პრემიერლიგა.მატჩები: ლაკაზეტის გვალვა შეწყდა, იუნაიტედი გადარჩა [VIDEO]

ინგლისის პრემიერ ლიგის 24-ე ტურის შეხვედრაში ლონდონური დერბი გაიმართა, რომელშიც "არსენალმა" "კრისტალ" პალასი 4:1 დაამარცხა. "მეთოფეებმა" ოთხივე გოლის გატანა 22 წუთში შეძლეს.

პირველი სამი გოლი ნაჩო მონრეალმა, ალექს ივობიმ და ლორენ კოშელნიმ გაიტანეს, მეოთხე გოლი კი ლონდონელთა ფრანგმა ფორვარდმა, ალექსანდრ ლაკაზეტმა გაიტანა და დიდი გვალვა, ანუ 8-მატჩიანი უგოლო სერია დაასრულა.

78-ე წუთზე ლუკა მილვოევიჩმა "არსენალის" კარი აიღო, თუმცა ამას რაიმე განსაკუთრებული არ მოყვა.

პარალელურად გაიმართა "ბარნლისა" და "მანჩესტერ იუნაიტედის" დაპირისპირება, რომელშიც ჟოზე მოურინიოს გუნდმა 0:1 მოიგო. შეხვედრის ერთადერთი გოლი ანტონი მარსიალმა გაიტანა და "წითელი ეშმაკები" კიდევ ერთხელ იხსნა ქულების დაკარგვისგან.

"ევერტონმა" "ვესტ ბრომვიჩს" უმასპინძლა და 1:1 დაუზავდა. მატჩის პირველი გოლი მე-7 წუთზე "ვესტ ბრომვიჩის" "საუთჰემტონიდან" გადმობარგებულმა ფორვარდმა, ჯეი როდრიგესმა გაიტანა, რომელსაც 73-ე წუთზე ბაიე უმარ ნიასემ უპასუხა.

მატჩის მიმდინარეობისას "კანფეტების" ნახევარმცველმა, ჯეიმს მაკარტიმ ფეხი მოიტეხა, რაშიც დამნაშავე სალომონ რონდონი გამოდგა. მაკარტი საავადმყოფოში გადაიყვანეს, რონდონმა კი დანაშაულის გამო ცრემლები ვერ შეიკავა.

აქვე გაგაცნობთ პარალელურ რეჟიმში მიმდინარე სხვა შეხვედრათა შედეგებს:

"ვესტ ჰემი" - "ბორნმუთი" 1:1

"ლესტერი" - "უოტფორდი" 2:0

"სტოუკ სიტი" - "ჰადერსფილდი" 2:0

851
მკითხველის კომენტარები / 0 /
მსგავსი ამბები
რუბრიკის სხვა სიახლეები
;