[პრემიერლიგა. XXVII ტური. VIDEO] სიტის ამბებმა ტური დაჩრდილა...

უკვე ცნობილია - "მანჩესტერ სიტი" 2 სეზონით მოიკვეთა ჩემპიონთა ლიგიდან! - მეხივით გავარდა მოწმენდილ ცაზე უეფას გადაწყვეტილების გამოცხადების შემდეგ. "ქალაქელები" ვერ ითამაშებენ ევროპის უმთავრესი საკლუბო ტურნირის 2020/21 და 2021/22 წლების სეზონებში (ეს ნიშნავს იმას, რომ მიმდინარე სეზონში პრემიერლიგის მეხუთეადგილოსანი ავტომატურად მიიღებს ჩემპიონთა ლიგის საგზურს).

უეფას "სიტისთან" პრეტენზიები რომ ჰქონდა, დიდი ხანია ცნობილია და ჩვენც არაერთგზის დაგვიწერია ამ თემაზე. აკი ნათქვამია კიდეც თავად მანჩესტერული კლუბის განცხადებაში - ეს გადაწყვეტილება ჩვენთვის სიურპრიზი არ ყოფილა, თუმცა კი იმედგაცრუებულები დავრჩითო...

...გარდა დისკვალიფიკაციისა, "მანჩესტერ სიტი" 30 მილიონი ევროს ჯარიმასაც გადაიხდის. საქმე ეხება 2012-16 წლებში ფინანსური "ფეარ პლეის" დარღვევას. კლუბის მესვეურები სპონსორული შემოსავლებით მანიპულირებდნენ - ხელოვნურად ზრდიდნენ თანხებს, რათა ზარალი გადაეფარათ.

უეფას გადაწყვეტილებაში ხაზგასმითაა ნათქვამი, რომ "მანჩესტერ სიტი" გამოძიებასთან არ თანამშრომლობდა, რაც დამამძიმებელი გარემოებაა. კლუბს შეუძლია, უეფას გადაწყვეტილება სპორტულ არბიტრაჟში (CAS) გაასაჩივროს და ამას აპირებს კიდეც.

სპეციალისტების დათვლით, ჩემპიონთა ლიგიდან 2-წლიანი მოკვეთა იმას ნიშნავს, რომ "მანჩესტერ სიტის" სალარო დაახლოებით 300 მილიონი ფუნტის (361 მილიონი ევრო) შემოსავალს ვერ მიიღებს. აქედან, მარტო ჩამპიონთა ლიგის წილი დაახლოებით 170 მილიონი ფუნტია. ბუნებრივად იზრდება იმის ალბათობა, რომ "სიტიმ" გრანდის სტატუსი დაკარგოს და საშუალო დონის კლუბი გახდეს, როგორც ეს წლების წინათ იყო...

თავად განსაჯეთ - ის ფაქტი, რომ "ქალაქელები" ვეღარ ითამაშებენ ჩემპიონთა ლიგის მომდევნო ორ სეზონში, ავტომატურად გამოიწვევს სპონსორული პროექტების შეჩერებას თუ არა, მკვეთრად შეკვეცას მაინც. გასაგებია, რომ მხოლოდ პრემიერლიგაში თამაშით "სიტი" ვეღარ მოიზიდავს იმდენ ინვესტორს, რამდენსაც ჩემპიონთა ლიგაში თამაშით მოახერხდებდა.

კიდევ რა შედეგები შეიძლება მოიტანოს დისკვალიფიკაციამ? რა თქმა უნდა, "სიტის" ძვირად ღირებული ფეხბურთელების გაყიდვა მოუწევს, რომ აღარაფერი ვთქვათ პეპ გვარდიოლაზე, რომელსაც ახლა აღარანაირი მოტივაცია აღარ რჩება იმისთვის, რომ "ეტიჰადზე" გააგრძელოს საქმიანობა.

ამიტომ, სრულიად რეალური გახდება მისი დაბრუნება "ბარსელონაში", სადაც კიკე სეტიენის მუშაობით კმაყოფილები არ არიან, და არც "იუვენტუსში" ამოსდით მზე და მთვარე მაურიციო სარიზე. სხვათა შორის, ბოლო პერიოდში საეჭვოდ გახშირდა სპეკულაციები გვარდიოლასა და "ბებერი ქალბატონის" სამომავლო თანამშრომლობაზე. ჰოდა, ამაზე უკეთესი მომენტი "იუვენტუსის" ბოსებს როდისღა ექნებათ? შესაძლოა, პეპი უკვე ჩემოდნებსაც ალაგებდეს... სხვათა შორის, ტოტალიზატორებმა უკვე დაიწყეს ფსონების მიღება გვარდიოლას გადადგომაზე...

კიდევ ერთი საფრთხე, რაც "მანჩესტერ სიტის" შეიძლება დაემუქროს - არ არის გამორიცხული, გუნდი პრემიერლიგიდანაც მოკვეთონ და რანგით მეოთხე ლიგაში დააქვეითონ. ეს თუ არა, გაცილებით რეალურია ქულების დაკლების საფრთხე.

2839
მკითხველის კომენტარები / 1 /
იმერელი
0
რეალი დაიგრუზება მაგრად ლიგაზე, ასე უმოტივაციო სიტის და გატეხილ გუნდს ვინ ვერ მოუგებს
მსგავსი ამბები
რუბრიკის სხვა სიახლეები
;