პრემიერლიგა. XXXII ტურის მიმოხილვა:' 'სიტიმ' ტური მშვიდად მოამთავრა, 'ლივერპულმა' კი, მხოლოდ ბოლო წუთებზე [VIDEO]

პრემიერლიგის ტური ძალიან დაძაბული გამოდგა. ძლივს მოიგეს “ჩელსიმ” და “მანჩესტერ იუნაიტედმა”, მეორე მანჩესტერულმა გრანდმა “ფულჰემთან” გაისეირნა, ტურის მშვენება გამოდგა “ლივერპულისა” და “ტოტენჰემის” ენფილდური დაპირისპირება, რომელშიც მასპინძელმა კბილებით გამოჰგლიჯა გამარჯვება “მამლებს”...

“მანჩესტერ იუნაიტედის” სრულფასოვანი მწვრთნელის რანგში პირველი თამაში ჰქონდა ოლე გუნარ სულშერს და პირველივე თამაშში ნორვეგიელმა შიში ჭამა ბოლო წუთებში, როცა თითქოს კომფორტული გამარჯვება (გოლები მარკუს რაშფორდმა და ანტონი მარსიალმა გაიტანეს) ეჭვქვეშ დააყენა აბდულაიე დუკურის გოლმა, მაგრამ “იუნაიტედმა” საბოლოოდ მაინც მოიგო - 2:1.

“უნდა ითქვას, რომ “იუნაიტედის” თამაში უნაკლო სულაც არ ყოფილა. “ჩვენ ვერ ვითამაშეთ ის ფეხბურთი, რომელსაც ვგეგმავდით. ამან შედეგად მოიტანა ის, რომ მოწინააღმდეგეს არაერთი მომენტი ჰქონდა. სამართლიანობას თუ დავიცავთ, ჩემი აზრით, ეს შეხვედრა ფრედ უნდა დასრულებულიყო. ფორტუნა ჩვენს მხარეს აღმოჩნდა”, - თქვა შეხვედრის დასრულების შემდეგ “იუნაიტედის” თავკაცმა.

ბერნარდო სილვასა და სერხიო აგუეროს გოლებით “სიტიმ” გასვლაზე მოუგო “ფულჰემს”. სტუმრებმა პირველივე ტაიმში მოათავეს საქმე, მერე კი ძალები აღარ დაუხარჯავთ, ისე მიიყვანეს საქმე ბოლომდე.

“ჩვენი თამაშით კმაყოფილი დავრჩი. ერთადერთი, რამაც გული დამწყვიტა, საგოლე მომენტების რეალიზაციის შედარებით დაბალი პროცენტია”, - თქვა პეპ გვარდიოლამ ნამატჩევს.

“ჩელსიმ” კარდიფში სასწაული თამაში მოიგო. ფავორიტი ლამის თამაშის ბოლომდე აგებდა და განსაკუთრებულიც არაფერი გაუკეთებია. მასპინძლები ვიქტორ კამარასას გოლით ამარცხებდნენ მრისხანე მეტოქეს, მაგრამ მერე “ჩელსის” ჯერი დადგა. ჯერ იყო და, სესარ ასპილიკუეტამ შეაგდო, მერე კი რუბენ ლოფტუს-ჩიკმა შეიშნოვა ვილიანის გადაცემა. დიდი ხმაური მოჰყვა ასპილიკეტას გოლს, რომელიც აშკარა თამაშგარე მდგომარეობიდან გავიდა და ამ ძალიან გააბრაზა უელსელთა მწვრთნელი ნილ უორნოკი.

ასე და ამგვარად, “ჩელსიმ” ძალიან მნიშვნელოვანი შეხვედრა მოიგო და ამ მოგების შემდეგ კიდევ უფრო გამძაფრდა ბრძოლა ოთხეულისთვის. ბრძოლა იმდენად მძაფრია, რომ წინასწარ ვერაფერს იტყვი. თავი ქუდში აქვს მხოლოდ ორ გუნდს, რომლებიც ახლა პირველ და მეორე პოზიციებს იკავებენ...

სათამაშო დღის მშვენება გამოდგა “ლივერპულისა” და “ტოტენჰემის” ჯახი. გუნდებმა სანახაობრივი ფეხბურთით გაგვახარეს. ამ შეხვედრას განსაკუთრებული ფასი ჩემპიონობისთვის მებრძოლი “ლივერპულისთვის” ედო.

დასაწყისში რობერტო ფირმინომ რობერტსონის გადაცემით გახსნა ანგარიში. პირველ ტაიმში “ლივერპულს” კიდევ ჰქონდა შანსები, თუმცა მათი გამოყენება ვერ შეძლო.

მეორე ტაიმი “ტოტენჰემმა” ყოჩაღად დაიწყო. ლონდონელებს რამდენიმე მომენტი შეექმნათ. მათ გატანა სანიმუშო კონტრშეტევის შემდეგ მოახერხეს, რომელიც ჰარი კეინმა დაიწყო. შეტევა კი კრისტიან ერიქსენის შესანიშნავი პასითა და ლუკას მოურას გოლით დასრულდა.

