პრემიერლიგა. XXXVII ტური. ჩემპიონი ჰადერსფილდმა შეაჩერა

პრემიერლიგის ბოლოსწინა ტური პარასკევს, "ბრაიტონისა" და "მანჩესტერ იუნაიტედის" მატჩით დაიწყო. ჟოზე მოურინიომ ლამის საკრალურ მიზნად დაისახა მეორე ადგილზე გასვლა, "ბრაიტონი" კი, რომელიც ამ სეზონიდან თამაშობს უძლიერესთა შორის, პრემიერლიგაში ადგილის დამკვიდრებას ცდილობდა...

...და ეს მცდელობა წარმატებით დასრულდა. თუმცა იმ დღეს "თოლიებმა" ჯერ კიდევ არ იცოდნენ, რომ "იუნაიტედთან" ისტორიული გამარჯვება ამ მიზნის მისაღწევად საკმარისი იქნებოდა. "ბრაიტონს" ყველაზე მეტად ხელი "სუონსიმ" "გაუმართა", რომელიც შაბათს "ბორნმუთთან" საგარეო მატჩში ხელმოცარული დარჩა და ახლა ბოლო ორ ტურში მოუწევს სეზონის უმთავრესი ამოცანის გადაჭრა...

ერთი სიტყვით, კრის ჰიუტონის გუნდის მოტივაცია გადამწყვეტი აღმოჩნდა არაფრისმომცემ მეორე ადგილთან შედარებით და ეს მოურინიომაც აღიარა:
"დღეს ფეხბურთის ღმერთი სამართალიანი იყო "ბრაიტონის" ბიჭებისთვის. მათ დიდი მიზანი ჰქონდათ და ამ მიზნის მისაღწევად, ჩვენგან განსხვავებით, ყველაფერი გაიღეს. როგორც ჩანს, ვერაფრით დავარწმუნე ჩემი ფეხბურთელები იმაში, რომ მეორე ადგილს ჩვენთვის დიდი მნიშვნელობა აქვს. თუმცა საამისოდ კიდევ გვაქვს ორი მატჩი".

"სტოკმა" 10 წელი გაძლო პრემიერლიგაში და ამისთვის ნამდვილად იმსახურებს ქებას. თუმცა ეს ვერაფერი ნუგეშია იმ გულშემატკივრებისთვის, რომლებმაც ამ 10-წლიანი ეპოპეის დასასრული საკუთარ სტადიონზე დაიტირეს. არადა, პირველი ტაიმის შემდეგ პოლ ლამბერტის გუნდი იგებდა და იმედიც იყო, რომ ბრძოლა სეზონის ბოლომდე გაგრძელდებოდა, მაგრამ... მეორე ნახევარში როი ჰოჯსონის "არწივებმა" ეს გეგმა ჩაშალეს და თავად დაიგულეს თავი სამშვიდობოს.

ერთი სიტყვით, ლამბერტმა ვერაფერი უშველა გუნდს, რომელსაც იანვრიდან მოძღვრავს (მხოლოდ 7 ქულა 13 მატჩში). თუმცა დამოძღვრილისა ამ გუნდს არაფერი ეტყობა - თუ იანვარში "სტოკი" არ იყო უპირობო აუტსაიდერი, ახლა მთლად ფსკერზე დაეშვა. ცხადია, ლამბერტი პოსტს ვეღარ შეინარჩუნებს...
"ვესტ ბრომვიჩი" კი კვლავ სასწაულებს ახდენს. ერთი თვის წინ ვინ იფიქრებდა, რომ ამ გუნდს პრემიერლიგაში დარჩენის შანსი გაუჩნდებოდა, მაგრამ...

გაუშვეს ალან პარდიუ და მოვიდა დარენ მური, ვისი ხელმძღვანელობითაც "ვესტ ბრომვიჩს" ჯერ ერთი თამაშიც არ წაუგია - ბოლო 5 მატჩში 11 ქულა (3 მოგება, 2 ფრე) დააგროვა და ამ 11-დან 7 ქულა პირველი ოთხეულის გუნდებს ("მანჩესტერ იუნაიტედი", "ლივერპული" და ბოლოს "ტოტენჰემი") დასცინცლა.

