პრემიერლიგა. XXXVII ტურის მიმოხილვა: 'არსენალი' და უნაიტედი ლიგის მიღმა, 'ჩელსი' დაბრუნდა, - დაგვრჩა ორი ინტრიგა [VIDEO]

ბოლო დროს პრემიერლიგამ სენსაციებს მიგვაჩვია. გამონაკლისი არც მორიგი ტურის დასაწყისი გახლდათ. “ტოტენჰემმა”, მიზნად ოთხეულში შესვლა რომ აქვს, “ბორნმუთთან” საგარეო შეხვედრა წააგო...

“დეზებმა” 9 ფეხბურთელით დაასრულა შეხვედრა. 43-ე წუთზე არბიტრმა მინდვრიდან გააძევა ჰიუნ-მინ სონი. მეორე ტაიმის დასაწყისში კი წითელი ბარათი უხეში ვარდნისთვის ხუან ფოიტმა მიიღო. შეხვედრის მიწურულს ერთადერთი გოლი ნათან აკემ შეაგდო.

“ჩვენ კიდევ ერთი გამოცდა გვქონდა. ვფიქრობთ, შეხვედრა სხვანაირად შეიძლებოდა წარმართულიყო, რომ არა არბიტრის ქმედებები. ჩვენ არ გვაქვს მოდუნების დრო”, - განაცხადა “ტოტენჰემის” დამრიგებელმა მაურისიო პოჩეტინომ.

“ტოტენჰემი” მაგრად დაიღალა “აიაქსთან” გასამართავი ჩემპიონთა ლიგის მატჩის წინ. პირველი მატჩი, როგორც გახსოვთ, ჰოლანდიელებმა ინგლისში 1:0 მოიგეს. “კრისტალ პალასთან” მარცხის შემდეგ პრემიერლიგას ოფიციალურად გამოეთიშა “კარდიფი”. უელსელებმა გადამწყვეტ შეხვედრაში ძალიან ცუდად ითამაშეს და აშკარად იმსახურებდნენ მარცხს.

“ლივერპულმა” გასვლაზე 3:2 მოუგო “ნიუკასლს” და ორშაბათამდე, სანამ “მანჩესტერ სიტი” “ლესტერს” დაუპირისპირდება, პირველ ადგილზეა. “ლივერპული” ორჯერ იგებდა ვირჯილ ვან დაიკისა და მოჰამედ სალაჰის გოლებით, მაგრამ ჯერ ატსუმ და მერე რონდონმა ანგარიში გაათანაბრეს. გამარჯვების გოლი კი შეცვლაზე შესულმა დივოკ ორიგიმ შეაგდო.

მატჩის მთავარი მოვლენა მაშინ მოხდა, მის დასრულებამდე 20 წუთი რომ რჩებოდა. მეკარესთან შეჯახებისას თავის ტრავმა მიიღო სალაჰმა და თვალზე ცრემლმომდგარი მინდვრიდან საკაცით გასაყვანი გახდა. თავადაც დაგვეთანხმებით, ეს უდიდესი დარტყმაა “ლივერპულისთვის”, რომელსაც პრემიერლიგა ხომ აქვს ჩასამთავრებელი და, ამასთან, ჩემპიონთა ლიგის საპასუხო ნახევარფინალი ელის “ბარსელონასთან”.

“რა თქმა უნდა, სალაჰის ტრავმა ჩვენთვის ძალიან უსიამოვნოა. ის შეჯახების შემდეგ თავის ტკივილს უჩიოდა, მაგრამ მერე გასახდელში ტელევიზორში უყურა თამაშს. ნებისმიერ შემთხვევაში სალაჰი გმირია, ისევე, როგორც ჩემი ყველა ფეხბურთელი. ჩვენ სამი გოლი გავიტანეთ იმ შეხვედრაში, რომელშიც ძლიერი მეტოქე გვყავდა”, - თქვა იურგენ კლოპმა.

“მანჩესტერ იუნაიტედი” მაკტომინის გოლით უგებდა “ჰადერსფილდს”, მაგრამ პრემიერლიგიდან კარგა ხნის წინ გავარდნილმა გუნდმა მოინდომა და ქულას გამორჩა. “იუნაიტედი” მომავალ სეზონში ჩემპიონთა ლიგაზე ვეღარ ითამაშებს.

“ჩვენ ვიბრძოდით ჩემპიონთა ლიგის საგზურისთვის. ბრძოლა იყო ძალიან საინტერესო. დღეს ჩვენი ადგილი ჩემპიონთა ლიგაზე კი არა, ევროპალიგაზეა”, - თქვა “წითელი ეშმაკების” თავკაცმა ოლე გუნარ სულშერმა.

ლოფტუს-ჩიკის, დავიდ ლუიზისა და იგუაინის გოლების წყალობით “ჩელსიმ” “უოტფორდი” დაამარცხა და ჩემპიონთა ლიგას ოფიციალურად დაუბრუნდა. “არსენალმა” “ბრაიტონს” უმასპინძლა, უსახურად ითამაშა და ფრეს დასჯერდა.