თამაშის ენდშპილი მართლაც სასწაულ ბრძოლაში წარიმართა. “ტოტენჰემს” რამდენიმე შანსი ჰქონდა, მაგრამ ვერ გამოიყენა. მასპინძელთა ერთ-ერთი ჩაწოდების შემდეგ კი ტობიას ალდერვეირელდმა საკუთარ კარში შეაგდო და “ლივერპულმა” 2:1 გაიმარჯვა.

ფაქტები

* პრემიერლიგა ოფიციალურად დატოვა “ჰადერსფილდმა”.

* “ჩელსი” 4-ჯერ ეთამაშა კარდიფს და ოთხივე შეხვედრა მოუგო.

* სეზარ ასპილიკუეტამ პრემიერლიგაში პირველი გოლი შეაგდო.

* “ლივერპულმა” პრემიერლიგაში ზედიზედ მეორედ დაამარცხა “ტოტენჰემი”.

ფულჰემი-მანჩესტერ სიტი 0:2
გოლები: 0:1 ბერნარდო სილვა (5), 0:2 აგუერო (27)

ბრაიტონი-საუთჰემპტონი 0:1
გოლი: 0:1 ჰოიბერგი (53)

ბარნლი-ვულვზი 2:0
გოლები: 1:0 კოადი (2-საკ. კარში), 2:0 მაკნილი (77)
კრ. პალასი-ჰადერსფილდი 2:0
გოლები: 1:0 მილივოიევიჩი (76-პენ), 2:0 ვან აანჰოოლტი (88)

ლესტერი-ბორნმუთი 2:0
გოლები: 1:0 მორგანი (11), 2:0 ვარდი (82)

მანჩესტერ იუნ-უოტფორდი 2:1
გოლები: 1:0 რაშფორდი (28), 2:0 მარსიალი (72), 2:1 დუკური (90)



ვესტ ჰემი-ევერტონი 0:2
გოლები: 0:1 ზუმა (5), 0:2 ბერნარდი (33)

კარდიფი-ჩელსი 1:2
გოლები: 1:0 კამარასა (46), 1:1 ასპილიკუეტა (84), 1:2 ლოფტუს-ჩიკი (90+1)

ლივერპული-ტოტენჰემი 2:1
გოლები: 1:0 ფირმინო (16), 1:1 ლუკას მოურა (70), 2:1 ალდერვეირელდი (90-საკ. კარში)

ორშაბათი, 1 აპრილი
არსენალი-ნიუკასლი 23:00

1. ლივერპული 32 24 7 1 72:19 79
2. მანჩესტ. სიტი 31 25 2 4 81:21 77
3. ტოტენჰემი 31 20 1 10 58:34 61
4. მანჩესტ. იუნ 31 18 7 6 60:41 61
5. არსენალი 30 18 6 6 63:39 60
6. ჩელსი 31 18 6 7 52:34 60
7. ვულვზი 31 12 8 11 38:38 44
8. ლესტერი 32 13 5 14 42:43 44
9. ევერტონი 32 12 7 13 45:42 43
10. უოტფორდი 31 12 7 12 43:46 43
11. ვესტ ჰემი 32 12 6 14 41:48  42
12. ბორნმუთი 32 11 5 16 43:58 38
13. კრ. პალასი 31 10 6 15 38:41 36
14. ნიუკასლი 31 9 8 14 31:40 35
15. ბრაიტონი 30 9 6 15 32:43 33
16. საუთჰემპტ. 31 8 9 14 35:50 33
17. ბარნლი 32 9 6 17 37:59 33
18. კარდიფი 31 8 4 19 28:59 28
19. ფულჰემი 32 4 5 23 29:72 17
20. ჰადერსფილ. 32 3 5 24 18:59 14

ბომბარდირები: 19 - აგუერო (მანჩესტერ სიტი); 17 - სალაჰი (ლივერპული), ობამეიანგი (არსენალი), კეინი (ტოტენჰემი), მანე (ლივერპული); 15 - სტერლინგი (მანჩესტერ სიტი); 13 - აზარი (ჩელსი), ვარდი (ლესტერი).

მომდევნო ტური
2 აპრილი: უოტფორდი-ფულჰემი, ვულვზი-მანჩესტერ იუნ
3 აპრილი: მანჩესტერ სიტი-კარდიფი
5 აპრილი: საუთჰემპტონი-ლივერპული
6 აპრილი: ბორნმუთი-ბარნლი, ჰადერსფილდი-ლესტერი, ნიუკასლი-კრისტალ პალასი
7 აპრილი: ევერტონი-არსენალი
8 აპრილი: ჩელსი-ვესტ ჰემი
23 აპრილი: ტოტენჰემი-ბრაიტონი

გამოტოვებული მატჩები
3 აპრილი: ჩელსი-ბრაიტონი, ტოტენჰემი-კრისტალ პალასი

ყოველდღიური სპორტული გაზეთი "ლელო"
385
მკითხველის კომენტარები / 0 /
მსგავსი ამბები
რუბრიკის სხვა სიახლეები
;