პრემიერლიგა. XI ტური: ნოემბრისთვის საკმაოდ ბევრია... [VIDEO]

"მანჩესტერმა" პრინციპული საგარეო მატჩი წააგო "ჩელსისთან" და თანაქალაქელი "სიტი" 8-ქულიან დისტანციაზე გაუშვა. თუმცა პრემიერლიგაში უკვე ისე მიდის საქმე, მხოლოდ "იუნაიტედის" მისია არ იქნება წინ გაჭრილი "ქალაქელების" შეჩერება. აქ არიან "ჩელსიც" და "ტოტენჰემიც"...

დღევანდელი გადასახედიდან, "სიტი" უფროა მზად ტიტულის მოსაგებად, ხოლო დანარჩენებს მეორეხარისხოვანი ლუკმების განაწილება მოუწევთ...

...მაგრამ ასეა დღეს და რა იქნება ხვალ და ზეგ, კაცმა არ იცის. "მანჩესტერ სიტი" ბრწყინვალე ფორმაშია, ყველა ფრონტზე დიდებულად გამოიყურება, მაგრამ საფეხბურთო პრაქტიკა გვასწავლის - მთელ მარათონს ერთი ამოსუნთქვით ვერ გაირბენ, სადღაც ფეხიც დაგიცდება, ჩავარდნაც გექნება, მაგრამ ჩვენზე კარგად ეს პეპ გვარდიოლამ იცის და ისეთი რეცეპტიც ექნება, მინიმალური დანაკარგებით რომ გავიდეს ფონს...

"ერთადერთი, რაზეც გული მწყდება, პირველ ტაიმში გამოუყენებელი შანსებია, - თქვა "სიტის" თავკაცმა უკბილო "არსენალთან" გამარჯვების შემდეგ, - გვაკლდა ბოლო ზუსტი პასი და დაგვირგვინება. მაგრამ მეორე ტაიმში ყველაფერი თავის ადგილას დადგა. ჩვენ დავიმსახურეთ გამარჯვება და ახლა 12-12 ქულით ვუსწრებთ "არსენალსა" და "ლივერპულს", 8 ქულით ჩამოგვრჩება "ტოტენჰემი" (იმ მომენტისთვის "ჩელსი"-"მანჩესტერ იუნაიტედი" დაწყებული არ იყო)... ვფიქრობ, ნოემბრისთვის ეს საკმაოდ ბევრია. ახლა ერთადერთი საფიქრალი ის მაქვს, ბიჭები ჯანმრთელები დაბრუნდნენ სანაკრებო ბატალიებიდან".

არსენ ვენგერს მშვენიერი მიზეზი ჰქონდა წაგების გასამართლებლად - ვის შეუძლია ამ გუნდის შეჩერებაო?! თუმცა ბოლომდე კაპიტულაციაზე არ წავიდა და ესეც დასძინა:

"ძალიან ძნელი იქნება ტიტულისთვის ბრძოლა, მაგრამ რა იცი, რა ხდება... ყველაფერია მოსალოდნელი... ვფიქრობ, ალექსის სანჩესმა დღეს ყველაფერი გააკეთა გუნდისთვის, მაგრამ გუნდმა ვერ აუბა მხარი - მას არ ჰქონდა საკმარისი მხარდაჭერა პარტნიორებისგან და ამიტომაც იყო ჩვენ შეტევები არაეფექტური".

"მანჩესტერ სიტის" 11 ტურის შემდეგ 31 ქულა და ბურთების საოცარი სხვაობა (+31) აქვს, რაც პრემიერლიგის საუკეთესო სტარტია. ყველა ტურნირს თუ მივათვლით, გვარდიოლას ბიჭებმა უკვე 52 გოლს მოუყარეს თავი. ესეც საუკეთესო მაჩვენებელია პრემიერლიგის ცალკე აღებული კლუბისთვის 1992/93 წლების სეზონიდან მოყოლებული.

ტურის მთავარი მატჩი მაინც "ჩელსი"-"მანჩესტერ იუნაიტედი" იყო. ჟოზე მოურინიოს სტუმრობა "სტემფორდ ბრიჯზე" ყოველთვის მნიშვნელოვანი მოვლენაა. აქ მან დაუვიწყარი სეზონები გაატარა და უამრავი ტიტული დატოვა. აქ ის ყოველთვის მიღებული კაცია, თუმცა მისი პერსონიდან გამომდინარე, სწორედაც "ჩელსის" სახლში გამარჯვებააა მისთვის შეუფასებელი მოვლენა,

ოღონდ, ეგ არის, რომ "იუნაიტედის" მწვრთნელის რანგში ზედიზედ მესამე მატჩია (სათასო შეხვედრის ჩათვლით) "სტემფორდ ბრიჯიდან" ხელცარიელი ბრუნდება - ქულა კი არა, გოლიც ვერ გააქვს, ხოლო შარშან სულაც 0:4 დამარცხდა.

