პრემიერლიგა. ოძელაშვილი ლონდონში: არსენ ვენგერი მდიდარს ართმევს, სუონსს აძლევს

ინგლისურ პრემიერლიგაში გუშინ 3 მატჩი გაიმართა. დავიწყოთ "არსენალით", რომლის რიგებშიც შედგა სომეხი ვარსკვლავის, ჰენრიხ მხითარიანის დებიუტი. იმთავითვე უნდა ითქვას, რომ "მეთოფეებს" "ახალმა სისხლმა" ვერ უშველა.

"სუონსიმ", რომელმაც ზედიზედ მეორე მატჩი მოიგო (წინა ტურში "ლივერპულს" სძლია 1:0), დაამტკიცა, რომ თანდათან უკან იტოვებს კრიზისს. უელსელებმა შინ შანსი არ დაუტოვეს "არსენალს".

არადა, არსენ ვენგერის გუნდისთვის ყველაფერი კარგად დაიწყო - მესუთ იოზილის გადაცემის შემდეგ ანგარიში ნაჩო მონრეალმა გახსნა. "გედები" ამან ვერ დააფრთხო. პირველი ტაიმის დასრულებამდე კლუკასმა მოუსონის პასით წინასწორობა აღადგინა.

მეორე ტაიმში გოლები მხოლოდ "სუონსის" გაჰქონდა. ჯერ ჯორდან აიუმ გამოიჩინა თავი, მერე კი მატჩის გმირმა კლუკასმა განახორციელა "საკონტროლო გასროლა". რაც შეეხება მხითარიანს, მას დიდებული საგოლე შანსი ჰქონდა, თუმცა მასპინძელთა მეკარე ფაბიანსკიმ არ გაატანინა.

"ვესტ ჰემმა" და "კრისტალ პალასმა" გოლები გაცვალეს. ჯერ ბენტეკემ დააწინაურა სტუმრები ლონდონურ დერბიში, მერე კი ნოუბლმა პენალტით (50-ე გოლი "ვესტ ჰემის" მაისურით) გაათანაბრა ანგარიში. ამ შეხვედრაში "კრისტალ პალასი" შედარებით უკეთესი იყო, მაგრამ საბოლოოდ ფრე დაფიქსირდა.

"ლივერპულმა" გასვლაზე შანსი არ მისცა "ჰადერსფილდს". თამაშის ბედი პირველივე ტაიმში გადაწყდა, როცა ჯერ შეხვედრის საუკეთესო მოთამაშე ემრე ჩანმა გაიტანა, ტაიმის დასრულებამდე სულ ცოტა ხნით ადრე კი რობერტო ფირმინომაც შეარხია მასპინძელთა კარის ბადე. მეორე ნახევარში მერსისაიდელებმა გემოზე იბურთავეს. საბოლოო ანგარიში 11-მეტრიანიდან მოჰამედ სალაჰმა გვამცნო.

ინგლისი. პრემიერლიგა. XXV ტური

სუონსი-არსენალი 3:1
გოლები: 0:1 მონრეალი (33), 1:1 კლუკასი (34), 2:1 ჯ. აიუ (61), 3:1 კლუკასი (86)

ვესტ ჰემი-კრ. პალასი 1:1
გოლები: 0:1 ბენტეკე (24), 1:1 ნოუბლი (43-პენ)

ჰადერსფილდი-ლივერპული 0:3
გოლები: 0:1 ჩანი (26), 0:2 ფირმინო (45), 0:3 სალაჰი (78-პენ)

ოთხშაბათი, 31 იანვარი
ჩელსი-ბორნმუთი 23:45
ევერტონი-ლესტერი 23:45
ნიუკასლი-ბარნლი 23:45

საუთჰემპტონი-ბრაიტონი 23:45
მანჩესტერ სიტი-ვესტ ბრომვ. 23:59
სტოკი-უოტფორდი 23:59
ტოტენჰემი-მანჩესტერ იუნ 23:59

ბომბარდირები: 21 - ჰარი კეინი (ტოტენჰემი); 19 - მოჰამედ სალაჰი (ლივერპული); 16 - სერხიო აგუერო (მანჩესტერ სიტი); 14 - რაჰიმ სტერლინგი (მანჩესტერ სიტი).

ყოველდღიური სპორტული გაზეთი "ლელო"
1482
მკითხველის კომენტარები / 0 /
მსგავსი ამბები
რუბრიკის სხვა სიახლეები
;