[პრესკონფერენცია] ვაისობა ორი წლით გავიხანგრძლივეთ!

საქართველოს ნაკრების მთავარმა მწვრთნელმა ვლადიმირ ვაისმა კვიპროსსა და ბელარუსთან ამხანაგური შეხვედრების წინ ჟურნალისტების შეკითხვებს უპასუხა.

მთავარი ამბავი, რაც პრესკონფერეციაზე გაცხადდა, ეს არის - 53 წლის სლოვაკმა სპეციალისტმა საქართველოს ფეხბურთის ფედერაციასთან კონტრაქტი 2 წლით გააგრძელა...

- რატომ არ არის საქართველოს ნაკრებთან ერთად საბა კვირკველია?
- კვირკველია რომ არ არის, ეს სულაც არ ნიშნავს იმას, რომ ის ცუდი ფეხბურთელია. პირიქით, შესანიშნავი მოთამაშეა და ძირითადი შემადგენლობის უდავო წევრია. უბრალოდ, საჭიროდ ჩავთვალე, რომ დამესვენებინა. საბას ბოლო დროს დიდი დატვირთვები ჰქონდა, ნემსებს იკეთებდა და ისე თამაშობდა მცირე ტრავმის გამო. რა თქმა უნდა, კვირკველია ისევ ითამაშებს ნაკრებში, როცა ბოლომდე მოიშუშებს ტრავმას.

- რა სიტუაციაა თქვენს კონტრაქტთან დაკავშირებით? ახალი სეზონი დაიწყო და ნაკრებს ორ უახლოეს შეხვედრაში თქვენ უთავკაცებთ. გამოდის, რომ თანახმა ხართ, ხელშეკრულება გააგრძელოთ საქართველოს ფეხბურთის ფედერაციასთან?
- საქართველოს ფეხბურთის ფედერაციას უკვე შევუთანხმდი. საერთო გადაწყვეტილებაა, რომ ნაკრებს კიდევ ორი წლის განმავლობაში ვუხელმძღვანელო.

ნებისმიერ შემთხვევაში ვარ და ვიქნები ჩემი ფეხბურთელების გვერდით. კაშია და კანკავა დღევანდელ ქართულ ფეხბურთში სამაგალითო პროფესიონალები არიან

- საქართველოს ნაკრები უახლოეს ორ ამხანაგურ მატჩს დედაქალაქის გარეთ, რეგიონებში გამართავს. თქვენი აზრი ამის თაობაზე და შეაფასეთ ჩვენი მოწინააღმდეგეები - კვიპროსი და ბელარუსი...
- ბელარუსისა და კვიპროსის ნაკრებები იმ მასშტაბის გუნდები არიან, რომელთაც ჩვენ ერთა ლიგის გათამაშებაში შევხვდებით. ასეთ გუნდებთან შეხვედრა ძალიან მნიშვნელოვანი და სასარგებლოა ჩვენთვის. რა თქმა უნდა, ამ მატჩებში საქართველოს ნაკრების მიზანი გამარჯვებაა.

ჩვენ მომავალზე უნდა ვიფიქროთ. 2018 წლის შემოდგომა ძალიან მნიშვნელოვანი იქნება ჩვენი გუნდისთვის. გადამწყვეტი დრო დაგვიდგება თუნდაც იმ კუთხით, რომ ევროპის ჩემპიონატზე გასვლის შანსი გვექნება...

რაც შეეხება თბილისის გარეთ თამაშს, ჩვენ ავირჩიეთ გორი და ქუთაისი იმის გამო, რომ საქართველოს უპირველესი გუნდი რეგიონებშიც ნახონ.

- ამ მატჩში რაიმე ტაქტიკურ სიახლეს თუ გეგმავთ?
- პირველ მატჩს 4-2-3-1 განლაგებით ვითამაშებთ. ჩვენთვის საინტერესოა ახალწვეულების გამოცდა. მაგალითად, მაინტერესებს, როგორ წარმოაჩენენ თავს საბა ლობჟანიძე, გიორგი პაპუნაშვილი, ირაკლი სიხარულიძე... ამ ეტაპზე რამდენიმე გამოცდილი ფეხბურთელი არ არის ნაკრებში. თუმცა, ცხადია, ისინი რჩებიან ჩვენი გუნდის ფეხბურთელებად.

- ფაქტია, საქართველოს ნაკრებს გამტანი ცენტრფორვარდის პრობლემა აქვს. რატომ არ უხმეთ ნაკრებში ბაჩანა არაბულს, ვისაც ხშირად გააქვს გოლები უნგრეთის ჩემპიონატში?
- არაბული ჩვენთან ერთად იყო დუბაიში შეკრებაზე. კი, მას გოლები გააქვს, მაგრამ ამ ეტაპზე ასეთი არჩევანი გავაკეთე, ასეთია ჩემი გადაწყვეტილება...

- ახალწვეულების მხრიდან საქმისადმი მიდგომით რამდენად კმაყოფილი ხართ?
- შეკრების პირველივე დღიდან არანაირი პრობლემა არ ყოფილა. ჩვენ ბევრი სამუშაო გვაქვს, მათ შორის იმაზეც, თუ როგორ ვიყოთ მეტად ხარისხიანები მოწინააღმდეგის საჯარიმო მოედანში. ეს ძალიან მნიშვნელოვანია. ჩვენი მოვალეობაა, უკეთ გამოვიყენოთ საგოლე მომენტები.

- ბოლო დროს გურამ კაშიას გარშემო განვითარებულ მოვლენებზე ყველამ ვიცით. შესაძლოა, თამაშის დროს მის მიმართ იყოს გარკვეული უკმაყოფილება...
- მე არ მინდა, ჩავერიო ამ ამბებში. ვიტყვი მხოლოდ ერთს, რომ ნებისმიერ შემთხვევაში ვარ და ვიქნები ჩემი ფეხბურთელების გვერდით. კაშია და კანკავა დღევანდელ ქართულ ფეხბურთში სამაგალითო პროფესიონალები არიან. კაშიას ძალიან უყვარს თავისი ქვეყანა. ჩემი ფეხბურთელები პატრიოტები არიან, ისინი მუდამ მზად არიან ნაკრებში სათამაშოდ!

ყოველდღიური სპორტული გაზეთი "ლელო"
2343
მკითხველის კომენტარები / 0 /
მსგავსი ამბები
რუბრიკის სხვა სიახლეები
;