პრემიერლიგის ერთი დიდი სამყარო: ბერბატოვიდან ვან დაიკამდე ანუ, როცა მილიონები და ვნებები ერთად დუღს

უნდა შევთანხმდეთ: პრემიერლიგა ერთი დიდი სამყაროა, თავისი დაწერილი და დაუწერელი საფეხბურთო წესებით. ცხადია, იქ მოასპარეზე კლუბებს შორის ხდება გრანდიოზული გარიგებები...

დღევანდელ წერილში გადავავლებთ თვალს პრემიერლიგის კლუბებს შორის განხორციელებულ მეგატრანსფერებს. იმ გარიგებებს, რომლებიც თავიანთი სარეკორდო მაჩვენებლებით კარგა ხნის განმავლობაში რჩებოდა საზოგადოების მსჯელობის საგნად...

დიმიტარ ბერბატოვი
32 მილიონი ფუნტი

2008 წელს ზაფხულის სატრანსფერო ფანჯარა იხურებოდა, როცა “მანჩესტერ იუნაიტედი” “ტოტენჰემს” ბულგარელი ფორვარდის ტრანსფერზე 32 მილიონ ფუნტად მოელაპარაკა. დიმიტარ ბერბატოვმა “იუნაიტედის” შემადგენლობაში 4 სეზონის განმავლობაში ითამაშა, ჩაატარა 149 შეხვედრა და გაიტანა 56 გოლი. ალბათ, ბერბატოვს შეეძლო, უფრო უკეთესადაც ეთამაშა, მაგრამ, წესით, მას გული არაფერზე უნდა დასწყდეს - მანჩესტერული გრანდის შემადგენლობაში მან ორჯერ მოიგო პრემიერლიგა.

“თავაწეული ვტოვებ “იუნაიტედს”! რაც შემეძლო, გუნდისთვის ყველაფერი გავაკეთე”, - თქვა ბულგარელმა, როცა 4,25 მილიონ ფუნტად “ფულჰემში” ჩამოქვეითდა.

ენდი ქეროლი
34 მილიონი

“ლივერპულმა” უდიდესი ნდობა გამოუცხადა 22 წლის ტანმაღალ ფორვარდს. 2011 წელს მერსისაიდელებმა ენდი ქეროლის სანაცვლოდ “ნიუკასლს” 34 მილიონი ფუნტი გადაუხადეს. “ლივერპულში” ინგლისელი შემტევის კარიერას იღბლიანს ვერაფრით ვუწოდებთ. მან 58 შეხვედრა ჩაატარა და მხოლოდ 11 გოლი შეაგდო. ის შეგვიძლია “ლივერპულის” ისტორიაში ერთ-ერთ ყველაზე დიდ იმედგაცრუებად მივიჩნიოთ.

ცოტა ხანში, უკმაყოფილო ლივერპულელებმა ის “ვესტ ჰემში” გაანათხოვრეს, შემდეგ კი მასვე მიჰყიდეს 14,88 მილიონ ფუნტად.
“ენდი განსაკუთრებული ფეხბურთელია. ის ჩვენ შეგვიძლია შევადაროთ შოკოლადის ყუთს “ფორესტ გამპიდან”. არასოდეს იცი, რას შეიძლება ელოდო მისგან. შეუძლია, ბრწყინვალე იყოს ან ბოლომდე ჩააგდოს მატჩი”, - თქვა მასზე “ვესტ ჰემის” მაშინდელმა მწვრთნელმა სლავენ ბილიჩმა.

სადიო მანე
35 მილიონი

“ლივერპული” მაგრად დაიხარჯა, როცა “საუთჰემპტონის” თავდამსხმელის სანაცვლოდ 35 მილიონი ფუნტი გაიღო. დიდი ალბათობით, მერსისაიდელთა მთავარი მწვრთნელი იურგენ კლოპი არ დარდობს, სენეგალელზე რომ შეაჩერა არჩევანი. მით უმეტეს, სადიო მანეს გარჯით ის თავიდანვე მოხიბლული იყო. კლოპს აფრიკელი ვარსკვლავის გადაბირება ჯერ კიდევ მაშინ უნდოდა, როცა “დორტმუნდის” მთავარი მწვრთნელი იყო.

ხუან მატა
38 მილიონი

ხუან მატას ისტორია ძალიან ჰგავს რომელუ ლუკაკუს ამბავს. ორივეს ცუდი ურთიერთობა ჰქონდა “ჩელსიში” ჟოზე მოურინიოსთან და ორივე... პორტუგალიელს “მანჩესტერ იუნაიტედში” გადაეყარა. 2014 წლის ზამთარში მატა 38 მილიონ ფუნტად გადავიდა “ოლდ ტრაფორდზე”.

რიო ფერდინანდი
39 მილიონი

ისეთი შთაბეჭდილება იქმნება, რომ რიო ფერდინანდი “მანჩესტერში” მთელი საუკუნის განმავლობაში თამაშობდა, მაგრამ ის მხოლოდ 2002 წელს გამოჩნდა “ოლდ ტრაფორდზე”. “იუნაიტედმა” იმ დროისთვის კოლოსალური თანხა, 39 მილიონი ფუნტი გადაიხადა ფეხბურთელში, რომელმაც შემდეგ ბოლომდე აანაზღაურა მასში ჩადებული თანხა - “მანჩესტერთან” ერთად 6-ჯერ მოიგო პრემიერლიგა და გაიმარჯვა ჩემპიონთა ლიგაშიც.
12 სეზონის განმავლობაში რიომ ალისფერი მაისურით ოთხასზე მეტი მატჩი ჩაატარა და ინგლისის ნაკრების კაპიტნის სამკლავურიც ემოსა.

