პრემიერლიგა. XXIX ტურის მიმოხილვა: 'ლივერპულმა' ლიდერობა დათმო, 'არსენალს' მოგებამდე ცოტა დააკლდა, ლუკაკუმ კი, თავი შეგვახსენა! [VIDEO]

პრემიერლიგის სათავეში დაბრუნდა “მანჩესტერ სიტი”, რომელმაც კარგად შეირგო “ლივერპულის” საჩუქრები. იურგენ კლოპის გუნდმა დიდხანს ვერ გაძლო მწვერვალზე. ეტყობა, ძალიან მძიმეა ლიდერის ტვირთი...

...მორიგი ტური ლონდონური დერბით გაიხსნა. “ტოტენჰემსა” და “არსენალს” შორის მატჩი, როგორც ოდინდელ მოქიშპეთა შორის დამოკიდებულებას შეჰფერის, ძალიან დაძაბული გამოდგა. ბოლო წუთამდე ვერავინ იტყოდა, ვის დარჩებოდა გამარჯვება.

ანგარიში მე-16 წუთზე გაიხსნა. “არსენალმა” ბურთი მეტოქის საჯარიმოსკენ წაიღო, აარონ რემზი მეკარესთან პირისპირ აღმოჩნდა და შანსი ხელიდან არ გაუშვა. თამაშის დასრულებამდე 15 წუთით ადრე კი კეინმა გაათანაბრა თერთმეტმეტრიანით. მანამდე ჰარის ულამაზესი გოლი არ ჩაუთვალეს ოფსაიდის გამო...

კულმინაცია დამატებულ წუთზე დადგა, როცა პიერ-ემერიკ ობამეიანგს 11 მეტრიდან უგო ლორისმა არ გაატანინა და ქულა გადაურჩინა თავის გუნდს.
“შეიძლება, ვიღაც სხვანაირად ფიქრობს, მაგრამ მიმაჩნია, რომ კარგად ვითამაშეთ. ჩვენ ყველანაირად ვცდილობდით თამაშის ტემპის კონტროლს”, - თქვა ნამატჩევს “ტოტენჰემის” თავკაცმა მაურისიო პოჩეტინომ.

“კარგი თამაში გამოვიდა. მსაჯების სამუშაო ძალიან მძიმეა, მაგრამ მიმაჩნია, რომ დღეს მათ კარგად გაართვეს თავი ამოცანას”, - ეს უკვე “არსენალის” ესპანელმა დამრიგებელმა უნაი ემერიმ თქვა.

“მანჩესტერ იუნაიტედმა” საშინაო ასპარეზზე ძლივს მოუგო აუტსაიდერ “საუთჰემპტონს”. შესანიშნავი იყო რომელუ ლუკაკუ. ბელგიელმა ლამაზი გოლები შეყარა და ოლე გუნარ სულშერს დააფიქრა იმაზე, რომ მისი ჩამოწერა ჯერ ძალიან ადრეა.

“აი, ასეთი თამაშის გამო გვიყვარს ფეხბურთი და გვცვივა თმები. მეტოქე მაგრად გვებრძოდა, მაგრამ დიდი ჟინი გამოვავლინეთ და დამსახურებულად გავიმარჯვეთ”, - თქვა “იუნაიტედის” ნორვეგიელმა დამრიგებელმა.

“მანჩესტერ სიტის” ტოტალური უპირატესობა ჰქონდა “ბორნმუთთან”, მაგრამ მხოლოდ ერთ გოლს დასჯერდა, ისევე, როგორც “ვესტ ჰემთან” წინა ტურის მატჩში. ამჯერად, გამარჯვების გოლი მეორე ტაიმის დასაწყისში რიად მაჰრეზმა შეაგდო დავიდ სილვას დიდებული გარჯის წყალობით.

ნამატჩევს პეპ გვარდიოლამ საგოლე მომენტების გამოუყენებლობაზე დაიჩივლა, “სიტის” კი ლაზარეთი შეევსო, რაკი ვენსან კომპანი, ჯონ სტოუნზი და კევინ დე ბრუინი დაშავდნენ. ამ მოგებით “სიტი” ლივერპულ დერბიმდე გალიდერდა.

ლივერპულური დერბი კი უგოლო ფრით დასრულდა. “ევერტონმა” “სიტის” კარგი საჩუქარი გაუკეთა და მრისხანე მეტოქეს თუმც ვერ გაუტანა, არც გაატანინა. სტუმართაგან ორი საუცხოო შანსი ჰქონდა მოჰამედ სალაჰს, მაგრამ ეგვიპტელმა ორივე გაანიავა.

“ჩელსიმ” დაძაბულ ბრძოლაში აჯობა “ფულჰემს”, რომელსაც პოსტიდან დათხოვნილი კლაუდიო რანიერის ასისტენტი სკოტ პარკერი მოძღვრავდა. უნდა აღინიშნოს გონსალო იგუაინის გოლი. “ფულჰემმა” ბევრი კი იბრძოლა, მაგრამ ვერაფერს გახდა.