"ტოტენჰემს" კი ეს მარცხი, შეიძლება, ძვირად დაუჯდეს. მაურისიო პოჩეტინოს გუნდმა ბოლო 4 მატჩიდან მხოლოდ ერთი მოიგო და "ჩელსი" 2 ქულის დისტანციაზე დაიახლოვა - "ჩელსი", რომელმაც ზედიზედ 4 მატჩი მოიგო, მაშინ, როცა კონკურენტები ქულებს ანიავებენ. "ლივერპულთან" გამარჯვებით ანტონიო კონტეს გუნდმა ჩემპიონთა ლიგის ფინალისტიც რთულ მდგომარეობაში ჩააყენა. საქმე ისაა, რომ "ლივერპულს" ერთი თამაშიღა დარჩა სათამაშო, "ჩელსის" კი - ორი.

უმოტივაციო "ლესტერი" ბოლო ტურებში გულუხვად არიგებს ქულებს და შაბათს ამით "ვესტ ჰემმაც" ისარგებლა. "ჩაქუჩებმა" სტუმრად 2 უპასუხო გოლი გაუტანეს "მელიებს" და ბოლო ორ ტურში ამდენივე ქულა ეყოფათ პრემიერლიგაში დასარჩენად.

ეს ამოცანა უკვე გადაჭრა "უოტფორდმა", რომელმაც "ნიუკასლს" მოუგო და რაფა ბენიტესს მე-300 საიუბილეო პრემიერლიგური მატჩი გაუფერმკრთალა. თუმცა "კაჭკაჭებს" თავი უკვე ქუდში აქვთ და მომავალ სეზონზე ფიქრობენ...

უკვე სამშვიდობოსაა "ბორნმუთიც", ვისთვისაც 41 ქულა პრემიერლიგაში დარჩენის გარანტიაა. აი, "სუონსისთვის" კი გადამწყვეტი კვირა დაიწყო. უელსური გუნდი ზეგ გამოტოვებულ მატჩში უმასპინძლებს უშუალო კონკურენტ "საუთჰემპტონს", ხოლო სეზონის ბოლო დღეს უკვე გავარდნილ "სტოკს" დაუხვდება.

რა თქმა უნდა, ასეთი გრაფიკით "გედებს" უკეთესი შანსი აქვთ, რადგან "საუთჰემპტონი", გარდა იმისა, რომ "სუონსისთან" სტუმრად უნდა ითამაშოს, ბოლო ტურში თვით "მანჩესტერ სიტის" მასპინძლობს და ძნელად სავარაუდოა, ამ ლაბირინთს თავი დააღწიოს. მარკ ჰიუზის "წმინდანებს" გაცილებით საიმედო მდგომარეობა ექნებოდა, "ევერტონისთვის" დამატებულ მე-6 წუთზე რომ არ მიეცათ ანგარიშის გათანაბრების შანსი.

მოულოდნელი იყო "მანჩესტერ სიტი"-"ჰადერსფილდის" საბოლოო შედეგი - 0:0. არადა, პეპ გვარდიოლას გუნდს რეკორდები აქვს დასამხობი. საამისოდ, "სიტის" ერთი გამარჯვება და 3 გოლი სჭირდება. ბევრი ელოდა, რომ ამ ამბავს სწორედ "ჰადერსფილდი" ემსხვერპლებოდა, მაგრამ... ისე კი, პრემიერლიგის დებიუტანტისთვის, რომელიც პრემიერლიგაში დასარჩენად იბრძვის, ეს ქულა, შეიძლება, ძალიან მნიშვნელოვანიც იყოს.

"არსენალმა" 5:0 მოუგო "ბარნლის" და ეს იყო "მეთოფეთა" ბოლო საშინაო მატჩი ამ სეზონში, შესაბამისად, არსენ ვენგერი, რომელსაც ფეხბურთელებმა დერეფანი მოუწყვეს, ლამაზად დაემშვიდობა "ემირეითსის" პუბლიკას.

ფაქტები

* 1982 წლის ნოემბრის შემდეგ "ბრაიტონმა" პირველად შეძლო ინგლისის მთავარ ლიგაში "მანჩესტერ იუნაიტედის" დამარცხება.

