პრემიერლიგა.  IX ტურის მიმოხილვა: ოლდ ტრაფორდზე სიტუაცია დაიძაბა, სიტი კვლავ მდევარია [VIDEO]

პრემიერლიგის მორიგ ტურში რამდენიმე საყურადღებო რამ მოხდა. დავიწყოთ “ევერტონით”, რომელმაც გახსნა სათამაშო დღე...

ლივერპულელებს ძალიან კარგი შემადგენლობა ჰყავთ და გასაკვირი არაფერია იმაში, რომ მოიგეს კიდეც. გოლები ბრაზილიელმა ბერნარდმა და ისლანდიელმა გილფი სიგურდსონმა შეყარეს. “ვესტ ჰემმა” კი ცუდად ითამაშა და მარცხიც დაიმსახურა.

მატჩის საუკეთესო მოთამაშედ დასახელდა თეო უოლკოტი, ვინც ბერნარდს პირველი გოლის დროს ასისტენტობა გაუწია და მთლიანობაშიც ერთობ აქტიური გახლდათ.

ისევ ავადაა “ტოტენჰემი”. ჩემპიონთა ლიგის გასული გათამაშების ფინალისტი საკუთარ თავს არ ჰგავს. ამჯერად “დეზებმა” პრემიერლიგის ერთ-ერთ აუტსაიდერს, “უოტფორდს” ვერ მოუგეს.

სტუმრები ნაადრევად დაწინაურდნენ - აბდულაე დუკურმა, ვინც მატჩის საუკეთესო ფეხბურთელი გახდა მოგვიანებით, ჰოლანდიელი დერილ იანმაატის პასი გარდასახა გოლად.

“ტოტენჰემმა” მხოლოდ მატჩის დასრულებამდე რამდენიმე წუთით ადრე გაათანაბრა. დელე ალის გოლი მხოლოდ მას შემდეგ ჩაითვალა, რაც არბიტრმა საშველად ვიდეორეფერის უხმო.

“ასე არ უნდა ვითამაშოთ! უნდა ვაღიაროთ, რომ ეს ჩავარდნაა”, - თქვა ნამატჩევს მაურისიო პოჩეტინომ, რომელსაც სულ უფრო აქტიურად უწინასწარმეტყველებენ გადადგომას.

მარკოს ალონსომ გოლად აქცია კალუმ ჰადსონ-ოდოის პასი და ასე მოუგო “ჩელსიმ” “ნიუკასლს”. ბოლო დროს ფრენკ ლამპარდის “არისტოკრატები” ძალიან კარგად გამოიყურებიან და ქულებსაც სტაბილურად აგროვებენ.

შეხვედრა საინტერესოდ წარიმართა. მიუხედავად იმისა, რომ გოლი არ გაუტანია, საუკეთესო მოთამაშედ “ჩელსის” ფორვარდი ტამი აბრაჰამი დასახელდა. 
მესამე ადგილზე აღზევდა “ლესტერი”, რომელმაც საშინაო შეხვედრაში “ბარნლის” მოუგო. “მელიები” აგებდნენ, მაგრამ ჯერ ჯეიმი ვარდიმ შეაგდო, მერე კი იური ტილემანსმაც გაიტანა. ვნახოთ, შეძლებს თუ არა ერთი დიდი ზღაპრის შემომქმედი “ლესტერი” ამჯერად ჩემპიონთა ლიგის საგზურის მოპოვებას...

“მანჩესტერ სიტის” წაფორხილების უფლება არ ჰქონდა. გაბრიელ ჟეზუშისა და დავიდ სილვას გოლებით “ქალაქელებმა” გასვლით შეხვედრაში “კრისტალ პალასი” დაამარცხეს. 

შეხვედრის საუკეთესო მოთამაშეებად დასახელდნენ მეკარეები - უეინ ჰენესი და ედერსონი. “სანაკრებო პაუზის შემდეგ ჩვენ მნიშვნელოვანი შეხვედრა მოვიგეთ, მაგრამ გადამწყვეტ მომენტებში უფრო ცივსისხლიანები უნდა ვიყოთ”, - თქვა პეპ გვარდიოლამ.

