პრემიერლიგა. XXVIII ტურის ბოლო მატჩი. არსენალს აფეთქება სჩვევია...

ეს გუნდები ერთმანეთს რამდენიმე დღის წინ შეხვდნენ. ლიგის თასის ფინალში "მანჩესტერ სიტიმ" შანსი არ დაუტოვა "არსენალს" - 3:0.

სწორედ ამ თამაშს მოჰყვა ხმები სეზონის ბოლოს არსენ ვენგერთან შესაძლო განშორების თაობაზე. ამბობენ, რომ მას მხარს აღარ უჭერს კლუბის ყველაზე მსხვილი აქციონერი, ამერიკელი სტენ კროენკე, თუმცა თავად 67 წლის სპეციალისტი აცხადებს, რომ "არსენალთან" კიდევ ერთი სეზონი აკავშირებს და ამ ვალდებულებას ბოლომდე მიიყვანს.

ოღონდ, ეგ არის, რომ ვენგერს, შეიძლება, აღარავინ შეახსენოს ვალდებულებებზე. თუ "არსენალი" ამ სეზონშიც ვერ მოხვდა ჩემპიონთა ლიგაში, რისი დიდი ალბათობაც სახეზეა, მოვლენები, შესაძლოა, სწორედ ვენგერისთვის არასასურველი სცენარით განვითარდეს.

"სიტისთან" ფინალურ მატჩში "არსენალს" აკლდა არა მხოლოდ კლასი, არამედ, ბრძოლის ჟინიც. მაგრამ ეს ხასიათის გუნდია და "აფეთქებები" სჩვევია, რაშიც მიმდინარე სეზონის არაერთ შეხვედრაში დავრწმუნდით. გვახსოვს მატჩები "მანჩესტერ იუნაიტედთან", "ლივერპულთან"...

სწორედ ასეთ "აფეთქებას" უნდა უფრთხოდეს "სიტი" და პეპ გვარდიოლაც უთუოდ გაითვალისწინებს ამ ფაქტორს. ლიდერი კარგ ფორმაშია და მზად არის, მეორეადგილოსან "იუნაიტედთან" დისტანცია 16 ქულამდე გაზარდოს. თუმცა პეპს ამაზე ზრუნვა დისკვალიფიცირებული ფაბიან დელფისა და ფერნანდინიოს გარეშე მოუწევს. ეს უკანასკნელი ტრავმირებულია და მიმდინარე სეზონში პირველ მატჩს გამოტოვებს.

ტრავმა აწუხებს რაჰიმ სტერლინგსაც, თუმცა არსებობს იმის ალბათობა, რომ ინგლისის ნაკრების შემტევი მოედანზე გამოჩნდეს, თუნდაც 15-20 წუთით. რაც შეეხება ბერნან მენდის, ის უკვე დიდი ხანია მკურნალობს და "სიტი" მის გარეშე თამაშს უკვე მიეჩვია.

საკადრო პრობლემები აქვს ვენგერსაც. ტრავმირებულები არიან ფორვარდი ალექსანდრ ლაკაზეტი და მარცხენა მცველი ნაჩო მონრეალი.

ფაქტები

* "არსენალმა" "მანჩესტერ სიტისთან" პრემიერლიგის ბოლო 11 დაპირისპირებიდან მხოლოდ 2 მოიგო (5 ფრე, 4 წაგება), თუმცა "სიტიმ" "არსენალთან" ბოლო 20 საგარეო მატჩიდან მხოლოდ ერთში გაიმარჯვა (7 ფრე, 12 მარცხი).

* უკანასკნელად, "მანჩესტერ სიტიმ" "არსენალთან" სტუმრად 2013 წლის 13 იანვარს მოიგო - 2:0.

* ამ გუნდების პირველი წრის მატჩი "ეტიჰადზე" მასპინძელთა გამარჯვებით 3:1 დასრულდა.

* თუ "არსენალი" გოლს გაუშვებს, ეს იქნება მისთვის პრემიერლიგის ზედიზედ მე-10 ისეთი მატჩი, რომელშიც კარის "მშრალად" შენახვას ვერ მოახერხებს. უარესი შედეგი (11 მატჩი) ლონდონელებს 2002 წლის იანვარ-თებერვალში ჰქონდათ.

* "მანჩესტერ სიტის" 27 მატჩში 72 ქულა აქვს, რაც ინგლისის ტოპლიგის ისტორიაში ყველაზე მაღალი მაჩვენებელია მას მერე, რაც მოგებისთვის 3-ქულიანი დარიცხვა შემოიღეს.

* სერხიო აგუერომ ("მანჩესტერ სიტი") "არსენალის" წინააღმდეგ ბოლო 5 მატჩიდან (ყველა ტურნირის ჩათვლით) თითოეულში გაიტანა სულ მცირე ერთი გოლი მაინც.

ხუთშაბათი, 1 მარტი
არსენალი-მანჩესტერ სიტი 23:45

ბომბარდირები: 24 - ჰარი კეინი (ტოტენჰემი); 23 - მოჰამედ სალაჰი (ლივერპული); 21 - სერხიო აგუერო (მანჩესტერ სიტი); 15 - რაჰიმ სტერლინგი (მანჩესტერ სიტი); 13 - რობერტო ფირმინო (ლივერპული), რომელუ ლუკაკუ (მანჩესტერ იუნ), ჯეიმი ვარდი (ლესტერი).

ყოველდღიური სპორტული გაზეთი "ლელო"
887
მკითხველის კომენტარები / 0 /
მსგავსი ამბები
რუბრიკის სხვა სიახლეები
;