* პერსონალურად ჟოზე მოურინიოსთვის მაისი უიღბლო თვედ იქცა. ამ თვეში, სხვადასხვა დროს, მისმა გუნდებმა პრემიერლიგის 10 საგარეო მატჩიდან 6 წააგეს (1 მოგება, 3 ფრე).

* 1978 წლის დეკემბრის შემდეგ ("ბოლტონი", 0:3) "მანჩესტერ იუნაიტედმა" პირველად წააგო პარასკევის მატჩი.

* 1989/90 წლების სეზონის შემდეგ პირველად მოხდა, რომ "მანჩესტერ იუნაიტედმა" მთავარ ლიგაში ახალაღზევებულ გუნდებთან ერთ სეზონში 3 მატჩი წააგო. "ბრაიტონამდე" ჟოზე მოურინიოს გუნდი დამარცხდა "ნიუკასლთანაც" (0:1) და "ჰადერსფილდთანაც" (1:2).

* 1899/1900 წლების სეზონის შემდეგ "კრისტალ პალასი" ინგლისის ტოპლიგის პირველი გუნდია, ვინც გავარდნა აიცილა ჩემპიონატის პირველი 7 მატჩის წაგების მიუხედავად.

* პოლ ლამბერტის ხელმძღვანელობით "სტოკმა" ვერ მოიგო ვერცერთი ის 4 მატჩი, რომლის პირველი ტაიმის შემდეგაც წინ იყო.

* "ტოტენჰემმა" პრემიერლიგის გუნდებს შორის ყველაზე მეტი, 20 თამაში წააგო 90-ე წუთზე და უფრო გვიან გაშვებული გოლების გამო.

* "ვესტ ბრომვიჩს" არ წაუგია ბოლო 5 მატჩი. მხოლოდ "ლივერპულს" აქვს უკეთესი მიმდინარე სერია - ზედიზედ 6 წაუგებელი მატჩი.

* "არსენალთან" ნოემბერში წაგებული 0:2-ის შემდეგ (24 მატჩი) "ტოტენჰემმა" პირველად ვერ მოახერხა პრემიერლიგის ტურში გოლის გატანა.

* "ლესტერმა" ვერ მოიგო ზედიზედ მე-6 საშინაო მატჩი, რაც ამ გუნდის უგრძესი სერიაა 2014 წლის 26 დეკემბრის შემდეგ.

* "ვესტ ჰემმა" პრემიერლიგის ბოლო 9 ტურში პირველად მოახერხა კარის "მშრალად" შენახვა.

* "ვესტ ჰემმა" გაიტანა მინიმუმ ერთი გოლი მაინც პრემიერლიგის ბოლო 11 საგარეო მატჩში. ეს არის ამ გუნდის საუკეთესო მაჩვენებელი 1966 წლის დეკემბრის შემდეგ.

* 2011/12 წლების სეზონის შემდეგ პირველად მოხდა, რომ "უოტფორდმა" მოიგო ჩემპიონატის ბოლო საშინაო მატჩი.

* 2012 წლის შემდეგ "სუონსიმ" პირველად წააგო პრემიერლიგის ზედიზედ 3 მატჩი ისე, რომ გოლიც ვერ გაიტანა.

* პრემიერლიგის მიმდინარე სეზონში "სუონსიმ" 17 მატჩში ვერ შეძლო გოლის გატანა. უარესი შედეგი (19) მხოლოდ "ჰადერსფილდს" აქვს.

* "ბორნმუთმა" ბოლო 6 ტურში პირველად გაიმარჯვა.

* "ევერტონმა" პრემიერლიგის მიმდინარე სეზონში 55 გოლი გაუშვა. ბოლოს, უარესი შედეგი ჰქონდა 2003/04 წლების სეზონში - 57 გოლი.

ბრაიტონი-მანჩესტერ იუნ 1:0
გოლი: 1:0 გროსი (57)
მანჩესტერი (4-3-3): დე ხეა - დარმიანი (68. შოუ), სმოლინგი, როხო (76. მაკტომინი), იანგი - ფელაინი (68. ლინგარდი), მატიჩი, პოგბა - მატა, რაშფორდი, მარსიალი.