კრისტიან ბენტეკე
39 მილიონი

ქეროლის არ იყოს, “ლივერპულისთვის” ვერც ეს გარიგება ჩაითვლება წარმატებულად. 2015 წლის ივლისში მერსისაიდულმა კლუბმა “ასტონ ვილას” უპირველესი ბომბარდირისა და ვარსკვლავის სანაცვლოდ 39 მილიონი ფუნტი გადაუხადა, ერთი წლის შემდეგ კი მხოლოდ 26 მილიონად გაყიდა “ასტონ ვილაში”.

ხალხი იცინის, როცა ჩემ მიერ “ლივერპულში” გატარებულ დროს იხსენებს. ისინი ამბობენ, რომ ამ გუნდს უფრო მეტი გავუტანე, ვიდრე მისი მაისურით სხვას გავუტანე. მე კი ჩემი არგუმენტი მაქვს: თავის გამოჩენის შანსი პრაქტიკულად არ მქონია”, - ამბობს კრისტიან ბენტეკე.

ჯონ სტოუნზი
47 მილიონი

“მანჩესტერ სიტიმ” 22 წლის მცველის სანაცვლოდ 47 მილიონი ფუნტი გადაიხადა. ჯონ სტოუნზი ოფიციალურად გახდა ყველაზე ძვირადღირებული მცველი, გადაასწრო რა რიო ფერდინანდს. ჯერჯერობით, ყველაფერი ისე არ მიდის, როგორც “სიტი” და ჯონი ისურვებდნენ.
“მე სტოუნზს ყოველთვის ვთვლიდი საშუალო დონის ფეხბურთელად, რომელიც ზედმეტადაა გაპიარებული”, - ამბობს ინგლისის ნაკრებისა და “არსენალის” ყოფილი მცველი ტონი ადამსი.

ფერნანდო ტორესი
49 მილიონი

2011 წელს ესპანელი სუპერფორვარდი “ლივერპულიდან” “ჩელსიში” გადავიდა. ამ ტრანსფერს გვარიანი ხმაური მოჰყვა. “წითლები” ძალიან გააბრაზა მათი კერპის წასვლამ. და ეს მიუხედავად იმისა, რომ “ლივერპულის” სალარო თითქმის 50 მილიონი ფუნტით შეივსო.
ფერნანდო ტორესის კარიერაში ლონდონური ეტაპი უარესი იყო, ვიდრე - მერსისაიდული. 182 შეხვედრაში მან 48 გოლი შეაგდო. სამაგიეროდ, “ელ ნინიომ” გუნდთან ერთად ჩემპიონთა ლიგა და ევროპალიგა მოიგო.

რაჰიმ სტერლინგი
53 მილიონი

2015 წლის ზაფხულში “მანჩესტერ სიტიმ” მართლაც კოლოსალური თანხა არ დაიშურა იმისთვის, რომ “ლივერპულის” გარემარბი ჩაეგდო ხელში. რაჰიმ სტერლინგს განსაკუთრებით გაუჭირდა პირველ სეზონში, როცა “ქალაქელებს” მანუელ პელეგრინი წვრთნიდა.
“ჩვენი თამაში ეფუძნებოდა ორ შეხებას, მე კი ბურთის ტარება და მოწინააღმდეგის მოტყუება მიყვარს”, - ასე ახსნა კრიზისი რაჰიმმა.

რიად მაჰრეზი
60 მილიონი

პეპ გვარდიოლას ფავორიტი ფეხბურთელი. თავის დროზე, ალჟირელმა ვარსკვლავმა, ჯეიმი ვარდისთან ერთად, ჩემპიონი გახადა “ლესტერი”. “სიტის” შემადგენლობაში კი ის ძველებურად ეფექტური ვეღარ არის, მაგრამ ადგილ-ადგილ მაინც გვთავაზობს სანახაობას.
პეპს არაერთხელ შეუქია რიად მაჰრეზი. მას განსაკუთრებით მოსწონს აფრიკელის უაღრესად თვითმყოფადი ტექნიკა.

რომელუ ლუკაკუ
75 მილიონი

“ევერტონმა” ბელგიელის სანაცვლოდ 75 მილიონი ფუნტი მიიღო “მანჩესტერ იუნაიტედისგან”. რომელუ ლუკაკუ რა ძალაა, ეს კარგად გამოჩნდა ჩემპიონთა ლიგის ბოლო მატჩებში.

ვირჯილ ვან დაიკი
75 მილიონი

“ლივერპული” ეძებდა მცველს, რომელიც, ბოლოს და ბოლოს, სტაბილურობას შესძენდა გუნდის დაცვას და მან ეს მცველი იპოვა ტანმაღალი ჰოლანდიელის სახით. ბევრი მიიჩნევდა, რომ “ლივერპულმა” მასში ზედმეტად დიდი თანხა გადაიხადა, მაგრამ ვირჯილ ვან დაიკმა ბოლომდე გაამართლა დანახარჯი.
“ის არის მცველი, რომელსაც, უბრალოდ, არ აქვს სუსტი წერტილი”, - იურგენ კლოპისგან ასეთი შეფასება ძალიან ბევრ რამეზე მეტყველებს. ვან დაიკი “საუთჰემპტონის” კიდევ ერთი დიდებული პროდუქტია.

ყოველდღიური სპორტული გაზეთი "ლელო"
327
მკითხველის კომენტარები / 0 /
მსგავსი ამბები
რუბრიკის სხვა სიახლეები
;