ფაქტები

* “ტოტენჰემმა” მიმდინარე პრემიერლიგაში სეზონში პირველად ითამაშა ფრედ.

* “არსენალი” პრემიერლიგის ამ სეზონში იმ ერთადერთ გუნდად რჩება, რომელმაც ყველა მატჩში გაუშვა მინიმუმ ერთი გოლი მაინც.

* ჰარი კეინი 9 გოლით ჩრდილოლონდონური დერბის ყველა დროის საუკეთესო მეგოლეა.

* მაურისიო პოჩეტინოს არასოდეს წაუგია საშინაო მატჩი “არსენალთან”.

* ოლე გუნარ სულშერმა გაიმეორა მაურიციო სარის რეკორდი - პირველი 12 შეხვედრა პრემიერლიგაში წაუგებლად ჩაატარა.

ტოტენჰემი-არსენალი 1:1
გოლები: 0:1 რემზი (16), 1:1 კეინი (74-პენ)
გამოუყენებელი პენალტი: ობამეიანგი (90+1. არსენალი)
გაძევება: ტორეირა (90+5. არსენალი)

ბორნმუთი-მანჩესტერ სიტი 0:1
გოლი: 0:1 მაჰრეზი (55)

ბრაიტონი-ჰადერსფილდი 1:0
გოლი: 1:0 ანდონე (79)

ბარნლი-კრ. პალასი 1:3
გოლები: 0:1 ბერდსლი (15-საკ. კარში), 0:2 ბატშუაი (48), 0:3 ზაჰა (76), 1:3 ბარნსი (90)

მანჩესტერ იუნ-საუთჰემპტ. 3:2
გოლები: 0:1 ვალერი (26), 1:1 პერეირა (53), 2:1 ლუკაკუ (59), 2:2 უარდ-პროუსი (75), 3:2 ლუკაკუ (88)
გამოუყენებელი პენალტი: პოგბა (90+4. მანჩესტერ იუნ)

ვულვზი-კარდიფი 2:0
გოლები: 1:0 ჟოტა (16), 2:0 ხიმენესი (18)

ვესტ ჰემი-ნიუკასლი 2:0
გოლები: 1:0 რაისი (7), 2:0 ნოუბლი (42-პენ)

უოტფორდი-ლესტერი 2:1
გოლები: 1:0 დინი (5), 1:1 ვარდი (75), 2:1 ე. გრეი (90+2)

ფულჰემი-ჩელსი 1:2
გოლები: 0:1 იგუაინი (20), 1:1 ჩემბერსი (28), 1:2 ჟორჟინიო (31)

ევერტონი-ლივერპული 0:0

1. მანჩესტ. სიტი 29 23 2 4 76:20 71
2. ლივერპული 29 21 7 1 64:15 70
3. ტოტენჰემი 29 20 1 8 56:30 61
4. მანჩესტ. იუნ 29 17 7 5 58:38 58
5. არსენალი 29 17 6 6 61:39 57
6. ჩელსი 28 17 5 6 49:30 56
7. ვულვზი 29 12 7 10 37:35 43
8. უოტფორდი 29 12 7 10 41:41 43
9. ვესტ ჰემი 29 11 6 12 37:41 39
10. ევერტონი 29 10 7 12 39:39 37
11. ლესტერი 29 10 5 14 35:41 35
12. ბორნმუთი 29 10 4 15 39:54 34
13. კრ. პალასი 29 9 6 14 35:39 33
14. ნიუკასლი 29 8 7 14 26:36 31
15. ბრაიტონი 28 8 6 14 30:41 30
16. ბარნლი 29 8 6 15 32:53 30
17. საუთჰემპტ. 29 6 9 14 32:49 27
18. კარდიფი 29 7 4 18 25:57:00 25
19. ფულჰემი 29 4 5 20 27:65 17
20. ჰადერსფილ. 29 3 5 21 15:51 14

ბომბარდირები: 18 - სერხიო აგუერო (მანჩესტერ სიტი); 17 - მოჰამედ სალაჰი (ლივერპული); 16 - ჰარი კეინი (ტოტენჰემი), პიერ-ემერიკ ობამეიანგი (არსენალი).

მომდევნო ტური
9 მარტი: კრისტალ პალასი-ბრაიტონი, კარდიფი-ვესტ ჰემი, ჰადერსფილდი-ბორნმუთი, ლესტერი-ფულჰემი, ნიუკასლი-ევერტონი, საუთჰემპტონი-ტოტენჰემი, მანჩესტერ სიტი-უოტფორდი
10 მარტი: ლივერპული-ბარნლი, ჩელსი-ვულვზი, არსენალი-მანჩესტერ იუნაიტედი

ყოველდღიური სპორტული გაზეთი "ლელო"
500
მკითხველის კომენტარები / 0 /
მსგავსი ამბები
რუბრიკის სხვა სიახლეები
;