თავისი ანგარიშები ჰქონდა ანტონიო კონტეს. "ჩელსი" წელს ვეღარ "დაფრინავს" და კოჭებში ეტყობა, ტიტულის შენარჩუნება ძალიან, ძალიან გაუჭირდება. კონტეს გარშემო მოარული ხმებიც ვიცით - ბოლო პერიოდში მის გათავისუფლებაზე სულ უფრო ხშირად ლაპარაკობენ. აქ საქმე ეხება არა იმდენად შედეგებს, რამდენადაც ბოსებთან უთანხმოებას. ზეემოციურმა იტალიელმა გასულ ზაფხულს თავის გემოზე ვერ დააკომპლექტა გუნდი... თუმცა, "მანჩესტერთან" მოგების შემდეგ მას აპლოდისმენტები არ ასცდება.

...ალვარო მორატამ სექტემბრის მერე პირველად გაიტანა და კონტეს სკამი გაუმყარა. ესპანელმა წამით დაიგულა სივრცე და სესარ ასპილიკუეტას მიერ ჩაწოდებულ ბურთს კარში მიუჩინა ადგილი.

"ეს იყო ძალიან საჭირო გამარჯვება. ყველამ იცით, რა ძალის გუნდია "მანჩესტერ იუნაიტედი", ამიტომ, დღეს მოგება ჰაერივით გვჭირდებოდა საკუთარ ძალებში დასარწმუნებლად. "ჩელსიმ" აჩვენა დიდი სურვილი და ჟინი. ეს არის ის, რაც ყოველთვის უნდა იყოს მოედანზე, თორემ, შეიძლება, ხან წააგო, ხან მოიგო... დღეს ჩვენ გავიმარჯვეთ და ამით ძალიან ბედნიერები ვართ", - თქვა კონტემ.

"ისეთი თამაში იყო, ორივე გუნდს შეეძლო მოგება, - ეს უკვე მოურინიოს სიტყვებია, - მთავარი იყო, პირველი ვინ გაიტანდა... სამწუხაროდ, ეს არ იყო "იუნაიტედი". პირველ ტაიმში რეალურად თანაბარი თამაში იყო, მეორე ნახევარში კი, გარკვეულწილად, არ გაგვიმართლა, რადგან, როგორც კი "ჩელსიმ" მცირე უპირატესობა მოიპოვა, მაშინვე გაიტანა".

ბოლო 15-20 წუთის განმავლობაში "მანჩესტერი" უკეთესი იყო, უტევდა, შანსებიც ჰქონდა, მაგრამ... ტაბლო ულმობელია - ზედიზედ მეორე საგარეო მარცხი!

"ტოტენჰემმა" ძლივს მოუგო "კრისტალ პალასს", "ლივერპულმა" კი შანსი არ დაუტოვა "ვესტ ჰემს", რომლის მთავარმა მწვრთნელმა სლავენ ბილიჩმა თქვა, რომ ახლა მისი ბედი მთლიანად კლუბის მესვეურების ხელშია...

კვირას, როგორც იქნა, გაიმარჯვა "ევერტონმა". "გუდისონ პარკზე" მოვლენები დრამატულად წარიმართა. "კანფეტებმა", რომელთაც ჯერ კიდევ არ ჰყავთ კონტრაქტიანი მთავარი მწვრთნელი (სულ უფრო იზრდება დევიდ მოიესის დაბრუნების შანსი), ორბურთიანი ჩამორჩენა გააბათილეს, წინაც გავიდნენ და... ხელიდან გაუშვებდნენ სიმწრით მოპოვებულ გამარჯვებას, მსაჯის მიერ დამატებულ მე-11(!) წუთზე (დიდი ხანი დასჭირდა "უოტფორდის" მეკარე ეურელიო გომეშის გატეხილი თავის "გამრთელებას") მეკარე ჯორდან პიკფორდს თომ ქლევერლის პენალტი რომ გაენეიტრალებინა.

