დაინგრა...

ერიკ კანტონა

“მანჩესტერის” გულშემატკივრები მას აღმერთებენ. ვინ იცის, რამდენი ვარსკვლავი გამოიცვალა “ოლდ ტრაფორდმა”, მაგრამ ფრანგი ლეგენდა დღემდე რჩება ყველაზე კაშკაშად - ამ თანავარსკვლავედში. თავად სერ ალექს ფერგიუსონმა თქვა - ყველაზე ძლიერი ფეხბურთელი, ვისთანაც აქამდე მიმუშავია, ერიკ კანტონააო და ამით ყველაფერია ნათქვამი. ფერგის შეფასებას ვერავინ დააყენებს ეჭვქვეშ...

კანტონას ჯერ კიდევ ფეხბურთელობის ჟამს უყვარდა მძაფრი შეგრძნებები და ახლაც ასეა. დაასრულა თუ არა კარიერა, მსახიობი გახდა. “ზუსტად ვგრძნობ, რომ ეს ჩემი მოწოდებაა. ეს არის ის სფერო, რომელშიც აქტიური საფეხბურთო კარიერის დასრულების შემდეგ ბოლომდე მოვახდინე საკუთარი თავის რეალიზება. ეს ჩემი ცხოვრებაა”, - ამბობს კანტონა.

ის უკვე 29 ფილმში გადაიღეს. მათ შორის, არის საკმაოდ მაღალბიუჯეტიანი ფილმებიც. “ერიკის ძებნაში” - ასე ჰქვია მის ერთ-ერთ საუკეთესო ფილმს, რომელშიც საკუთარ თავს თამაშობს...

ყოველდღიური სპორტული გაზეთი "ლელო"
800
მკითხველის კომენტარები / 0 /
მსგავსი ამბები
რუბრიკის სხვა სიახლეები
;