პრობლემა მოგვარებულია: მაიკლ დიქსონი ნაკრებში ჩამოვა

საქართველოს ნაკრების ნატურალიზებული კალათბურთელი მაიკლ დიქსონი ფრანგული "სტრასბურიდან" თურქეთის მეორე ლიგაში რომ გადავიდა ჩვენს მკითხველს კარგად მოეხსენება.

"ბაჰჩეშეჰირის" შემადგენლობაში მან რამდენიმე მატჩი გამართა, ბოლო სამი შეხვედრა კი გამოტოვა. შაბათის თამაშის ოქმში წერია - არ ითამაშა მწვრთნელის გადაწყვეტილებითო. სიტუაციაში გასარკვევად დავუკავშირდით კალათბურთის ფედერაციის ვიცე-პრეზიდენტ ვლადიმერ ბოისას:

- მაიკლ დიქსონს ტრავმა ჰქონდა და ამიტომ არ თამაშობდა. თუმცა იგი უკვე მომჯობინდა და პირველი ვარჯიში 23 იანვარს გამართა. 24-ში მის გუნდს თურქეთის ჩემპიონატის მატჩი აქვს და, სავარაუდოდ, არც ამჯერად ითამაშებს. შემდეგ მატჩში კი, მას მოედანზე ვიხილავთ. იმედი გვაქვს, რომ თებერვლის მეორე ნახევარში დიქსონი მწყობრში იქნება და საქართველოს ნაკრებსაც სათანადოდ დაეხმარება.

ბოისამ ისიც გვითხრა, რომ საქართველოს კალათბურთის ფედერაციას მოლაპარაკებების გამართვა დასჭირდა თურქულ მხარესთან დიქსონის საქართველოს ნაკრებში გამოშვებასთან დაკავშირებით. ამ საკითხთან დაკავშირებით კალათბურთის ფედერაციის პრეზიდენტ პაატა გურასპაულს ველაპარაკეთ:

- ფიბა-ს წესების მიხედვით კლუბს უფლება არ ჰქონდა, რომ კალათბურთელი ნაკრებში არ გამოეშვა, თუმცა საჭირო იყო მაკლ დიქსონის გუნდის ხელმძღვანელობასთან დალაპარაკება. ყველაფერი დადებითად გადაწყდა, თურქეთის ჩემპიონატის მატჩს, რომელიც სანაკრებო შეხვედრებს ემთხვევა, გადაიტანენ. ველით კლუბისგან ოფიციალურ წერილს.

შეგახსენებთ, რომ მსოფლიოს ჩემპიონატის საკვალიფიკაციო ეტაპის საწყის ორ მატჩში მაიკლ დიქსონმა დიდი სამსახური გაგვიწია. იგი გერმანიასთან და სერბეთთან ორი მატჩის ჯამში 29.5 ქულასა და 7 პასს აგროვებდა.

საქართველოს ნაკრებს უახლოესი შეხვედრა ავსტრიასთან 23 თებერვალს ელის, ხოლო 25 თებერვალს თბილისში გერმანიას უმასპინძლებს.

3315
მკითხველის კომენტარები / 0 /
მსგავსი ამბები
რუბრიკის სხვა სიახლეები