პრემიერლიგა. ბოლო ტური: რეკორდების დღე... [VIDEO]

პრემიერლიგა დასრულებულია! არდადეგებზე მოგვიანებით გავლენ "ლივერპული", რომელსაც 26 მაისს ჩემპიონთა ლიგის ფინალი ელის, ასევე, "მანჩესტერ იუნაიტედი" და "ჩელსი", რომელთაც 19 მაისს ინგლისის ასოციაციის თასის მფლობელი უნდა გაარკვიონ...

პრინციპში, ბოლო ტური ბევრს არაფერს წყვეტდა და ამან ფინიში აშკარად გააფერმკრთალა. ყველაფერში "დამნაშავე" პეპ გვარდიოლას გუნდია, რომელმაც ჩემპიონობა ადრევე დაიბევა და ერთადერთ მოტივაციად რეკორდების დამყარება დარჩა.

"სიტიმ" პატიოსნად შეასრულა მისია და 5 რეკორდს შესწვდა, რომელთაგან პირველი 3 "ქალაქელებმა" შუა კვირაში დაამყარეს - მოგებების, გატანილი გოლებისა და ქულების რაოდენობით. რაც შეეხება კიდევ ორს, ბოლო ტურში ესეც "მოყომარდა" - "მანჩესტერ სიტიმ" 19 ქულით გაუსწრო მეორეადგილოსან "იუნაიტედს" და ამ უკანასკნელისვე რეკორდი (+18) დაამხო. არადა, გაბრიელ ჟეზუშმა "საუთჰემპტონს" გამარჯვების გოლი დამატებულ მე-4 წუთზე გაუტანა...

ამას გარდა, "სიტიმ" მიაღწია 100-ქულიან ზღვარს, რაც 20-გუნდიანი პრემიერლიგის ისტორიაში პირველი შემთხვევაა. "იუნაიტედი" ვახსენეთ და ერთ პატარა მიღწევას ნურც ჟოზე მოურინიოს გუნდს დავუკარგავთ - სერ ალექს ფერგიუსონის წასვლის (2013) შემდეგ "წითელი ეშმაკებისთვის" 81 ქულა ყველაზე მაღალი მაჩვენებელია.


"ლივერპულმა", "ბრაიტონთან" დაგეგმილი მოგებით სამომავლო ჩემპიონთა ლიგაში ადგილი დაიბევა. მეშვიდედ(!) ინგლისის მთავარი ლიგის ისტორიაში "წითლებმა" ისე დაასრულეს სეზონი, საკუთარ მოედანზე არ დამარცხებულან. ანალოგიური მაჩვენებელი არცერთ ინგლისურ გუნდს არ აქვს.

"ბრაიტონის" კარში გატანილი გოლით "ლივერპულის" ფორვარდი მოჰამედ სალაჰი, 32 გოლით, რეკორდსმენი გახდა 20-გუნდიანი პრემიერლიგის ისტორიაში. დიდმა ეგვიპტელმა გაუსწრო ალან შირერს (1995/96, "ბლექბერნი"), კრიშტიანო რონალდოსა (2007/08, "მანჩესტერ იუნაიტედი") და ლუის სუარესს (2013/14, "ლივერპული"), რომელთა თამასაც 31 გოლზე დარჩა.

ჩემპიონთა ლიგის საგზურს მაინც ვერ შესწვდა "ჩელსი", რომელმაც "ნიუკასლთან" 0:3 წააგო. მიზეზი ადვილი ასახსნელია - "არისტოკრატებს" არ სჯეროდათ, რომ "ლივერპულს" შინ "ბრაიტონთან" ფეხი დაუცდებოდა და უმოტივაციო "ნიუკასლთან" უჯიგროდ ითამაშეს.