ფაქტები
* "ჩელსიმ" "მანჩესტერ იუნაიტედთან" ბოლო 16 საშინაო მატჩიდან მხოლოდ 1 წააგო, 10 მოიგო და ფრედ ითამაშა - 5.
* მიმდინარე სეზონში სესარ ასპილიკუეტამ ალვარო მორატას მე-5 საგოლე პასი გაუკეთა.
* "ჩელსი"-"მანჩესტერ იუნაიტედის" მატჩში სესკ ფაბრეგასმა 6 საგოლე შანსი შეუქმნა პარტნიორებს.
* "მანჩესტერ სიტისა" და "იუნაიტედს" შორის 8-ქულიანი სხვაობაა. პრემიერლიგის ისტორიაში ეს არის ამ გუნდებს შორის ყველაზე დიდი სხვაობა 11 ტურის შემდეგ.
* 2014/15 წლების სეზონიდან მოყოლებული, "არსენალმა" "დიდი ექვსეულის" წარმომადგენლებთან მხოლოდ ერთი საგარეო მატჩი მოიგო, ფრედ ითამაშა 7 და წააგო - 10.
* მიმდინარე სეზონის დაწყებიდან "არსენალმა" ყველაზე მეტი, 12 გოლი გაუშვა 11-მეტრიანის ნიშნულიდან.
* ზედიზედ მესამე პრემიერლიგური მატჩია, "სტოკი"-"ლესტერი" 2:2 მთავრდება.
* 2017 წლის მაისის შემდეგ, "ვესტ ბრომვიჩმა" წააგო ყველა ის 8 მატჩი, რომელშიც ანგარიში მეტოქეს ჰქონდა გახსნილი.
* "ვესტ ბრომვიჩის" მწვრთნელმა ტონი პულისმა ამ სეზონში პირველად გამოიყენა სამი შეცვლის უფლება.
* "ბორნმუთმა" მოიგო ყველა ის 6 მატჩი, რომელშიც სტივ კუკმა გაიტანა გოლი.
* "ნიუკასლი"-"ბორნმუთის" მატჩში 20 კუთხური მოაწოდეს. ამ სეზონში მხოლოდ ერთი თამაში ("კრისტალ პალასი"-"ჰადერსფილდი") იყო, რომელშიც უფრო მეტი კუთხური (21) დაინიშნა.
* "საუთჰემპტონმა" პრემიერლიგის ბოლო 12 საშინაო მატჩიდან 9-ში ვერ გაიტანა გოლი.
* "სუონსიმ" ამ სეზონში მხოლოდ ერთხელ შეძლო საკუთარ მოედანზე კარის "მშრალად" შენახვა.
* პრემიერლიგის პირველ 11 მატჩში მოჰამედ სალაჰის ხელი "ლივერპულის" 9 გოლში ურევია (7 გაიტანა, 2 გაატანინა).
* "ლივერპულმა" "უემბლიზე" ბოლო 2 მატჩში 8 გოლი გაიტანა - ზუსტად იმდენი, რამდენიც "ვესტ ჰემმა" - ბოლო 9 საშინაო მატჩში.
* "უემბლიზე" გადასვლის შემდეგ "ვესტ ჰემმა" უფრო მეტი თამაში წააგო, ვიდრე მოიგო - 9 მოგება, 4 ფრე, 11 წაგება.
* რაც იურგენ კლოპი "ლივერპულის" მწვრთნელია, ამ გუნდმა 14 მატჩში შეძლო 4 და მეტი გოლის გატანა. ამ პერიოდში მხოლოდ "მანჩესტერ სიტისა" და "ტოტენჰემს" აქვთ უკეთესი შედეგი (16-16).
* ჯო ჰარტმა 18 პრემიერლიგურ მატჩში მარტო "ლივერპულისგან" 33 გოლი გაუშვა - ცხრით მეტი, ვიდრე ნებისმიერი სხვა გუნდისგან.
* 1994 წლის შემდეგ "ევერტონმა" პრემიერლიგაში პირველად მოახერხა საკუთარ მოედანზე ორბურთიანი ჩამორჩენის შემდეგ გამარჯვება, ხოლო კლუბის ისტორიაში - მეორედ.

