პრემიერლიგა. XXV ტურის წინათქმა: სანჩესი - უნაიტედის უპირატესობაა

სათასო ბატალიების შემდეგ პრემიერლიგა შუა კვირიდან ბრუნდება. ცენტრალური მატჩი "ტოტენჰემი"-"მანჩესტერ იუნაიტედია", რომელიც ზეგ დააგვირგვინებს XXV ტურს...

...მანამდე კი "არსენალი" აუტსაიდერ "სუონსის" ესტუმრება და ეცდება, გააგრძელოს ბრძოლა ჩემპიონთა ლიგის ზონაში მოსახვედრად, სადაც ძალიან დიდი კონკურენციაა.

24 იანვარს არსენ ვენგერის გუნდი ლიგის თასის ფინალში გავიდა მას მერე, რაც საპასუხო მატჩში "ჩელსი" 2:1 დაამარცხა. დიდი ალბათობით, სწორედ დღევანდელ მატჩში შედგება ჰენრიხ მხითარიანის დებიუტი. ტრავმირებულები არიან დენი უელბეკი და ოლივიე ჟირუ.

"მეთოფეთა" თავდასხმას უთუოდ გააძლიერებს პიერ-ემერიკ ობამეიანგი, რომლის ტრანსფერზეც "არსენალი" გუშინ "დორტმუნდს" შეუთანხმდა, თუმცა, გარკვეული ფორმალობების გამო, დღევანდელ მატჩში გაბონელის მონაწილეობა ვერ მოხერხდება.

რაც შეეხება "სუონსის", შეგახსენებთ, რომ წინა ტურში "გედებმა" კარგ ფორმაში მყოფი "ლივერპული" დაამარცხეს (1:0).

ეს "ლივერპული" კი ხვალ საკადრო პრობლემებით ესტუმრება "ჰადერსფილდს", რომელსაც პრემიერლიგაში 16 დეკემბრის მერე არ მოუგია. იურგენ კლოპის გუნდს ტრავმების გამო დააკლდებიან ადამ ლალანა, რომელიც ხანგრძლივი პაუზის შემდეგ დიდი ხანი არ არის, რაც დაბრუნდა, ცენტრალური მცველი რაგნარ კლავანი და შემტევი დენ სტარიჯი. თუმცა ეს უკანასკნელი კლოპის გეგმებში აღარ ჯდება.

"ბორნმუთთან" საშინაო მატჩის წინ პრობლემები აქვს "ჩელსისაც". საეჭვოა გუნდის ძირითადი მეკარის, ტიბო კურტუას, ფორვარდ ალვარო მორატასა და გარემარბ ვილიანის ჯანმრთელობის მდგომარეობა. ლონდონელებს არ ექნებათ იოლი მატჩი, რადგან "ბორნმუთი" უკვე 5 ტურია, არ აგებს.

ჩემპიონობის უპირველესი პრეტენდენტი "მანჩესტერ სიტი" "ვესტ ბრომვიჩს" უმასპინძლებს. პეპ გვარდიოლა ვერ დაიხმარს ფორვარდ გაბრიელ ჟეზუშს, რაც ნამდვილად არ უნდა იყოს გადაუჭრელი პრობლემა. საინტერესოა, რომ "სიტიმ" "ვესტ ბრომვიჩი" პრემიერლიგის ბოლო 12 დაპირისპირებაში (2011 წლის 26 დეკემბრიდან მოყოლებული) დაამარცხა.

სამაგიეროდ, "იადონებს" წარმატებები აქვთ მიმდინარე ბატალიებში - ბოლო 4 მატჩიდან (სათასოების ჩათვლით) 3 მოიგეს, მათ შორის, სტუმრად "ლივერპულთან" (3:2).

დაბოლოს ტურის მთავარ მატჩზეც ვთქვათ. მაურისიო პოჩეტინოს "ტოტენჰემი" ვერ იქნება ფავორიტი სერიოზული საკადრო სირთულეების გამო. თავად განსაჯეთ - ტრავმირებულები არიან ნახევარდაცვის ლიდერი კრისტიან ერიქსენი და მეკარე უგო ლორისი, თუმცა არ არის გამორიცხული, ხვალ ორივე ვიხილოთ მოედანზე.

ალექსის სანჩესი კი "მანჩესტერ იუნაიტედის" მაისურით პირველ პრემიერლიგურ (მან უკვე ითამაშა "იოვილთან" სათასო შეხვედრაში) მატჩს გამართავს, ამას გარდა, მწყობრში არიან გუნდის სხვა ლიდერებიც, რაც ჟოზე მოურინიოს გუნდს გარკვეულ უპირატესობას ანიჭებს.

