პრემიერლიგა: როცა ინგლისი დუღს და გადმოდუღს...

ინგლისურ პრემიერლიგაში საფეხბურთო ცხოვრება მართლაც დუღს და გადმოდუღს. სეზონი თანდათან შედის გადამწყვეტ ფაზაში და რა გასაკვირია, რომ კონფლიქტების რაოდენობაც მატულობს.

"ჩელსიში" მომხდარ ამბებზე მკითხველს ვრცლად ვესაუბრეთ. დღეს სამსჯავროზე გამოგვაქვს პრემიერლიგის მიმდინარე სეზონის სხვა კონფლიქტები. სულ მცირე, ეს წერილი მოსაწყენი არ უნდა იყოს...

ვენგერი და გვარდიოლა

რამდენიმე დღის წინ არსენ ვენგერმა გააკეთა ის, რაც ადრე მხოლოდ ჟოზე მოურინიოს გამოსდიოდა. "მანჩესტერ სიტისა" და "არსენალის" შეხვედრის წინ პეპ გვარდიოლამ საკუთარ თავს არ უღალატა და ვენგერს კომპლიმენტები უძღვნა, შეაქო მისი სტილი, ხაზი გაუსვა ფრანგი მწვრთნელის დამსახურებას ფეხბურთის წინაშე...

თამაში დასრულდა, მაგრამ მოვლენები ასე მშვიდად აღარ გაგრძელებულა. ვენგერმა ეგრევე არბიტრების განქიქებით დაიწყო პრესკონფერენცია: "მსაჯობის დონე ყოველწლიურად ეცემა. მეორე გოლი ჩვენ გავუშვით პენალტიდან, რომელიც საერთოდ არ იყო.

არბიტრებს მეტი დაკვირვება მართებთ. ეს უკვე აუტანელია. რაჰიმ სტერლინგი ძალიან კარგად ყვინთავს და მე ჩემს სიტყვებზე ბოლომდე ვაგებ პასუხს. მესამე გოლი კი "სიტიმ" თამაშგარე მდგომარეობიდან გაიტანა", - თქვა ვენგერმა და იქვე დასძინა, არაერთი საგოლე მომენტი გვქონდაო...

"თაიმსის" ფურცელზე პენალტის ეპიზოდი გაარჩია ცნობილმა არბიტრმა მარკ კლატენბურგმა: "თერთმეტმეტრიანი აშკარა იყო. როცა ჩვენ განვიხილავთ კონკრეტულ ეპიზოდს, სათვალავში არ უნდა ჩავაგდოთ სტერლინგის რეპუტაცია. ჯარიმა იყო და პენალტი უნდა დანიშნულიყო", - თქვა კლატენბურგმა.

"მითხრეს, რომ მესამე გოლი თამაშგარე მდგომარეობიდან გავიტანეთ. არ ვიცი, იყო თუ არა თამაშგარე. თუ იყო, მე არ მინდა ასეთი გოლი და ასეთი მოგება. მეორეცაა - ეს ფეხბურთია და ასეთი რამ ყველას შეიძლება მოუვიდეს. "არსენალმა" 96-ე წუთზე გატანილი გოლით მოუგო "ბარნლის", რომელიც ხელით თამაშს მოჰყვა", - პეპმა ვეღარ მოითმინა და არსენს მაინც "უკბინა".

ინგლისურ მედიას კი ახალი საკბილო მიეცა - ყველა ერთხმად ქილიკობს - სად ნახა ვენგერმა "სიტისთან" მატჩში "არსენალის მიერ შექმნილი არაერთი მომენტიო?!.

კონტე და მოურინიო

"ხელის ჩამორთმევა? ეს ხომ მთავარი არ არის?! მთავარი ისაა, რომ ამ შეხვედრაში ჩვენ გავიმარჯვეთ. პატივისცემა მინდორზე უნდა გამოავლინო და არა მინდვრის მიღმა. მინდორზე კი ისეთი არაფერი ყოფილა", - თარგმანში შეცდომა არ გეგონოთ, ზუსტად ასე თქვა ანტონიო კონტემ "მანჩესტერ იუნაიტედთან" მოგებული შეხვედრის შემდეგ.

ჟოზე მოურინიო "ჩელსის" ვერც ერთ მწვრთნელს ვერ იტანს და, ცხადია, კონტეზეც ეჭვიანობს. და მაინც, ეს რაუნდი, ალბათ, პორტუგალიელმა მოიგო. მან კონტეს ემოციურ განცხადებას ასეთი პასუხი შეაგება:

"მე ხელი ჩამოვართვი კონტეს ასისტენტს. თავად ის სადღაც გაქრა. რა, მას უნდა ვსდიო"?!

ჰიუზი და მოურინიო

ჟოზე მოურინიო და კოლეგისთვის ხელის ჩამორთმევა - ეს გვარიანი თემაა სქელტანიანი წიგნისთვის. "სტოკთან" ფრედ დასრულებული შეხვედრის შემდეგ მან მეტოქე გუნდის მთელ სამწვრთნელო შტაბს ჩამოართვა ხელი, გარდა... მარკ ჰიუზისა. თამაშის მიმდინარეობისას მარკმა ჟოზეს მუჯლუგუნი უთავაზა, მერე კი მსაჯს მიმართა მოთხოვნით, "განსაკუთრებული" მინდვრიდან მიებრძანებინა.

"ის ჩემს ტექნიკურ ზონაში შემოვიდა. ასეთი რამ ფეხბურთის წესებით აკრძალულია. მგონი, ყველასთვის გასაგებია, რატომ ვკარი მას ხელი".
ინციდენტის თაობაზე მოკლედ მოჭრა მოურინიომაც: "მე არ მინდა სიბრიყვეების განხილვა. დაე, ეს თავად ბრიყვებმა განიხილონ".

კლოპი და მოურინიო

ეს "მეგობრობა" ჯერ კიდევ გასული სეზონიდან იწყება. მაშინ ჟოზე მოურინიომ გერმანელ მწვრთნელს "ნარცისი" უწოდა. იურგენ კლოპმა კი თქვა, რომ მას საერთოდ არ აინტერესებს, რას ლაპარაკობს მასზე მოურინიო. მას მერე, რაც "ენფილდზე" "ლივერპულისა" და "მანჩესტერის" შეხვედრა 0:0 მორჩა, კლოპმა თავი ვეღარ შეიკავა:

"ზუსტად ვიცოდი, როგორ ითამაშებდა ჩვენი მეტოქე. მოურინიო აკეთებს იმას, რასაც სწორად მიიჩნევს. ჩვენ არ შეგვიძლია ასეთი თამაში. ჩვენ ვერ ჩავჯდებით დაცვაში და ვერ ვიტყვით: "მოდი, დავიცადოთ". ადრე თუ გვიან ხომ მაინც გვექნება ერთი შანსი", - თქვა ჰერ იურგენმა.

მოურინიოს ამაზე არაფერი უთქვამს. იქნებ, მან, უბრალოდ, შეწყვიტა კოლეგების ნააზრევებზე კომენტარის გაკეთება? "საუთჰემპტონთან" შეხვედრის შემდეგ მან თქვა:

"ვერაფერი გამიგია. ზოგიერთი მწვრთნელისთვის ყველაფერი დასაშვებია. ყვირიან, მინდვრის კიდეზე დარბიან და მათ არავინ არაფერს ეუბნება, მე კი მაშინვე მაძევებენ".

1109
მკითხველის კომენტარები / 0 /
მსგავსი ამბები
რუბრიკის სხვა სიახლეები
;