“მანჩესტერ იუნაიტედი” მარკუს რაშფორდის გოლით დაწინაურდა “ლივერპულთან”, მაგრამ მოპოვებული უპირატესობა ვერ შეინარჩუნა. თამაშის დასრულებამდე 5 წუთით ადრე ადამ ლალანამ გაათანაბრა - 1:1. “ლივერპულმა”, რომელსაც ტრავმირებული მოჰამედ სალაჰი აკლდა, პირველი ქულები დაკარგა. გაშვებულ გოლზე ბევრი იკამათა იურგენ კლოპმა. 

გაჩნდა ეჭვი, რომ შეტევა, რომელსაც რაშფორდის გოლი მოჰყვა, უნდა შეჩერებულიყო, რადგან “ლივერპულის” ფეხბურთელის მიმართ წესების დარღვევა ჩანდა. თუმცა ვიდეორეფერიმ ბრძანა - გოლი უნდა ჩაითვალოსო და ჩაითვალა კიდეც.

ევერტონი-ვესტ ჰემი 2:0
გოლები: 1:0 ბერნარდი (17), 2:0 სიგურდსონი (90+2)

ასტონ ვილა-ბრაიტონი 2:1
გოლები: 0:1 უებსტერი (21), 1:1 გრილიში (45+2), 2:1 ტარჯეტი (90+4) 
გაძევება: მუი (35. ბრაიტონი) 

ჩელსი-ნიუკასლი 1:0
გოლი: 1:0 ალონსო (73)

ლესტერი-ბარნლი 2:1
გოლები: 0:1 ვუდი (26), 1:1 ვარდი (45), 2:1 ტილემანსი (74)

ტოტენჰემი-უოტფორდი 1:1
გოლები: 0:1 დუკური (6), 1:1 ალი (86)

ვულვზი-საუთჰემპტონი 1:1
გოლები: 0:1 ინგსი (53), 1:1 ხიმენესი (61-პენ)

კრ. პალასი-მანჩესტერ სიტი 0:2
გოლები: 0:1 გაბრიელ ჟეზუში (39), 0:2 დავიდ სილვა (41)

მანჩესტერ იუნ-ლივერპული 1:1
გოლები: 1:0 რაშფორდი (36), 1:1 ლალანა (85)

ბორნმუთი-ნორვიჩი 0:0

ორშაბათი, 21 ოქტომბერი
შეფილდ იუნ-არსენალი 23:00

1. ლივერპული 9 8 1 0 21:7 25
2. მანჩესტ. სიტი 9 6 1 2 29:9 19
3. ლესტერი 9 5 2 2 16:8 17
4. ჩელსი 9 5 2 2 19:14 17
5. არსენალი 8 4 3 1 13:11 15
6. კრ. პალასი 9 4 2 3 8:1 14
7. ტოტენჰემი 9 3 3 3 15:13 12
8. ბარნლი 9 3 3 3 12:11 12
9. ბორნმუთი 9 3 3 3 13:13 12
10. ვესტ ჰემი 9 3 3 3 11:13 12
11. ასტონ ვილა 9 3 2 4 15:13 11
12. ვულვზი 9 2 5 2 12:12 11
13. მანჩესტ. იუნ 9 2 4 3 10:09 10
14. ევერტონი 9 3 1 5 8:13 10
15. შეფილდ იუნ 8 2 3 3 7:7 9
16. ბრაიტონი 9 2 3 4 9:12 9
17. საუთჰემპტ. 9 2 2 5 9:16 8
18. ნიუკასლი 9 2 2 5 5:14 8
19. ნორვიჩი 9 2 1 6 10:21 7
20. უოტფორდი 9 0 4 5 5:21 4



ბომბარდირები: 8 - ს. აგუერო (სიტი), ტ. აბრაჰამი (ჩელსი); 7 - პ. ობამეიანგი (არსენალი); 6 - ტ. პუკი (ნორვიჩი), ჯ. ვარდი (ლესტერი), რ. სტერლინგი (სიტი).

ყოველდღიური სპორტული გაზეთი "ლელო"
452
მკითხველის კომენტარები / 0 /
მსგავსი ამბები
რუბრიკის სხვა სიახლეები
;