ინგლისი. პრემიერლიგა. XI ტური
სტოკი-ლესტერი 2:2
გოლები: 0:1 იბარა (33), 1:1 შაქირი (39), 1:2 მაჰრეზი (60), 2:2 კრაუჩი (73)

ჰადერსფილ.-ვესტ ბრომვიჩი 1:0
გოლი: 1:0 ვან ლა პარა (44)
გაძევება: შინდლერი (57. ჰადერსფილდი)

ნიუკასლი-ბორნმუთი 0:1
გოლი: 0:1 კუკი (90+2)

საუთჰემპტონი-ბარნლი 0:1
გოლი: 0:1 ვოუკსი (81)

სუონსი-ბრაიტონი 0:1
გოლი: 0:1 მიურეი (29)

ვესტ ჰემი-ლივერპული 1:4
გოლები: 0:1 სალაჰი (21), 0:2 მატიპი (24), 1:2 ლანცინი(55), 1:3 ოქსლეიდ-ჩემბერლენი (56), 1:4 სალაჰი (75)
ლივერპული (4-3-3): მინოლე - გომესი, მატიპი, კლავანი, მორენო - ჩანი, ოქსლეიდ-ჩემბერლენი (87. ლოვრენი), ვეინალდუმი - სალაჰი, ფირმინო (87. სოლანკე), მანე (77. მილნერი).

ტოტენჰემი-კრ. პალასი 1:0
გოლი: 1:0 სონი (64)
ტოტენჰემი (3-5-1-1): გასანიგა - დავინსონ სანჩესი, დაიერი, ვერტონგენი - ორიე, სისოკო, უინქსი (46. დემბელე), ერიქსენი, როუზი (90+2. ბ. დევისი) - სონი, კეინი (77. ლორენტე).

მანჩესტერ სიტი-არსენალი 3:1
გოლები: 1:0 დე ბრუინი (19), 2:0 აგუერო (50-პენ), 2:1 ლაკაზეტი (65), 3:1 გაბრიელ ჟეზუში (74)
მანჩესტერ სიტი (4-3-3): ედერსონი - უოლკერი, სტოუნზი, ოტამენდი, დელფი - დე ბრუინი, ფერნანდინიო, დავიდ სილვა - სტერლინგი (78. სტერლინგი), სანე (87. ბერნარდო სილვა), აგუერო (62. გაბრიელ ჟეზუში).
არსენალი (4-3-2-1): ჩეხი - ბელერინი, კოსიელნი, მონრეალი, კოლაშინაცი - რემზი, კოკელენი (56. ლაკაზეტი), ჯაკა (78. ჟირუ) - იოზილი, ივობი (78. უილშირი) - ალექსის სანჩესი.

ჩელსი-მანჩესტერ იუნ 1:0
გოლი: 1:0 მორატა (55)
ჩელსი (3-4-1-2): კურტუა - ასპილიკუეტა, კრისტენსენი, კეჰილი - ძაპაკოსტა (66. რიუდიგერი), კანტე, ბაკაიოკო, ალონსო - ფაბრეგასი (79. დრინკუოტერი) - აზარი (87. ვილიანი), მორატა.
მანჩესტერი (3-4-1-2): დე ხეა - ბაილი, სმოლინგი, ჯოუნსი (63. ფელაინი) - ვალენსია, ერერა, მატიჩი, იანგი (79. ლინგარდი) - მხითარიანი (63. მარსიალი) - რაშფორდი, ლუკაკუ.

ევერტონი-უოტფორდი 3:2
გოლები: 0:1 რიჩარლისონი (46), 0:2 კაბასელე (64), 1:2 ნიასე (67), 2:2 კალვერტ-ლიუინი (74), 3:2 ბეინსი (90+1-პენ)
გამოუყენებელი პენალტი: ქლევერლი (90+11. უოტფორდი)

ბომბარდირები: 8 - სერხიო აგუერო (მანჩესტერ სიტი), ჰარი კეინი (ტოტენჰემი); 7 - რომელუ ლუკაკუ (მანჩესტერ იუნ), გაბრიელ ჟეზუში (მანჩესტერ სიტი), ალვარო მორატა (ჩელსი), მოჰამედ სალაჰი (ლივერპული), რაჰიმ სტერლინგი (მანჩესტერ სიტი); 6 - ლეროი სანე (მანჩესტერ სიტი), ჯეიმი ვარდი (ლესტერი), ალექსანდრ ლაკაზეტი (არსენალი).

მომდევნო ტური
18 ნოემბერი: არსენალი-ტოტენჰემი, ბორნმუთი-ჰადერსფილდი, ბარნლი-სუონსი, კრ. პალასი-ევერტონი, ლესტერი-მანჩესტერ სიტი, ლივერპული-საუთჰემპტონი, ვესტ ბრომვიჩი-ჩელსი, მანჩესტერ იუნ-ნიუკასლი
19 ნოემბერი: უოტფორდი-ვესტ ჰემი
20 ნოემბერი: ბრაიტონი-სტოკი

ყოველდღიური სპორტული გაზეთი "ლელო"
941
მკითხველის კომენტარები / 0 /
მსგავსი ამბები
რუბრიკის სხვა სიახლეები
;