აქედან გამომდინარე, ინგლისის საფეხბურთო საზოგადოებას ეჭვი არ ეპარება, რომ "ჩელსის" მთავარი მწვრთნელის პოსტზე პრემიერლიგის ბოლო მატჩი ჩაატარა ანტონიო კონტემ, რომელსაც კიდევ რჩება ერთგვარი რეაბილიტაციის შანსი - წინ ხომ ასოციაციის თასის ფინალია...

თუ კონტეს შემთხვევაში ეს მოსალოდნელია, არსენ ვენგერისთვის უკვე დაანონსებული ბოლო მატჩი იყო "ჰადერსფილდთან", რომელიც "მეთოფეთა" გამარჯვებით დასრულდა. "არსენალი" ევროპალიგის საგზურით დაკმაყოფილდა, რაც ფიასკოდ უნდა ჩაითვალოს, განსხვავებით "ბარნლისგან", ვისთვისაც ეს ისტორიული მიღწევაა. 1974 წლის (მე-6 ადგილი) შემდეგ ამ კლუბისთვის მე-7 ადგილი საუკეთესო მაჩვენებელია.

პრემიერლიგას ტოვებენ "სუონსი", "სტოკი" და "ვესტ ბრომვიჩი". საინტერესოა, რომ გასულ წელს ელიტაში აღზევებულმა სამივე გუნდმა ("ჰადერსფილდი", "ბრაიტონი", "ნიუკასლი") შეინარჩუნა ადგილი "მზის ქვეშ". ჩემპიონშიფიდან აღზევდნენ "ვულვზი" და "კარდიფი". კიდევ ერთი საგზურის მფლობელს "მიდლსბროს", "ასტონ ვილას", "ფულჰემსა" და "დერბის" შორის გაირკვევა.

ბარნლი-ბორნმუთი 1:2
გოლები: 1:0 ვუდი (39), 1:1 ჯ. კინგი (74), 1:2 უილსონი (90+3)

კრ. პალასი-ვესტ ბრომვიჩი 2:0
გოლები: 1:0 ზაჰა (70), 2:0 ვან აანჰოლტი (78)

ჰადერსფილდი-არსენალი 0:1
გოლი: 0:1 ობამეიანგი (38)

ლივერპული-ბრაიტონი 4:0
გოლები: 1:0 სალაჰი (26), 2:0 ლოვრენი (40), 3:0 სოლანკე (53), 4:0 რობერტსონი (85)

მანჩესტერ იუნ-უოტფორდი 1:0
გოლი: 1:0 რაშფორდი (34)

ნიუკასლი-ჩელსი 3:0
გოლები: 1:0 გეილი (23), 2:0 პერესი (59), 3:0 პერესი (63)

საუთჰემპტონი-მანჩესტ. სიტი 0:1
გოლი: 0:1 გაბრიელ ჟეზუში (90+4)

სუონსი-სტოკი 1:2
გოლები: 1:0 ე. კინგი (14), 1:1 ნდიაიე (31), 1:2 კრაუჩი (41)
გამოუყენებელი პენალტი: შაქირი (54. სტოკი)

ტოტენჰემი-ლესტერი 5:4
გოლები: 0:1 ვარდი (4), 1:1 კეინი (7), 1:2 მაჰრეზი (16), 1:3 იჰეანაჩო (47), 2:3 ლამელა (49), 3:3 ფუხსი (53-საკ. კარში), 4:3 ლამელა (60), 4:4 ვარდი (73), 5:4 კეინი (76)

ვესტ ჰემი-ევერტონი 3:1
გოლები: 1:0 ლანსინი (39), 2:0 არნაუტოვიჩი (63), 2:1 ნიასე (74), 3:1 ლანსინი (82)

ბომბარდირები: 32 - მოჰამედ სალაჰი (ლივერპული); 30 - ჰარი კეინი (ტოტენჰემი); 21 - სერხიო აგუერო (სიტი); 20 - ჯეიმი ვარდი (ლესტერი).

ყოველდღიური სპორტული გაზეთი "ლელო"
903
მკითხველის კომენტარები / 0 /
მსგავსი ამბები
რუბრიკის სხვა სიახლეები
;