[პრემიერლიგა] II ტური. ძველი ანგარიშები გასასწორებელია. სიტის რევანში სწყურია

ისე მოხდა, პრემიერლიგის მეორ ტურიც არ არის დიდი მატჩის გარეშე - „მანჩესტერ სიტი“ „ტოტენჰემს“ უმასპინძლებს და ყველა ღონეს იხმარს, რევანში აიღოს ჩემპიონთა ლიგის მეოთხედფინალში ნაწვნევი მარცხის გამო...

„მანჩესტერ სიტიმ“ გასულ სეზონში ჩემპიონთა ლიგა ვერ მოიგო და ამაში მთავარი დამნაშავე „ტოტენჰემია“. ყველას ახსოვს, რა და როგორ იყო იმ ზედრამატულ ორმატჩიან დუელში და ახლა ნამდვილად აღარ ჩავუღრმავდებით წარსულის დეტალებს. ფაქტი ისაა, რომ პეპ გვარდიოლას მაურისიო პოჩეტინოსთან ძველი ანგარიშები დარჩა გასასწორებელი.

ერთი შეხედვით, გვარდიოლას გაწვრთნილი „სიტი“ უბრალოდ შეუჩერებელი ჩანს, მაგრამ ფეხბურთში ყველაფერი ხდება, მით უმეტეს, „ტოტენჰემი“ თანდათან მკვიდრდება ევროპული გრანდების მარაქაში. ეჭვგარეშეა, პოჩეტინოს კრებული ბოლომდე შეეცდება მიმდინარე სეზონში ჩემპიონობისთვის ბრძოლას.

ორივე გუნდის შემადგენლობაში თამაშობენ შესანიშნავი ფეხბურთელები და ეს კიდევ უფრო გვიმტკიცებს იმედს, რომ კარგ სანახაობას ვიხილავთ. შემტევ ფეხბურთს ველით და, დიდი ალბათობით, მოლოდინი არ გაგვიცრუვდება.

პირველ ტურში „სიტიმ“ გოლების ფეიერვერკი მოაწყო, „ტოტენჰემმა“ კი ბოლოსღა მოიგო, მაგრამ ორი აზრი არ არის, ორი გუნდისთვის შაბათის დაპირისპირება გაცილებით მნიშვნელოვანია და ახლა მთელი ბრწყინვალებით უნდა წარსდგნენ გულშემატკივრების წინაშე.

„არსენალი“ ზედიზედ მეორე გამარჯვების მოპოვებას შეეცდება. ამ დროისთვის კვლავ გაურკვეველია სეად კოლაშინაცისა და მესუთ იოზილის ბედი. თუ ისინი შეძლებენ მინდორზე გასვლას, ლონდონელთა მდგომარეობა უკეთესი იქნება.

ერთი შეხედვით, რა შანსი უნდა ჰქონდეს „ბარნლის“ ნიკოლა პეპეთი გაძლიერებულ „მეთოფეებთან“, მაგრამ ნუ დაგვავიწყდება, რომ ამ გუნდს არაერთი ძლიერი გუნდი გაუმწარებია და ახლაც არ „იტყვის“ უარს. ერთია ოღონდ - „არსენალმა“ „ბარნლის“ ბოლო 10 ოფიციალური დაპირისპირებიდან 10-ვე მოუგო!

ჩემპიონობის მაძიებელი „ლივერპული“ გადაღლილია სუპერთასზე „ჩელსისთან“ შერკინებით, მაგრამ ტიტულის მოგებით ძალიან ბედნიერი და ალბათ უფრო მოტივირებულიცაა. რა თქმა უნდა, მერსისაიდელები ფავორიტებად ითვლებიან „საუთჰემპტონთან“ შეხვედრაში. „წმინდანებს“ ახლაც ჰყავთ რამდენიმე ნიჭიერი ახალგაზრდა ფეხბურთელი, მაგრამ მათი შემადგენლობა საგრძნობლადაა შესუსტებული.

განახლებული „ჩელსი“ „ლესტერს“უმასპინძლებს. „მანჩესტერთან“ განცდილ ძალიან მწარე (0:4) მარცხს სუპერთასის დათმობა მოჰყვა, ამდენად, ფრენკ ლემპარდსა და მის შეგირდებს უკან დასახევი გზა მოჭრილი აქვთ. გასაგებია, რომ ფრენკის ენდობიან, მაგრამ „ჩელსი“ ტოპკლუბია და არის ზღვარი, რომელზე დაბლაც გუნდი არავითარ შემთხვევაში არ უნდა დაეშვას...

„მანჩესტერ იუნაიტედმა“ პირველ ტურში დიდებული შოუ დადგა „ჩელსისთან“ შეხვედრაში. ვნახოთ, იქნება თუ არა გაგრძელება კერკეტ „ვულვზთან“ შეხვედრაში. მთავარია, „იუნაიტედმა“ ისევ ისე მწვავედ ითამაშოს შეტევაში, თორემ დაცვაში აღარ უნდა გაუჭირდეს ჰარი მაგუაირის დამატების შემდეგ.

თავის მხრივ, პორტუგალიელებით სავსე „ვულვზი“ ნებისმიერი მეტოქისთვის რთულ ბარიერს წარმოადგენს და ოლე გუნარ სულშერის ბიჭებს ნამდვილად არ ექნებათ იოლი გასეირნება.

II ტური
შაბათი, 17 აგვისტო
არსენალი-ბარნლი 15:30
ნორვიჩი-ნიუკასლი 18:00
საუთჰემპტონი-ლივერპული 18:00
ევერტონი-უოტფორდი 18:00
ბრაიტონი-ვესტ ჰემი 18:00
ასტონ ვილა-ბორნმუთი 18:00
მანჩესტერ სიტი-ტოტენჰემი 20:30
კვირა, 18 აგვისტო
შეფილდ იუნ-კრ. პალასი 17:00
ჩელსი-ლესტერი 19:30
ორშაბათი, 19 აგვისტო
ვულვზი-მანჩესტერ იუნ 23:00

1. მანჩესტ. სიტი 1 1 0 0 5:0 3
2. მანჩესტ. იუნ 1 1 0 0 4:0 3
3. ლივერპული 1 1 0 0 4:1 3
4. ბარნლი 1 1 0 0 3:0 3
5. ბრაიტონი 1 1 0 0 3:0 3
6. ტოტენჰემი 1 1 0 0 3:1 3
7. არსენალი 1 1 0 0 1:0 3
8. შეფილდ იუნ 1 0 1 0 1:1 1
9. ბორნმუთი 1 0 1 0 1:1 1
10. ევერტონი 1 0 1 0 0:0 1
11. კრ. პალასი 1 0 1 0 0:0 1
12. ლესტერი 1 0 1 0 0:0 1
13. ვულვზი 1 0 1 0 0:0 1
14. ნიუკასლი 1 0 0 1 0:1 0
15. ასტონ ვილა 1 0 0 1 1:3 0
16. ნორვიჩი 1 0 0 1 1:4 0
17. საუთჰემპტ. 1 0 0 1 0:3 0
18. უოტფორდი 1 0 0 1 0:3 0
19. ჩელსი 1 0 0 1 0:4 0
20. ვესტ ჰემი 1 0 0 1 0:5 0
480
მკითხველის კომენტარები / 0 /
მსგავსი ამბები
რუბრიკის სხვა სიახლეები
;