სტოკი-კრ. პალასი 1:2
გოლები: 1:0 შაქირი (43), 1:1 მაკარტური (68), 1:2 ვან აანჰოლტი (86)

ბორნმუთი-სუონსი 1:0
გოლი: 1:0 ფრეიზერი (37)

ლესტერი-ვესტ ჰემი 0:2
გოლები: 0:1 ჟოაო მარიო (34), 0:2 ნობლი (64)

უოტფორდი-ნიუკასლი 2:1
გოლები: 1:0 პერეირა (2), 2:0 ე. გრეი (28), 2:1 პერესი (55)
გამოუყენებელი პენალტი: დინი (39. უოტფორდი)

ვესტ ბრომვიჩი-ტოტენჰემი 1:0
გოლი: 1:0 ლივერმორი (90+2)
ტოტენჰემი (3-4-2-1): ლორისი - ალდერვეირელდი, დავინსონ სანჩესი, ვერტონგენი (85. ფერნანდო ლორენტე) - ტრიპიერი, ერიქსენი, ვანიამა, როუზი - ალი (67. სონი), ლამელა (78. ლუკას მოურა) - კეინი.

ევერტონი-საუთჰემპტონი 1:1
გოლები: 0:1 რედმონდი (56), 1:1 თ. დევისი (90+6)
გაძევება: იოშიდა (85. საუთჰემპტონი)

მანჩესტ. სიტი-ჰადერსფილ. 0:0
სიტი (4-3-3): ედერსონი - უოლკერი, ოტამენდი, სტოუნზი (73. ბერნარდო სილვა), დელფი (57. მენდი) - დე ბრუინი (67. გიუნდოგანი), ფერნანდინიო, დავიდ სილვა - სანე, სტერლინგი, გაბრიელ ჟეზუში.

არსენალი-ბარნლი 5:0
გოლები: 1:0 ობამეიანგი (14), 2:0 ლაკაზეტი (45+3), 3:0 კოლაშინაცი (54), 4:0 ივობი (64), 5:0 ობამეიანგი (75)
არსენალი (4-2-3-1): ჩეხი - ბელერინი, ჩემბერსი (77. მერტეზაკერი), მავროპულოსი, კოლაშინაცი - ჯაკა, უილშირი (72. რემზი) - ობამეიანგი, ივობი, მხითარიანი - ლაკაზეტი (72. უელბეკი).

ჩელსი-ლივერპული 1:0
გოლი: 1:0 ჟირუ (32)
ჩელსი (3-5-1-1): კურტუა - ასპილიკუეტა, კეჰილი, რიუდიგერი - მოზესი (89. ძაპაკოსტა), ფაბრეგასი (90+3. პედრო), კანტე, ბაკაიოკო, ალონსო - აზარი (86. ვილიანი) - ჟირუ.
ლივერპული (4-3-3): კარიუსი - კლაინი (59. ჰენდერსონი), ლოვრენი, ვან დაიკი, რობერტსონი (74. სოლანკე) - ალექსანდერ-არნოლდი, ვეინალდუმი, მილნერი (89. მორენო) - სალაჰი, მანე, ფირმინო.

ბომბარდირები: 31 - მოჰამედ სალაჰი (ლივერპული); 27 - ჰარი კეინი (ტოტენჰემი); 21 - სერხიო აგუერო (სიტი); 18 - რაჰიმ სტერლინგი (სიტი).

გამოტოვებული მატჩები
8 მაისი: სუონსი-საუთჰემპტონი
9 მაისი: ჩელსი-ჰადერსფილდი, ლესტერი-არსენალი, მანჩესტერ სიტი-ბრაიტონი, ტოტენჰემი-ნიუკასლი
10 მაისი: ვესტ ჰემი-მანჩესტერ იუნ
ბოლო ტური
13 მაისი: ბარნლი-ბორნმუთი, კრ. პალასი-ვესტ ბრომვიჩი, ჰადერსფილდი-არსენალი, ლივერპული-ბრაიტონი, მანჩესტერ იუნაიტედი-უოტფორდი, ნიუკასლი-ჩელსი, საუთჰემპტონი-მანჩესტერ სიტი, სუონსი-სტოკი, ტოტენჰემი-ლესტერი, ვესტ ჰემი-ევერტონი

927
მკითხველის კომენტარები / 0 /
მსგავსი ამბები
რუბრიკის სხვა სიახლეები
;