[პრესკონფერენცია] კახა ჩხეტიანი: იმედი მაქვს, საპასუხო მატჩს ღირსეულად ჩავატარებთ... კახა ცხადაძე: აი, ხომ ვამბობდი!..

კახა ჩხეტიანი: ამ მომენტისთვის ეს შედეგი მისაღებია ჩვენთვის, რადგან...

- გავიგეთ, რომ რუსულ ენას კარგად ფლობთ, მაგრამ ქართულად გვესაუბრებით. რატომ?

- იმიტომ, რომ ქართული ენა უძველესი და ძალიან ლამაზია, ყველას უნდა ესმოდეს... ძალიან მიყვარს ჩემი ქვეყანა, პატივს ვცემ მშობლიურ ენას და ამიტომ ვსაუბრობ ქართულად!.. რაც შეეხება თამაშს, პირველ რიგში, ვულოცავ "ორდაბასის" დამსახურებულ გამარჯვებას! ჩვენ კი ამ შემადგენლობით მხოლოდ პირველი მატჩი ჩავატარეთ. ვფიქრობ, გვაქვს შანსი და საპასუხო მატჩში მის გამოყენებას ვეცდებით...

- ესე იგი, ასეთი ანგარიში ხელს გაძლევთ?

- ამ მომენტისთვის ეს შედეგი მისაღებია ჩვენთვის, რადგან მეტოქეს კიდევ ჰქონდა მომენტები. "ორდაბასი" გამოცდილი გუნდია და დღეს არ მოგვცა საშუალება, გვეთამაშა ის ფეხბურთი, რომელიც გვსურდა. მიუხედავად იმისა, რომ "ტორპედო" ახალგაზრდული გუნდია და შეთამაშება აკლია, იმედი მაქვს, საპასუხო მატჩს ღირსეულად ჩავატარებთ.

- მატჩისწინა პრესკონფერენციაზე თქვით, რომ "ორდაბასის" ფეხბურთელების არ გეშინოდათ...

- მართლა არავისი გვეშინია. ხომ არავინ გვკლავს?! ფეხბურთია ბოლოს და ბოლოს!..

- მეტოქე გუნდიდან ვის გამოყოფდით?

- საერთოდ, არ მიყვარს პერსონალიებზე ლაპარაკი, თუნდაც ეს მეტოქის ფეხბურთელი იყოს. "ორდაბასი" კარგია მთლიანობაში, როგორც გუნდი. ისე კი, ვიცნობ ბადიბანგას, რომელიც შარშან "შერიფში" იყო და "ტორპედოს" წინააღმდეგ ითამაშა. მისი გამოსვლის შემდეგ "ორდაბასიმ" უფრო აქტიური ფეხბურთი ითამაშა.

კახა ცხადაძე: ტორპედოს ძალიან ჭკვიანი მწვრთნელი ჰყავს...

- ვფიქრობ, პროგრამა-მინიმუმი შევასრულეთ: მოვიგეთ შინ "მშრალი" ანგარიშით. რაც შეეხება თამაშს, ველოდით, რომ მეტოქე დიდი ძალებით და თავდადებით დაიცავდა კარს... "ტორპედოს" ძალიან ჭკვიანი მწვრთნელი ჰყავს. ბევრი ფიქრობდა, რომ "ორდაბასის" იოლი თამაში ექნებოდა, მაგრამ მე ვამბობდი, რომ რთული მატჩი გველოდა და ასეც მოხდა. სტატისტიკას თუ ჩავხედავთ, აშკარა უპირატესობა გვქონდა, თუმცა დამაგვირგვინებელ ფაზაში სიზუსტე გვაკლდა...

ფეხბურთელებს ვერაფერს ვუსაყვედურებ. შეცვლებიც სწორად გავაკეთეთ - მოვხსენით მარჯვენა მცველი და შევუშვით ბადიბანგა, რომელსაც ფლანგზე თამაშის გამწვავება შეუძლია.  რა თქმა უნდა, საწყენია, მეტი რომ ვერ გავიტანეთ...

ახლა "ტობოლთან" ჩემპიონატის მატჩზე უნდა გადავერთოთ. ძალიან რთული კვირა გვაქვს. მადლობა ღმერთს, არიან ფეხბურთელები შემადგენლობის როტაციისთვის...

2907
მკითხველის კომენტარები / 0 /
მსგავსი ამბები
რუბრიკის სხვა სიახლეები
;