პრინციპული პრინსიპალიტიზე - უელსმა 14 შეცვალა, საქართველო უცვლელია

* 18 ნოემბერს კარდიფში საქართველოს ნაკრები ტესტმატჩს გამართავს უელსის ნაკრებთან.
* უელსელთა თავკაცმა უორენ გეთლენდმა ავსტრალიასთან მატჩის შემდეგ 15-დან 14 მორაგბე შეცვალა.
* "ბორჯღალოსანთა" მწვრთნელმა მილტონ ჰეიგმა კანადასთან მატჩის მერე 15-ეულში ცვლილება საერთოდ არ განახორციელა.
* თუ მოედანზე შემოვა, მერაბ კვირიკაშვილი ეროვნულ ნაკრებში 107-ე კეპს გამართავს.
* ნოემბრის ტესტების სერია "ბორჯღალოსნებმა" კანადის ძლევით გახსნეს - 54:22.

ხვალ, 18 ნოებბერს, კარდიფში, "პრინსიპალიტი სთედიუმზე" საქართველოს ნაკრები უელსის ეროვნულ გუნდს პირველად დაუპირისპირდება. "ბორჯღალოსნები" კარდიფში ჯერ კიდევ გასულ უქმეებზე ჩავიდნენ და მატჩისთვის ადგილზე ემზადებოდნენ.

საქართველოს ნაკრების მთავარმა მწვრთნელმა მილტონ ჰეიგმა გუნდის ძირითადი შემადგენლობა უცვლელი დატოვა. მხოლოდ ერთი ცვლილებაა სათადარიგოთა შორის: ახალბედა გიორგი კვესელაძის ნაცვლად, რომელსაც ეროვნულ ნაკრებში დებიუტი კანადასთან მატჩში ჰქონდა, გამოცდილი მერაბ კვირიკაშვილი ითამაშებს. სხვა ყველა უცვლელია.

უელსის ნაკრების თავკაცმა უორენ გეთლენდმა "წითელი ურჩხულების" შემადგენლობა ავსტრალიასთან მატჩთან შედარებით საგრძნობლად გადაახალისა. ძირითად შემადგენლობაში მან 14 ცვლილება განახორციელა. "ვოლაბების" წინააღმდეგ სასტარტოში მხოლოდ გარემარბი ლიამ უილიამსი იყო, რომელიც ჩვენს ნაკრებთან მატჩში ფულბეკის პოზიციას დაიკავებს. გუნდის კაპიტანი კი, მესამეხაზელი დენ ლიდიატე იქნება.

უკანა ხაზში, ფრთებზე, ალექს კათბერტი და ჰალემ ამოსი ითამაშებენ. მგეზავის პოზიციას რის პრისტლენდი დაიკავებს, ძირითად მგეზავი და დამრტყმელი დენ ბიგარი კი, სათადარიგოთა შორის იქნება. საერთოდ არ არის განაცხადში შტატიანი მექულე, ფულბეკი ლი ჰალპფენი.

შუამარბად, გამოცდილ სკოტ უილიამსთან ერთად, ახალგაზრდა ოუენ უოტკინი ითამაშებს, რომელსაც ეროვნულ ნაკრებში დებიუტი გასულ უქმეებზე ავსტრალიის ნაკრებთან მატჩში ჰქონდა. ცხრა ნომრად რის ვები ითამაშებს, რომელიც ამ პოზიციაზე უელსში საუკეთესოა.

შერკინების პირველ ხაზში, როგორც მოსალოდნელი იყო, გეთლენდმა ახალგაზრდა ლეონ ბრაუნი (#3) დააყენა, რომელსაც უოტკინის მსგავსად, ეროვნულ ნაკრებში დებიუტი ავსტრალიასთან მატჩში ქონდა. მას პარტნიორობას ნიკ სმითი და კრისტიან დევისი გაუწევენ.

"ვგრძნობდით, რომ მიმდინარე კვირაში რამდენიმე მორაგბისთვის შანსი უნდა მიგვეცა ტესტმატჩში თავი გამოეჩინა. ეს შესანიშნავი შესაძლებლობაა ახალგაზრდა მოთამაშეებისთვის, გამოვიდნენ მოედანზე და გვაჩვენონ, რა შეუძლიათ. გუნდის შემადგენლობა შერეულია, არიან ისეთები, რომლებსაც საკმაოდ ბევრი კეპი დაუგროვდათ, და ისეთებიც, რომლებიც ნაკრებს ახლა ეჩვევიან.

საქართველოს ნაკრები კარდიფში, შინ შესანიშნავი გამარჯვების შემდეგ ჩამოვიდა. ისინი ეცდებიან, საკუთარი შესაძლებლობების მაქსიმუმი გაიღონ და საამისოდ ჩვენ მზად უნდა ვიყოთ" - თქვა უელსის ნაკრების ახალზელანდიელმა მწვრთნელმა უორენ გეთლენდმა.

უელსი-საქართველო
უელსი (15-9): 15. ლიამ უილიამსი, 14. ელქს კატბერტი, 13. სკოტ უილიამსი, 12. ოუენ უოტკინი, 11. ჰალემ ამოსი, 10. რის პრისტლენდი, 9; რის ვები, (1-8): 1. ნიკი სმითი, 2. კრისტიან დევისი, 3. ლეონ ბრაუნი, 4. ადამ ბირდი, 5. კორი ჰილი, 6. დენ ლიდიატე, 7. სემ კროსი, 8. სებ დევისი
სათ: 16. ელიოტ დი, 17. ვინ ჯოუნსი, 18. ტომას ფრენსისი, 19. ჯოშ ნავიდი, 20. ტაულუპე ფალეტაუ, 21. ალედ დევისი, 22. დენ ბიგარი, 23. ოუენ უილიამსი.
საქართველო (15-9): 15. სოსო მათიაშვილი, 14. გიორგი კოშაძე, 13. დავით კაჭარავა, 12. მერაბ შარიქაძე, 11. მირიან მოდებაძე, 10. ლაშა ხმალაძე, 9. ვასილ ლობჟანიძე. (1-8): 1. მიხეილ ნარიაშვილი, 2. ჯაბა ბრეგვაძე, 3. ლევან ჩილაჩავა, 4. კონსტანტინე მიქაუტაძე, 5. გიორგი ნემსაძე, 6. ლაშა ლომიძე, 7. ვიქტორ კოლელიშვილი, 8. ბექა ბიწაძე.
სათ: 16. შალვა მამუკაშვილი, 17. კარლენ ასიეშვილი, 18. სოსო ბეკოშვილი, 19. გიორგი ჩხაიძე, 20. გიორგი თხილაიშვილი, 21. გიორგი ბეგაძე, 22. რეზო ჯინჭველაშვილი, 23. მერაბ კვირიკაშვილი

ნოემბრის ტესტები
18 ნოემბერი
იაპონია-ტონგა
ნამიბია-ურუგვაი
ბელგია-ბრაზილია
რუმინეთი-სამოა
იტალია-არგენტინა
ინგლისი-ავსტრალია
ესპანეთი-კანადა
გერმანია-აშშ
შოტლანდია-ახ. ზელანდია
ირლანდია-ფიჯი
საფრანგეთი-ს. აფრიკა.

ყოველდღიური სპორტული გაზეთი "ლელო"
704
მკითხველის კომენტარები / 0 /
მსგავსი ამბები
რუბრიკის სხვა სიახლეები