საინტერესოა, რომ ბოლო 6 მატჩიდან (იგულისხმება სათასო შეხვედრებიც) "იუნაიტედმა" 5 მოიგო, ერთი ფრედ ითამაშა და არ გაუშვა არცერთი გოლი. უშუალოდ "ტოტენჰემისთვის" კი არ მოუგია სტუმრად 2012 წლის 4 მარტის შემდეგ. თავის მხრივ, "მამლებმა" მოურინიოს "წითელი ეშმაკები" წინა ორ საშინაო მატჩში დაამწუხრეს (2:1, 3:0).

ფაქტები

* "არსენალმა" "სუონსის" ბოლო 5 პრემიერლიგური მატჩიდან 4 მოუგო, ამასთან, გაუტანა მინიმუმ ერთი გოლი მაინც ყველა 6 საგარეო მატჩში.

* "ვესტ ჰემს" არ წაუგია "კრისტალ პალასთან" ბოლო 5 პრემიერლიგური დაპირსპირება - 3 მოგება, 2 ფრე.

* "კრისტალ პალასმა" პრემიერლიგის ბოლო 15 მატჩიდან მხოლოდ 3 წააგო (5 მოგება, 7 ფრე) და ყველა ეს მარცხი იყო ლონდონურ დერბიში ("არსენალთან" და "ტოტენჰემთან").

* იურგენ კლოპის მწვრთნელობის პერიოდში "ლივერპულს" არ წაუგია ზედიზედ 2 პრემიერლიგური მატჩი.

* "ჰადერსფილდს" არ წაუგია პრემიერლიგის ზედიზედ 2 საშინაო მატჩი.

* "ჩელსიმ" პრემიერლიგის ბოლო ოთხ მატჩში მოახერხა კარის "მშრალად" შენახვა, რაც არ მომხდარა 2015 წლის იანვრის შემდეგ.

* ედენ აზარმა ("ჩელსი"), უშუალოდ "ბორნმუთს", პრემიერლიგის ბოლო 4 მატჩში 5 გოლი გაუტანა.

* 11 მატჩია, "საუთჰემპტონს" არ მოუგია პრემიერლიგის მატჩი.

* უშუალოდ "ვესტ ბრომვიჩის" წინააღმდეგ გამართულ 10 მატჩში სერხიო აგუერო ("მანჩესტერ სიტი") მონაწილეობდა 11 გოლში - 7 გაიტანა, 4 გაატანინა.

* "სტოკმა" "უოტფორდს" ბოლო 4 დაპირისპირებიდან (იგულისხმება მხოლოდ პრემიერლიგა) ოთხივე მოუგო.

* ხავი გრასია ("უოტფორდი") შეიძლება გახდეს ამ გუნდის პირველი მწვრთნელი, ვინც თავის სადებიუტო პრემიერლიგურ მატჩს მოიგებს.

* "მანჩესტერ იუნაიტედმა" "ტოტენჰემს" 80 საჩემპიონატო მატჩი მოუგო. ეს მესამე შედეგია "ასტონ ვილასა" (85) და "არსენალის" (82) შემდეგ.

* ჰარი კეინს ("ტოტენჰემი") ერთი ზუსტი დარტყმა აშორებს პრემიერლიგაში 100-გოლიან ზღვრამდე.

ინგლისი.პრემიერლიგა. XXV ტური
სამშაბათი, 30 იანვარი

სუონსი-არსენალი 23:45
ვესტ ჰემი-კრ. პალასი 23:45
ჰადერსფილდი-ლივერპული 23:59

ოთხშაბათი, 31 იანვარი

ჩელსი-ბორნმუთი 23:45
ევერტონი-ლესტერი 23:45
ნიუკასლი-ბარნლი 23:45

საუთჰემპტონი-ბრაიტონი 23:45
მანჩესტერ სიტი-ვესტ ბრომვ. 23:59
სტოკი-უოტფორდი 23:59
ტოტენჰემი-მანჩესტერ იუნ 23:59

ბომბარდირები: 21 - ჰარი კეინი (ტოტენჰემი); 18 - მოჰამედ სალაჰი (ლივერპული); 16 - სერხიო აგუერო (მანჩესტერ სიტი); 14 - რაჰიმ სტერლინგი (მანჩესტერ სიტი).

ყოველდღიური სპორტული გაზეთი "ლელო"
1044
მკითხველის კომენტარები / 0 /
მსგავსი ამბები
რუბრიკის სხვა სიახლეები
;