მაშ ასე, პრემიერლიგის ბოლო ტურის წინ შეგვრჩა მხოლოდ ორი ინტრიგა - ვინ გახდება ჩემპიონი და რომელი გუნდი მოიპოვებს ჩემპიონთა ლიგაზე გამსვლელ ერთ ვაკანტურ ადგილს - “ტოტენჰემი” თუ “არსენალი”?

ფაქტები

* “ტოტენჰემის” მცველი ხუან ფოიტი მინდვრიდან მაშინ გააძევეს, როცა თამაშში 2 წუთის შესული იყო. ეს არის მეორე სწრაფი გაძევება პრემიერლიგის ისტორიაში.

* “ვულვზთან” შეხვედრაში “ფულჰემის” რიგებში ჰარვი ელიოტმა ითამაშა. ის 16 წლის და 30 დღისაა. ამით ის პრემიერლიგის ყველაზე ახალგაზრდა ფეხბურთელი გახდა.

* რაფა ბენიტესმა პრემიერლიგაში მე-100 მარცხი მის ყოფილ კლუბთან, “ლივერპულთან” იწვნია.

* პირველად, 1970 წლის შემდეგ “მანჩესტერ იუნაიტედმა” ყველა ტურნირში მიჯრით 14 შეხვედრაში გაუშვა მინიმუმ 1 გოლი მაინც.

ევერტონი-ბარნლი 2:0
გოლები: 1:0 მი (17-საკ. კარში), 2:0 კოულმენი (20)

ბორნმუთი-ტოტენჰემი 1:0
გოლი: 1:0 აკე (90+1)
გაძევება: სონი (43. ტოტენჰემი), ფოიტი (48. ტოტენჰემი)

ვესტ ჰემი-საუთჰემპტონი 3:0
გოლები: 1:0 არნაუტოვიჩი (16), 2:0 არნაუტოვიჩი (69), 3:0 ფრედერიკსი (72)

ვულვზი-ფულჰემი 1:0
გოლი: 1:0 დენდონკერი (75)

კარდიფი-კრ. პალასი 2:3
გოლები: 0:1 ზაჰა (28), 1:1 კელი (31-საკ. კარში), 1:2 ბატშუაი (39), 1:3 თაუნსენდი (70), 2:3 რიდი (90)

ნიუკასლი-ლივერპული 2:3
გოლები: 0:1 ვან დაიკი (13), 1:1 ატსუ (20), 1:2 სალაჰი (28), 2:2 რონდონი (54), 2:3 ორიგი (86)

ჩელსი-უოტფორდი 3:0
გოლები: 1:0 ლოფტუს-ჩიკი (48), 2:0 დავიდ ლუიზი (51), 3:0 იგუაინი (75)

ჰადერსფ-მანჩესტერ იუნ 1:1
გოლები: 0:1 მაკტომინი (8), 1:1 მბენზა (60)



არსენალი-ბრაიტონი 1:1
გოლები: 1:0 ობამეიანგი (9-პენ), 1:1 მარეი (61-პენ)

ორშაბათი, 6 მაისი
მანჩეს. სიტი-ლესტერი 23:00

თ მ ფ წ ბ ქ
1. ლივერპული 37 29 7 1 87:22 94
2. მანჩესტ. სიტი 36 30 2 4 90:22 92
3. ჩელსი 37 21 8 8 63:39 71
4. ტოტენჰემი 37 23 1 13 65:37 70
5. არსენალი 37 20 7 10 70:50 67
6. მანჩესტ. იუნ 37 19 9 9 65:52 66
7. ვულვზი 37 16 9 12 47:44 57
8. ევერტონი 37 15 8 13 52:44 53
9. ლესტერი 36 15 6 15 51:47 51
10. უოტფორდი 37 14 8 15 51:55 50
11. ვესტ ჰემი 37 14 7 16 48:54 49
12. კრ. პალასი 37 13 7 17 46:50 46
13. ბორნმუთი 37 13 6 18 53:65 45
14. ნიუკასლი 37 11 9 17 38:48 42
15. ბარნლი 37 11 7 19 44:65 40
16. საუთჰემპტ. 37 9 11 17 44:63 38
17. ბრაიტონი 37 9 9 19 34:56 36
18. კარდიფი 37 9 4 24 32:69 31
19. ფულჰემი 37 7 5 25 34:77 26
20. ჰადერსფილ. 37 3 6 28 21:75 15

ბომბარდირები: 22 - სალაჰი (ლივერპული); 20 - მანე (ლივერპული), აგუერო (მანჩესტერ სიტი), ობამეიანგი (არსენალი); 18 - ვარდი (ლესტერი); 17 - სტერლინგი (მანჩესტერ სიტი), კეინი (ტოტენჰემი); 16 - აზარი (ჩელსი).

ბოლო ტური
12 მაისი: ბრაიტონი-მანჩესტერ სიტი, ბარნლი-არსენალი, კრ. პალასი-ბორნმუთი, ფულჰემი-ნიუკასლი, ლესტერი-ჩელსი, ლივერპული-ვულვზი, მანჩესტერ იუნ-კარდიფი, საუთჰემპტონი-ჰადერსფილდი, ტოტენჰემი-ევერტონი, უოტფორდი-ვესტ ჰემი

368
მკითხველის კომენტარები / 0 /
მსგავსი ამბები
რუბრიკის სხვა სიახლეები
;